Read Central Asmat 2 PETRUS 1 Bible Online

2 PETRUS 1 - Central Asmat bible

2 PETRUS 1

¹Dor Simon Petrus ara. Dor Yesus Kristus akerja bwemtam ipic ara. Aramat ipicam dor atakam botaw atewosomfan. Car masirin, Yesus Kristus asicimamokom ow ara. E asicimamokomasam, e asicimamomasam, bare awcawor ara. E asicimamomas, bare akatipic ara. Bare, e Yesus Kristus dabajortew ipic ara. Aram Allah ara. Aram tarowat ipic ara. Inimas ar a basicim jak dar atetamforow.

²Car Allaham, e Yesus daTuhanam, camsomnak aemcokom, Allah, asan akatnakut car aomceman. Aram jak akatnakut car atetamceman.

³Allah dar e arakatnakutasam, e atarowatasam, inim batowom ajatetotorforow. Dar aramat ipic namsomnak ajiemcom, daram ow tarowat aememcomom. Aramat ipic, bare fak ara. Aram dar ow tarowat memem, inim fakas atetamtotorforow.

⁴Bare, ar e awutnakut atayi aetamforowasam, e akatnakut atayi aetamforowasam, atetamtotorforow. Dar eras atowomtotorcom, daram Allah jak atowomtotorcomom. Aramat ipicam dar awames capinmi jak basinomas pwicak jipu bwem, asurumtamtotorcemarow.

⁵Bare, car Kristus asicimamokom ara. E nat, car e cowok arapok. Caram wunas bwem, jak baseremom awuta. Caram ow akat mamememporey. Car masirin, camsom awut mamememporey.

⁶Car masirin, jak fak mamememporey. Car masirin, jak jirow mamememporey. Car masirin, ow tarowat mamememporey.

⁷Car masirin, e cajowow damos mamjiomporey. Car masirin, ow takasam damos mamjiomporey.

⁸Bare, car eras takas aemcokom, wunam eras kayimin akakayimcokom, caram Yesus Kristus daTuhan camsomnak aememcomokom. Caram aramat ipic kerja akatipic aemtamcomokom.

⁹E eras bwem opok ow nat, manmok jipir ow inim cimin ara. Ar manmok kapi ow inim cimin ara. Allah e ow aemfes dosa emcakokoromosomef. E ow nat, inimas binip aanimemfes.

¹⁰Dojowow akatonokom. Allah car ajatetotorfan. Aram car aereremtawtotorfan. Car masirin, aratakam ji mamekurumporey. Inimas aemcokom, car aramat ipic mamkawi bakorompim opok aemcomokom.

¹¹Inimas ara, Allah, e Yesus Kristus daTuhan aPemerintah Asan, asan akatipic car atowomiwceman. E asan, bare jiwne asan ara. E Yesus Kristusam dabajortew ipic ara.

¹²Car eras camsom ara. Caram e jen ajifokom atakamnak, mamkawi fak aemamokom. E nat, dor eras binip car bacomomtam aemcimin. E atakam penting awut apormin ara.

¹³E damir aafcey jofay ajiwar, dor eras binip car bacomomtamawar akat apormin ara.

¹⁴E damir aafcey jofay, bare sotopnakap apormin. Er e Yesus Kristus daTuhan atakam dor aotawfanas jipu ara.

¹⁵Dor damir aafcey ara, car a atakam binip bacomomawar akat ara. Inimas ara, dor a atakam surat bweapom, jec awutnakut awumin.

¹⁶Bare, e Yesus Kristus daTuhan, fakas epcom aenawef. Dar eras atakam car aotawfenom ara, dar suw atakam bapwikimtew opok. Da nat, e aramat ipic akatnakutas epcom, manmok abwifom.

¹⁷Aricipic Allaham, e aramat ipic asicimef. Ar e aramat ipic akatnakut arawen. Ar atakam e akatnakut asan ewtewnemef, “A dotiw cowokut ara. Dor aramat ipic damos ajiomamin. Doram aramat ipic akat aemin,” inim aeef.

¹⁸Allah e atakam atewnemef ara, dar e Yesus Kristus e akatnakut sikon op akac aememfom.

¹⁹Inimas ara, dar e Allah atakam botaw ow aratakam asicimkurumamom. Caram e atakam jen baji akata. E atakam, pelita, jiwic asan sere aseremtiwma inim cimin ara. Er sere, jopufa aemapma inim cimin ara. E atakam sere aemapma— e jo bayar serenakut, e cajak aman aseremtiwcan jofay ajiwar ara.

²⁰Caram a atakam mamtakamporkurumey: E Allah atakam botaw ow aeapomfes atakam, e Alkitab aman awames. E nat, ow e atakam, arop bi binip jipu bwemcowom asan opok.

²¹E Allah atakam botaw ow arop bi binip jipu atakam botaw opok cowok aemfes. E nat, e Roh Kudus e ow jak aseremomtamefen. Inimas e ow Allah atakam aotawfesen.