Read Central Asmat 1 YOHANES 1 Bible Online

1 YOHANES 1 - Central Asmat bible

1 YOHANES 1

¹Jipic juwas “Atakam” aememef. Awames surat e ipic atakam ara. Aramat ipic jiwnenak atatamamar ipic ara. Aram ametnak aatamememawiri. Wowam awamec. Daram e aramat ipic atakam atawefas jen ajifom. Daram aramat ipic bi aporfom. Daram aramat ipic manmok atiwfom. E damam ban akurumfom.

²E aramat ipic, e batamemawaras jiwnenak atatamamar ipic ara. Aram, daricipic Allah, cowkon aatamemapawiris. Allaham e aramat ipic umuton aporomtamforow. Daram abi aporfom. Inimas dar e aramat ipic aemefas, atemen aatamamom. Daram, eras, atakam, car aotawmenom.

³Dar, daricipic Allaham, atiw Yesus Kristusam, damos aamjiomamom. Daram damos car mamjiom akat ara. Inimas e aporfomasam, e jen ajifomasam, atakam car aotawmenom.

⁴Daram jak akatnakut momomji. Inimas ara, dar a atakam, surat, car aemtamamenom.

⁵Bare, Allah atiw, a atakam aotawforow. Dar masirin, a atakamam car aotawmenom. A atakam inim ara: Allah sere ara. Aramat ipic, bare jiwic opok cowok.

⁶Dar atakam aotawtotorcomnew, “Dor Allahcin damos aamjiomamom,” inim aetotorcomnew, e nat, dar jiwicas jipu aemcomnew, bare dar suw atakam atawtotorcomom. Daram e atakamnak ji bwe opok ara.

⁷Allah sereas aman aemapma. Daram e sereas jipu aemcomnew, dar daramaman damos aamjiomcomom. Wunam, e atiw Yesus ares, e dadosa takas akokoromosomtamawarcemarow.

⁸Dar atakam aotawtotorcomnew, “Dor dosa bwem nomsom opok,” inim aetotorcomnew, dar tot darma aotcomom. Daram atakamnak opok ara.

⁹Allah e atayi aeefas jipu aemcema. Aram tarowat ipic ara. Inimas dar e aemfom dosa, atakam umuton e aramat ipic aotawcomnew, aramat ipic e aemfom dosa, binip ajiwosomcema. Aram e aemfom fasias takas akokoromosomtamcemarow.

¹⁰Dar atakam aotawtotorcomnew, “Dor dosa bwem opok,” inim aetotorcomnew, bare daram, “Allah suw ipic ara,” inim aecomom. Aratakamam e dajak aman opok.