Read Central Asmat 1 YOHANES 4 Bible Online

1 YOHANES 4 - Central Asmat bible

1 YOHANES 4

¹Dojowow akatonokom. Allah atakam botaw pir bwe ow, e capinmi takas emejisosfes. Inimas car e atakam takas basicim arapok. Ca nat, e atakam botaw ow batakamoworporey. E ow, Allah Roh epcomnew, Allah Roh epcom opoknew, batakamoworporey.

²Ow atakam atawcesnew, “Yesus Kristus asmat ipic ajaworemef,” inim aecesnew, bare e atakam e Allah Roh atetamef atakam aporcomokom. Inimas ara, car e atakamin atakamin, Allah Rohasnew, Allah Rohas opoknew, aporkurumcomokom.

³E nat, ow atakam atawcesnew, “Yesus Kristus asmat ipic bajaworem opok,” inim aecesnew, e atakam, e Allah Rohas opok aporcomokom. E atakam, e Kristus Jewew Ipicas ara. Caram, “E Kristus Jewew Ipic aenawcema,” inim atakam jen emcajifokom. Bare, wow e ipic awames capinmi awamec.

⁴Tiperesa. Car Allah arow ara. E ca cowkon aatamapawarman ipic, bare faknakut ara. E nat, wun ipic, awames capinmias ajamkawimes ow, cowkon aatamapawarma. E ipic, bare fak opok inim. Inimas car e Allah atakam botaw pir bwe ow akumimosomfokom.

⁵E ow awames capinmias ara. Inimas aram awames capinmias atakam aotawmes. Awames capinmias ajamkawimes owam, aratakam jen ajimes.

⁶Da nat, Allah arow ara. E Allah amsom owam daratakam jen ajimes. Wun ow nat, Allah arow opok. E ow, daratakam jen baji opok aemamarowos. Inimas ara, e atakamnak atatamamar Roh, aropas apormom. E suw atakam atatamamar datam, aropas apormom.

⁷Dojowow akatonokom. Allah ow damos bajiom binip atatamama. Inimas daram damos aamjiomamoc. E damos ajiomames ow, bare Allah atiperes ara. Aram Allah amsom ow ara.

⁸Allah, ow damos batamjiomawar ipic ara. Inimas e damos bajiom opok ow, Allah amsom opok ow ara.

⁹Allah, e atiw cowokut, awames capinmi atewnemef. Ar e atiw, jiwnenak da batatam atewnemef. Inimas aemef ara, Allah e damos dar ajiomamarow, aporomtamforow.

¹⁰E Allah damos ajiomfomas, bare damos anakat opok. E nat, Allah damos ajiomforow. Ar masirin, e atiw atewnemef. E atiwam, e dadosa bemosomtam, damir aaftamforow. Bare, e Allah aemefas damos anakat ara.

¹¹Dojowow akatonokom. Allah, inim damos awutnakut, dar ajiomforow. Bare, daram damos mamjiomji.

¹²E Allah bi aporfes ow, bare opok cowok. E nat, dar damos aamjiomamomnew, bare Allah dar cowkon aatamapawarmarow. Dar masirin, damosnak ajiomkurumamom.

¹³Allaham e aRoh dar atatamtotorforow. Inimas dar Allah cowkon aatamapawarmom apormom ara. Allaham dar cowkon aatamapawarmarow apormom ara.

¹⁴Daricipic, e atiw, asmat ow bajortew ipic memem, atewnemef. Dar inimas aporfom. Daram inimas atemen aatamfom.

¹⁵Yesus, Allah atiw ara. Ow inim atakam asicimamesnew, Allaham e ow cowkon aatamemapawarma. E owam Allah cowkon aatamemapawarmes.

¹⁶Inimas e Allah damos ajiemamarow apormom ara. Daram e atakam asicimamom. Bare, Allah damos batamjiomawar ipic ara. E damos ajiomawarmes ow, Allah cowkon aatamemapawarmes. Allaham e ow cowkon aatamemapawarma.

¹⁷Daram damosnak ajiomkurumcomnew, daram e Allah asmat dosa atakam asakamtiwkurumcow jofay, jak fak aememcomom. Dar awames capinmi aememamom ara, dar Kristus aemamaras cimin aemamom. Inimas e jofay, dar jak fak aememcomom araman.

¹⁸E damos ajiomames ow, omar opok aememcemes. Omar aememames ow, e siksa ememces jofay; bi binip aceceremames. Inimas e damosnak ajiomkurumames ow, omar bwememem asan opok. E omar aememames ow, damosnak bajiomkurum opok aemames.

¹⁹Allah damos bap ajiomforow. Inimas daram damos asep ajiomamom.

²⁰Ow inim atakam atawmesnew, “Dor Allah damos ajiomamin,” inim aetotormesnew, e nat, e ow e ajowow bifan afayomamesnew, ar suw ow ara. Bare, e ow e ajowow bi apormes. E nat, ar Allah bi bapor opokut. Inimas e ow ajowow damos bajiom opok aemamesnew, aram Allah damos bwemjiom asan opok.

²¹Allaham inim jirmec ajirimforow. “E Allah damos ajiomames ow, e ajowowam damos bajiomces.” Inim aeforow.