Read Central Asmat YAKOBUS 5 Bible Online

YAKOBUS 5 - Central Asmat bible

YAKOBUS 5

¹Jakaperey. Ca wun ow, bare pok awutut awompokom. E nat, asep jofay car asan pwicaknakut aemapcomokom. Inimas jak pwicak mamemapey. Bwemcam mamapbwecey.

²E capok, bare of emcaemamesef. E osot e capakaian jof emcafifimef.

³E caremas uangam, e caperak uangam, as awut emcaemfes. E as, car e uang, sey akat baseyetam opok aporomtamcema. E as, jismak cimin, e cadam das afamkurumcema inim cimin ara. Bare, dar e asepnak jofay aemapmom ara. Ca nat, pok awutut sosey aeawirukum.

⁴Caram e cakebun kerja bwemtam ow gaji batetam opok aemawirukum. E ow masirin, atakam afakaytawmes. E faknakut Tuhanam, e atakam jen emcajief.

⁵Car awames capinmi akat pok aomomawirukum. Caram e cajak basinomas, paknam awut aemawirukum. Car ow binu forfor aememawirukum. Allah nat, car acajimirceman.

⁶Caram ow tarowat atakam aotawfokom, “E ow, ow fasi ara,” inim aefokom. Caram e ow tarowat acatiwfokom. E ow nat, amatam ca baji opok.

⁷Dojowow akatonokom. E Tuhan aoenawcow jofay ajiwar, jak jirow mamememey. Caram e pok akan atewapomames ow, bi binip mamceceremey. Ar e anakat akat bakomtew jofay, jak jirow manmok afemes. Aram e te bwi, jak jirow, manmok afemes. Aram e te bwi bakari, jak jirow, manmok afemes.

⁸E Tuhan aoenawcow jofay, bare sotop ara. Inimas caram jak jirow manmok mamfeey. Jak fakam mamememey.

⁹Dojowow akatonokom. Caram caramaman jirpu mampuputaw arapok. Tuhan car dosa ara, inim atakam basakamtiwasin. Bare, e dosa atakam basakamtiw ipic sotop ara.

¹⁰Car e Allah atakam botaw ow aemfesas jipu mamemey. Aram Tuhan atakam aotawfesen. Ar jak jirow emcom ajurusemfesen.

¹¹Jakaperey. Wun ow ajurusemces, ar inim akajiremcemes. Daram e ow, “asan akat ow,” inim aecomom. Caram atakam jen emcajifokom ara, e Ayub e ajurusemefas aman, inim akajiremefen. Asep ara masirin, Tuhan, asan akat, e aramat ipic aomefen. Bare, e Tuhan, saw akat boworpor ipic ara. Aram ow damos ipic ara.

¹²Dojowow akatonokom. Atayi faknakut aecokom, caram, “Dor e atayi aeminas jipu aemcimin. Pate opok. Allah manmok tiwap,” inim baji arapok. Caram, “Dor e atayi aeminas jipu aemcimin. Pate opok. E onam op capinmi awames,” inim baji arapok. Wunam, “Dor e atayi aeminas jipu aemcimin. Pate opok. A capinmi awames,” inim baji arapok. E nat, atayi aecokom, car, “Owo,” inim cowok mamjiey. Wunam, “Opok,” inim cowok mamjiey. Allah, “Car dosa atakam atawmokom,” inim atakam basakamtiwasin.

¹³E ca wun ow asan pwicak aemapmokomnew, e ow janim Allah baanimces. E ca wun ow jak akat aemapmokomnew, e ow Allah basicim so baeces.

¹⁴E ca wun ow dam aemamesmokomnew, e ow e Yesus basicim barewsi ketua ow bajateces. E ketua ow masirin, janim Allah e ow baanimtamces. Aram Tuhan juwas bajitewces, wunam minyak e ow dam ton baokomnemces.

¹⁵E janim manim ow Tuhan asicimkurumces, e janim manimas, e dam ow ajaworomcema. Bare, Tuhan e ow ajaworomtewcema. E owam dosa aemfesnew, Tuhan e dosa akokoromosomtamcema.

¹⁶Inimas ara, e cadosa caraman mamfafasimey. Caram janim Allah caramaman mamanimey. Er car dam baworomtamas ara. Ow tarowat janim Allah aanimces, Allah awutnakutas aemtamcema.

¹⁷Bare, Elia, asmat ipic, dar awcawor aememefen. Aram Allah te batewnem arapok, inim janim aanimefen. Bare, tahun tiga ajiwar, wunam pir enam ajiwar bokawim, te baney opokut aemefen.

¹⁸Ar masirin, janim Allah aoanimefen. E te masirin, anayefen. E pok akanam aojitfesen.

¹⁹Dojowow akatonokom. E ca wun ow e atakamnak mamkawi akoremcokom, bare car dosa ow aememcomokom. Caram tamo aememcomokom.

²⁰E nat, ow, e dosa ow, e atakamnakpu bin afirimapomtamcesnew, ar akatas e ow aomcemes. Ar e ow daniwis bemapasinas aomcemes. Aram Allah e ow dosa arke bakokoromosom, inim aomcemes. Caram inim atakam binip mamcomomey.