Read Central Asmat 1 YOHANES 2 Bible Online

1 YOHANES 2 - Central Asmat bible

1 YOHANES 2

¹Tiperesa. Dor a surat car aemtamamin ara, car dosa bwemasin. Yesus Kristus nat, tarowat ipic ara. Dar dosa aemcomnew, aramat ipic janim daricipic aanimtamcemarow.

²Bare, dar dosa aemfom. E nat, Yesus Kristus e dadosa bemosomtam, damir aaftamforow. E damir aafefas, e dadosa cowok bemosomtamas opok. Er e asmat ow takasam adosa bemosomtamas ara.

³Dar Allah jirmec ji aemomnew, dar Allah namsom apormom ara.

⁴Ow atakam aotawtotorcesnew, “Allah nomsom,” inim aetotorcesnew, e nat, ar Allah jirmec ji bwe opok aemtotorcesnew, ar suw ow ara. Aram atakamnak amsom opok.

⁵Allah atakam ji aemes ow nat, Allah damosnak ajiomkurumames. Dar aratakam ji aemomnew, dar arow emeememfom apormom ara.

⁶Ow atakam aotawtotorcesnew, “Dor Allah cowkon aatamemapawarmin,” inim aetotorcesnew, aram e Yesus Kristus aemawirias jipu baemtotorces.

⁷Dojowow akatonokom. A car aemtamamin surat, ay jirmec atakam opok. Ar tarey jirmec ara. Ar e ametnak jen ajiawirukum jirmec cowok ara. E tarey jirmec bare, jen emcajifokom.

⁸E nat, a car aemtamamin surat, aram ay jirmec atakam ara. Bare, e jiwicas ajisosma. E sereas anakatam aseremtiwma. Dar e Kristus aemefasam, e aemamokomasam, inim apormom ara. Inimas dar e jirmec, atakamnak apormom ara.

⁹Ow atakam aotawtotorcesnew, “Dor e sereas aman emapmin,” inim aetotorcesnew, e nat, aram ajowow bifan afayomcesnew, e ow wowam jiwic aman aemapmes.

¹⁰Ajowow damos ajiomames ow, sereas aman aemapmes. Inimas ar, ow Kristus mamkawi bakorompim, bemapom opok aemames.

¹¹Ajowow bifan afayomames ow nat, jiwic aman aemapmes. Aram jiwic aman ajarmes. Amanmokam jiwic ara. Inimas ar e ajisosmes asan bapor opok aemes.

¹²Tiperesa. Allah e Kristus aemefas aporef ara. Inimas ar e cadosa emcakokoromosomef. Inimasam ara, dor a surat car aemtamamin.

¹³Ducura. Car e ametnak ewememawiri ipic camsom. Inimas dor a surat car aemtamamin. Ay owa. Car e Jursumec Ipic emcakumimosomfokom. Inimas dor a surat car aemtamamin.

¹⁴Tiperesa. Daricipic camsom. Inimas dor a surat car aemtamamin. Ducura. Car e ametnak ewememawiri ipic camsom. Inimas dor a surat car aemtamamin. Ay owa. Car jak fak ara. Allah atakamam e cajak aman awap. Caram e Jursumec Ipic emcakumimosomfokom. Inimas dor a surat car aemtamamin.

¹⁵Car awames capinmiam, awames capinmi pokam, damos bajiom arapok. Awames capinmias damos ajiomames ow, Allah damos bajiom opok aemames.

¹⁶Ow jak basinomas, bare awames capinmias ara. Ow pok manmok atiwmes, wunam e pok betewet bi binip awutnakut aceceremames. Eram awames capinmias ara. Owam arma atawsicimames. Eram awames capinmias ara. Eras takas e daricipic atetamamaras opok.

¹⁷A capinmi aanioscema. E asmat asinomames pokam aanioscema. Allah atakam ji bwe ow nat, jiwnenak aatamemawarcemes.

¹⁸Tiperesa. E Asepnak Jofay, bare sotop asisima. E Kristus Ajewew Ipicam aenawcema. Caram inim atakam jen emcajifokom. Wowam, Kristus jewew ow arke awapes. Dar inimas apormom masirin, e Asepnak Jofay, bare sotop apormom.

¹⁹E ow nat, da mamkawinak opok. Inimas aram bakan ajiemforow. E ow dar mamkawinak ayaw, ar dar cowkon aatamemapmom. E ow nat, bakan ajiemforow. Inimas e ow dar mamkawinak opok aporfom.

²⁰Kristus nat, e Roh Kudus car emcatetamtotorfan. Inimas caram takas e atakamnak camsom ara.

²¹Car e atakamnak camsom opok opok. Caram camsom. Atakamnakam, suw atakamam, awcawor opok apormokom ara. Inimas dor a atakam, surat car aemtamamin.

²²E suw ipic cam? Jipic cowok atakam, “E Yesus, e Kristus Ipic opok,” inim aema. Bare inim atakam atawmar ipic e suw ipic ara. E ipic Kristus Ajewew Ipic ara. Ar daricipicam, atiwam, jamnuk takas aotpemamar ara.

²³E Allah atiw aotpemames ow takas, e aricipicam mamkawi opok aemames. E atiw asicimames ow, e aricipicam ajamkawimes.

²⁴Car ara nat, e ametnak jen ajiawirukum atakam, e cajak aman inim baatamemaptotorcow. E ametnak jen ajiawirukum atakam, e cajak aman inim aatamemaptotorcownew, car atiwam, daricipicam, cowkon aatamemapawarcomokom.

²⁵Kristusam, inimas dar bwemtam, atayi aeforow. Ar jiwnenak dar batetam atayi aeforow.

²⁶Wun ow tot car aotporman. Inimas ara, dor inim atakam surat car aemtamamin.

²⁷E nat, Kristus e Roh Kudus car emetetamfan. E Roham e cajak aman aatamemapawarman. Inimas ara, kawey ow, atakam ca mamememtam arapok. Bare, e Roh e atakam takas car amememtamaman. E atakam amememtamamaras, atakamnak ara. Er suwas opok. Car e aratakam ji mameey. Caram Kristus cowkon aatamemapawarey.

²⁸Tiperesa. Bare, car Kristus cowkon aatamemapawarey. Inimas ara, aramat ipic ajisemcow, dar jak fak aememcomom. Aenawcow ara, dar abipu namke bakayemasin.

²⁹Car aramat ipic, tarowat ipic apormokom. E tarowatas aemames ow takasam Allah atiperes ara. Caram inimas apormokom.