Read Central Asmat 1 YOHANES 3 Bible Online

1 YOHANES 3 - Central Asmat bible

1 YOHANES 3

¹Jakaperey. Allah damos awutnakut ajiomforow. Inimas aramat ipic atakam aotawforow. “Car dotiperes ara.” Inim aeforow. Bare, dar atiperes araman. Awames capinmi ow nat, Allah amsom opok. Inimas ara, e ow daram amsom opok.

²Dojowow akatonokom. Dar wow Allah atiperes ara. E asep jofay aememcomas nat, dar baporkurum opok. Kristus ajisemcow, dar aramat ipic bi anakat, aporcomom. Inimas ara, daram aramat ipic cimin aememcomom. Dar inimas namsom ara.

³Inim atakam asicimames ow takas, ow tarowat aememportotorcemes— Kristus tarowat aememamar cimin ara.

⁴Dosa, bare Allah jirmec bopowas ara. Inimas dosa aemames ow, Allah jirmec aopowmes.

⁵Kristus nat, e dadosa bakokoromosomtam ajisef. Aram dosa opok ipic ara. Car inimas camsom.

⁶E Kristus cowkon aatamapawarmes ow, dosa bwemawar opok. E nat, e dosa aemawarmes ow, e aramat ipic biamnuk bwemamtew opokut aemfes. Aram aramat ipic amsom opok.

⁷Tiperesa. Ow tot ca bot arapok. Tarowatas aemawarmes ow, ow tarowat aememames. Aram Kristus tarowat cimin aememames.

⁸Iblis, dosa, ametnak ewemawiri. Inimas e dosa aemawarmes ow, Iblis arow ara. Allah atiw nat, e Iblis aemamaras bafakamtiwkurum ajisef.

⁹Allah, e abi binip, e atiperes takas atatamama. Inimas e ow, dosa bwememawar asan opok. Allah e ow aricipic ara. Inimas e ow dosa bwememawar asan opok.

¹⁰E tarowatas bwemawar opok ow takas, bare Allah atiperes opok. E ajowow damos bajiom opok owam, Allah atiperes opok. Inimas Allah atiperes aropas apormom ara. Iblis atiperesam aropas apormom ara.

¹¹Caram a atakam ametnak jen emcajiawirukum. “Daram damos ajamjiomawarmoc.” Inim atakam jen ajiawirukum.

¹²Daram e Kain aemefas cimin arapok. Ar e Jursumec Ipic ajipic aememef, wunam ar e arewec arma acatiwefen. E Kain nat, e arewec ucimas catiwef? Kain e aemawirias, bare jursumec ara. E arewec aemawirias nat, tarowat ara. Inimas Kain e arewec acatiwefen.

¹³Dojowow akatonokom. Inimas ara, awames capinmi ow, car bifan afayomcan, caram junum bwe arapok.

¹⁴Dar dajowow damos ajiomamom. Inimas dar e damiras bakan ajiosfom, wunam e jiwnenakas afiwfom, inim apormom ara. E damos bajiom opok ow nat, damir ow cimin aemapawarmes.

¹⁵Ajowow bifan afayomames ow, bare sanaw bwetiw ow cimin ara. Sanaw bwetiw owam, jiwnenak batamemawar opok. Car inimas camsom.

¹⁶Kristus damos ajiomforow. Inimas aram damir aaftamforow. Dar inimas apormom, wunam e damos bajiomas anakat apormom. Bare, daram inim damir e dajowow baftamji.

¹⁷Pok awut ow, e ajowow asan pwicak bemap aporcesnew, wunam ar e ow saw akat boworpor opok aemcesnew, aram damos Allah bajiom opok ara.

¹⁸Tiperesa. Dar damos bajiom, bweyof cowok arapok. Ewen picinam cowok arapok. Da nat, pok bwemji. Dar damos anakat bajiomji.

¹⁹Dar inimas aemamomnew, dar e atakamnak ajamkawimom apormom. Daram Allah bipu aememcom, dar jak fak aememcomom.

²⁰Dar e dajak aman, dosa aporcomnew, Allaham pok takas aporkurumama, inimas apormom ara. Aram amsom takas. Da nat, bapor opoknakap aemamom.

²¹Dojowow akatonokom. Dar e dajak aman, dosa opok aporcomnew, wunam Allah bipu aememcom, bare daram jak fak aememcomom.

²²Dar e ajirmec ji aecomnew, wunam arakatas jipu aemcomnew, Allah e janim aanimcomas takas atatamcemarow.

²³Allah jirmec ajirimamarow ara, “Car e dotiw mamsicimey. Caramaman damos mamamjiomawarey.” Allah inim jirmec ajirimamarow.

²⁴E Allah jirmec ji aemes ow, aramat ipic cowkon aatamapawarmes. Aramat ipicam e ow cowkon aatamapawarma. Ar e aRoh atetamtotorforow. Inimas dar Allah cowkon aatamapawarmom apormom ara.