Read Central Asmat 1 PETRUS 3 Bible Online

1 PETRUS 3 - Central Asmat bible

1 PETRUS 3

¹Inimasam ara, e awapokom cepes, e camiwis atakam ji mameey. E wun camiwis e Allah atakam aopowmes ow ara openow. E nat, ar car cepes tarowatnak aporcan, aram Kristus ajamkawicemes. Caram e Kristus mamkawi atakam, e camiwis botaw opok aemcokom, aram ajamkawicemes.

²Camiwis car jursumec opok cowok aporceman. Aram car Allah basicimnak aporceman. Inimas aram Kristus ajamkawicemes.

³Car cepes akat memem akat aporcokom, er dam cosowas arapok. Er e cafin manam bajikapomas opok. Eram cosow pok bajimapomas opok. Eram akat pakaian bajimomas opok.

⁴E nat, car cepes akat memem, er cajak amanas ara. Er car demesnakapam, binawam, inim mememas ara. Inimas bwem, bare bakari opokas ara. Allaham inimas akat cowok aporma.

⁵E ametnak tarowat cepesam, jirey Allah aefesen. Aram e amiwis atakam ji aefesen. Inimas ar cepes akat aememfesen.

⁶Saraam inimas aemefen. Ar Abraham atakam ji aeefen. Aram, “Dor Abraham ban ton ara.” Inim aeefen. Car akatas bwemawaram, omar opokam, inim aemamokomnew, bare car Sara atiperes aememamokom.

⁷Inimasam ara, e ca petew ow e cacepes cowkon aemapmokom ara, caram jen arapok. E cacepes dam kumit inim. Inimas car e cacepes mamsicimey. Bare, Allah, jiwneas, e cacepesam, caram, cowkon atatamcema. Caram inimas aemcokom, wunam janim Allah aanimcokom, aramat ipic e janim aanimcokomas aemtamceman.

⁸Bare, dor asep atakamam atawmin ara. Car takas bi binip cawora. Caram takas jak cawora. Car Kristus akac ajamkawimokom. Inimas damos aamjiomey. Sawes akat aamoworporey. “Dor akat. Wun ow pwicak,” inim bi binip arapok.

⁹Ow, pwicakas car aemcannew, caram amatam pomatam baji arapok. Ow cemew car aatcannew, amatam pomatam baji arapok. Ca nat, Allah, asan akat e ow bom, janim mamanimey. Bare, Allah, asan akat car bom, inim ajatefan.

¹⁰E Alkitab atakam: “E jak akat batowopam, asan akat mememam, inim jak aseremomames ow, pwicak atakam botaw bakarices. Aram e suw atakam botaw bakarices.

¹¹Aram e pwicakas bak bapayomces. Ar akatas baemces. Aram ow damos baamjiomporawarces.

¹²Bare, Tuhan, e tarowat ow manmok atiwma. E ow janim aramat ipic aanimces, ar aratakam jen ajima. E nat, ar e pwicakas aemames ow, bak apayemama.” Inim aema.

¹³Car e akatas bwem jak aseremomcokom, e car bajurusum ow cam?

¹⁴E nat, car akatas aemcokom, wunam ajurusemcokom, car jak akat aememcomokom. Caram asmat ow omar arapok. Jak pwicakam memem arapok.

¹⁵Car e cajak aman, Kristus mamsicimey. Aram caTuhan mamtewemey. Ow jonow car atowcan, “E jirey aemokomas ucim inimaram?” inim aecan, bare caram atep e ow bajit mamememawarey. E nat, atep ajitcokom, atakam akata. Akatas e ow mamomey.

¹⁶Caram e cajak aman atakam, ji mameey. Inimas ara, ow cemew atakam car aotawcannew, jokmen atakam car aotawcannew, e ow car Kristus ajamkawimokomam, akatas aemamokomam, inimas aporcemes. Ar masirin, namke akayemcemes.

¹⁷Allah akat aporcow, car akatas bwem, wunam ow car bajurusum, bare akat ara. E nat, car pwicakas bwem, wunam ow car bajurusum, bare pwicak ara.

¹⁸Bare, Kristus e dadosa bakokoromosomtam damir bar cowokut aafef. Aramat ipic, bare tarowat ara. Da nat, fasi ara. Aramat ipicam damir aaftamforow. Er dar Allahpu batowocenas ara. Ow e aramat ipic acatiwfes. Allah Roh nat, aramat ipic aojaworomsumutumef.

¹⁹E wun damir ow aranakat ow, penjara cem aman inim cimin aemapfes. E Kristus damir aemamesef ara, e aranakat ipic, e damir ow aranakat ow asan ajisosef. Aram erasan ow acacapiomef.

²⁰E anakat ow, e Allah atakam aopowfes ow aranakat ow ara. Nuham e ci awut cowocemkenemefaw, Allah e ow barewem epen jak jirow manmok atiwefen. E owam bwi aemsefes ara, Allah, ow arke opok ajortewefen. E ow delapan ajiwar bwi damir opoken.

²¹E ametnak bwi, e wow babwimas inim cimin ara. E bwi babwimas, ow ajortewma. E bwi babwimas, dam ponow bacicikimas opok. E nat, e bwi babwi ow, “Dar e dajak aman atakam jipu aecomom,” inim atayi Allah aecemes. Bare, Yesus Kristus aojaworsitef. Inimas e bwi babwimas, ow ajortewma.

²²E Yesus Kristusam onam op aaptometef. Ar Allah ban bo jamam awap. Aram jirmec e malaikatam, e jirmec owam, e fak owam, ajirimama.