Read Central Asmat 2 PETRUS 2 Bible Online

2 PETRUS 2 - Central Asmat bible

2 PETRUS 2

¹Ametnak ara, Allah atakam botaw suw ow, e Allah mamkawi ow akac aememfes. Bare, suw atakam mamememtam owam car akac inim cowok aememcemes. Ar suw atakam curuw amememtamcemes. E aratakam ji bwe ow nat, daniwis aemapcemes. Kristus e ow ajititef. E nat, e ow, aramat ipic apacincemes. E owam daniwis asarimemapcemes.

²Ow arkeam e ajursumecas ajamkawicemes. Bare, e Allah atakam, bokot jof anakat ara. E ow nat, cemew e bokot jof anakat aatcemes.

³E suw atakam mamememtam ow, pok asinomames. Inimas ar e capok batewet, suw atakam car aotawceman. Tareynakut, e Dosa Atakam Basakamtiw Ipic, e ow adosa, atakam asakamtiwef. E ow Daniwis Bwemtitam Ipic, bare isi opok.

⁴Ametnak ara, Allah, e dosa aemfes malaikat, saw akat opok aemfen. Ar e malaikat neraka aman ajiwinemefen. Aram e malaikat, e dosa atakam basakamtiwkurum jofay ajiwar, e jiwic jof aman bemapawar, atetamefen.

⁵Aram e ametnak ow saw akat opok aemefen. Ar e bwi awutut e fasi ow bajurusum atewnemefen. A nat, e Nuham, e wun ow tujuh ajiwaram, ajortewefen. E Nuham acacapiomefen. Aram e ow, ow tarowat memem atakam aotawefen.

⁶Bare, Allah e kota Sodom owam, e kota Gomora owam, ow fasi ara, inim atakam asakamtiwefen. Inimas ar e kota jismak afamtiwkurumefen. Eras aemef ara, ar fasi ow e asep jofay aemcesas aporomtamefen.

⁷Allah nat, Lot ajortewefen. E Lotam jipic tarowat aememefen. Ar e jirmec bopow ow jursumecas aporef, wunam jak pwicak aememefen.

⁸E jipic tarowat, e fasi ow akac aememefen. Ar join aatamfafayef, e jirmec aopowfesas aporefen. Aram e atakam atawfesas jen ajiefen. Inimas ar jak opok aememefen.

⁹Bare, Iblis, ow tarowat, dosa bwem acajijimtawcema. E nat, Allah eras botpem fakas e ow tarowat batetam amsom. Aram e fasi ow, e dosa atakam basakamtiwkurum jofay ajiwar, bajurusumawar amsom.

¹⁰E bajurusumas, bare e ajak aman jursumec basinomas jipu bwemam, e Allah jirmec bifanam, inim ow arasnak ara. E ow e pwicakas bwem, omar opok ow ara. Aram kus fak ow ara. Ar cemew atakam e onam op malaikat botaw omar opok aemames.

¹¹Malaikat, bare fak ara. Aram awut ara. E suw atakam mamememtam ow nat, kumit ara. Aram ow awut opok. E malaikatam, e ow asalah, atakam pwicak Tuhan bipu botaw opok aemames.

¹²E ow nat, bi binip opok binatang inim cimin ara. Ar ajisamesfes ara, ar siso a baneykomopas ajisamesfes inim cimin ara. Aram bacatiwas ajisamesfes inim cimin ara. Ar e amsom opokas, cemew aatmes. Ow, e ow, bi binip opok binatang cimin acatiwcemes.

¹³E ow, kawey ow ajurusumfes. Bare, aram ajurusemcemes. Aram jok jursumecas bwem jak akat aememames. Aram namke car akamaman. Aram jaymir ow ara. Ar amos car akac aanmes ara, aram tot car aotman. Ar inimas bwem jak akat aememames.

¹⁴Aram jursumec cepes apowjarawarmes. Ar dosa bwem jak asinomawarmes. Ar e fak opok ow, dosa bwem acajijimtawmes. Aram pok batewet jak basinom amememfes. Bare, Allah e ow bajurusum atakam atawef.

¹⁵E ow e bokot anakat bakan ajitiwfes. Ar masirin, bokot jen aememfes. Ar e Beor atiw juwas Bileam ajaref bokot, ajarfes inim cimin ara. E Bileam uang jak asinomefen. Inimas uang batewet, fasias aemefen.

¹⁶Bare, atakam amsom opok keledai, asmat atakam aotawefen. Ar e Bileam pwicak aemefas jiman aafefen. Ar e Allah atakam botaw ipic jayic inim cimin aemefas akarimefen.

¹⁷E suw atakam mamememtam ow, wabwi asaref inim cimin ara. Bare, fo awut, jak sakar awaramosomcema. E owam e jak sakar inim cimin ara. Allaham e ow e jiwicnakut asan atawapomcema.

¹⁸E ow arma atawsicimames. E nat, e atawmes atakam desenas ara. Wun ow, e suw atakam mamkawi jepen akoremfes. E suw atakam mamememtam ow nat, e ow e jursumec jak basinomas jipu bwem acajijimtawmes. Ar e ow, siso aman aneykomopmes inim cimin ara.

¹⁹E suw atakam mamememtam ow, atayi e ow aemes. “Car daratakam ji aecokom, Allah car ajirmec ji bwe, atakam car botaw opok aemceman.” Inim aemes. E suw atakam mamememtam ow nat, jursumecas bwem, bwemkarim asan opok. E jursumec fakas, e ow aomomama. Bare, ow pok bwem bwemkarim asan opoknew, eras e ow aomomames.

²⁰Bare, dabajortew ipic, e Yesus Kristus daTuhan ara. E aramat ipic amsom ow, awames capinmi jursumecas akoremfes. E nat, e ow e jursumecas aojamkawicesnew, ar asan pwicaknakut aemapcemes. Bap ara, e ow Yesus Kristus amsom opok aemapfes, aram asan akat inim aemapfes.

²¹E nat, e ow, e ow tarowat mamemas amsom aemapfes. Wunam, ar eras bak apayapfes. Aram, e Allah e ow atetamef Jirmec, bak apayapfes. Bare, ar e ow tarowat mamemas amsom opok ayaw, ar asan akat ara.

²²Owam inim baposomtew atakam aotawcemes: “Juwur e bo aboefpu aofasicema.” Wunam, “Ow, o penas bwi abwimces, e o semow aoecema.” Inim aecemes. Bare, e suw atakam mamememtam ow aemfesas, a baposomtew atakam, atakamnak aporomcemes.