Read Central Asmat 2 PETRUS 3 Bible Online

2 PETRUS 3 - Central Asmat bible

2 PETRUS 3

¹Dojowow akatonokom. Awames surat, car aeapomtamfin surat kedua ara. E surat jamnuk takas aeapomof ara, dor car bi binip akat bacecerem, binip car acomomtamporfin.

²Car e Allah atakam botaw ow tarowat, e tareynakut aotawfes atakam, bi binip bacomomji. E Yesus Kristus daTuhan, bare dabajortew ipic ara. Aramat ipic, ow atakam botaw atewosomef. E ow caras ara. E ow, aramat ipic jirmec, atakam aotawfes. Caram a jirmec binip bacomomji.

³A bap atawmin atakam ara: bare e asepnak jofay, ajursumec jak basinomas jipu bwemawar ow aenawcemes. Car inimas camsom ara. E ow, bare uc car aocceman.

⁴Aratakam, “E Yesus bofasi atayi aeef. E ipic nat onakaram? Darisorow, bare damir emcaaffes. Wunam, Allah a capinmi akenemapomef jofay ajiwar, wow ajiwaram, e pok takas, e akenemapomefas jipu cowok awames ara.” Inim aeceman.

⁵E ow nat, a atakam jen memem akat arawen: Tareynakut Allah atakam aotawefen. Atakam aotawef masirin, e onam opam, e capinmiam akenemamesefen. Bare, bwi, capinmi ajaworamesefen. E capinmiam bwi wowoc atereamesefen. Asep ara masirin, bwi awutam e capinmi akupimomseefen. E capinmi ow, e bwi damir aaffesen.

⁷Allaham atakam aootawefen. Ar masirin, a wow apormom onam opam, capinmiam, daniwis bwemtiw opok aemama. Ar eras e aramat ipic e jursumec ow dosa atakam asakamtiwkurumcow jofay ajiwar, daniwis bwemtiw opok aemama. E jofay masirin, a onam opam, a capinmiam, sos aurukurumcemes. Allaham e ow daniwis aemtiwcema.

⁸Dojowow akatonokom. A atakam cowok binip manim arapok: Tuhan, bar cowok, tahun seribu ajiwar awcawor apormar ara. Aram tahun seribu ajiwar, bar cowok awcawor apormar ara.

⁹Tuhan e atayi aeefas bwem, kamor opok aemama. Wun ow abinip nat, ar kamor arawen. Aramat ipic nat, jak jirow car aomaman. Ar ow daniwis memames pwicaken. Ar ow takas dosa bak bapayemkurum akaten.

¹⁰Bare, e Tuhan jofay, osom ipic cimin aenawamescema. E jofay ara, e onam op aanioscema. Aram wir inim ajioscema. E bayitam, e bayaram, sos aurukurumcema. Allah eras afakamkurumcema. A capinmiam, a capinmi pok takasam, aanioscema.

¹¹Dar, Allah, e pok takas, inim afakamkurumcema apormom. Inimas ara, car ucim ow ememcokomnew? Bare, car ow tarowat mememji. Caram e cadam anakat epcom, Allah batetamji—

¹²car Allah Jofay bwenaw manmok atiwemamokom ara. Caram e jofay sarim bwenaw aemtampormokom ara. E jofay, bare e onam op, sos aurukurumcema. E bayitam, e bayaram, amopnakut apwimcema. Inimas ar bwi inim ajaworsecema.

¹³Allah nat, ay onam opam, ay capinmiam, bakenemtiw atayi aeef. Ow tarowatam e asan aatamapawarcemes. Dar eras manmok afemom ara.

¹⁴Dojowow akatonokom. Car e jofay bwenaw manmok afemokom ara, jursumec opok cowok mamememporkurumey. Pwicakas opok cowokam mamemporkurumey. Caram Allah damos mamamjiomporkurumey.

¹⁵E daTuhan jak jirow aememama. Eras, ow bajorem asan akatas ara. Caram inimas mamporkurumey. Allah, e dajowow ipic akat juwas Paulus, bi binip umuton atetamef. E Paulus masirin, inim atakamam surat car aeapomtamfan.

¹⁶Aramat ipicam inim atakam cowok e asurat takas aeapomama. E wun aeapomamar atakam, bare amannakut ara. E jen owam, e mamkawi fak opok owam, e atakam jen desen ajimes. Wunam arop atakam aootawmes. Inimas e ow asan pwicaknakut aemapmes.

¹⁷Dojowow akatonokom. Car e atawmin atakam camsom. Inimas ara, caram pimicima. Car e jirmec ji bwe opok ow e atot botas mamkawiasin. Caram e Yesus Kristus mamkawi fak, bakorompimasin.

¹⁸Yesus Kristus daTuhan, bare dabajortew ipic ara. Caram e atetamamar asan akat momom, kayimin mamkakayimawarey. Caram aramat ipic aemamaras bapor, kayimin mamkakayimawarey. Bare, wow, ow aramat ipic basicimkurumces. Aram aramat ipic baatamsicimkurumawarces.