Read Central Asmat 1 YOHANES 5 Bible Online

1 YOHANES 5 - Central Asmat bible

1 YOHANES 5

¹“E Yesus, e Kristus Ipic ara,” inim atakam asicimames ow, bare, Allah atiperes ara. Aricipic damos ajiomames ow, atiperes takasam damos ajiomames.

²Dar Allah damos ajiomamomnew, wunam ajirmec ji aemomnew, bare dar e atiperesam damos ajiomamom apormom ara.

³Allah jirmec ji aemomnew, dar Allah damos ajiomamom. Allah atiperesam awames capinmias akumimosomawarmes. Inimas e Allah jirmec ji bwe, bare juturas opok. Dar, “E Yesus, e Kristus Ipic ara,” inim atakam asicimamom. Inimas dar awames capinmias akumimosomamom.

⁵Awames capinmias akumimosomames ow, ucim owaram? “E Yesus, Allah atiw ara,” inim atakam asicimames ow, awames capinmias akumimosomames ow ara.

⁶Bare, e Yesus Kristus aenawef. Aenawef masirin, wun ipic, aramat ipic bwi abwimef. E Yesus Kristusam damir aafef. Aresam airirineyef. E aramat ipic aenawef nat, ar bwi babwi cowok opok. Aresam airirineyef. Bare, e Allah Roh, atakamnak ipic ara. Inimas ar inim atakam atemen aatamef.

⁷Ownew, poknew, mamincop ajiwar, e Yesus Kristus aemefas anakat aporomtamames.

⁸E wun cowok, bare e Allah Roh ara. E wun cowok masirin, e bwi ara. E wun cowok masirin, e es ara. E mamincop takas, e Yesus Kristus aemefas, anakat aporomtamames.

⁹Dar asmat ow atemen aatamamesas asicimcomom. E wun asmat atemen nat, atakamnak opok. E nat, e Allah atemen aatamamaras, atakamnak cowok ara. Bare, aramat ipic e atiw aemefas, atemen aatamef.

¹⁰Da wun ow, e Allah atiw asicimamom. E Allah atemen aatamef atakamam e dajak aman awap. E Allah atemen aatamefas basicim opok ow nat, “E Allah suw ipic ara,” inim aemes. Allah e atiw aemefas atemen aatamef. E ow nat, e atemen basicim opok aemfes.

¹¹E Allaham inim atemen atakam aatamforow. “Dor jiwnenak car emcatatamfin. E dotiw ajamkawimes ow jiwnenak aatamemawarcemes.

¹²E dotiw epcom ow, e jiwnenak epcom ara. E dotiw epcom opok ow nat, e jiwnenak epcom opok ara.” Inim aeforow.

¹³Bare. Car Allah atiw asicimamokom ow, jiwnenak aatamemawarcomokom. Dor, car inimas baporkurum akat ara. Inimas dor a surat car aemtamamin.

¹⁴Dar, e Allah da bwemtamjias janim e aramat ipic aanimcom, ar e janim aanimcomas takas jen ajicemarow. Dar e aramat ipic janim aanimcomas takas jen baji aporcomnew, ar e janim aanimcomas aemtamcemarow apormom ara. Inimas dar e aramat ipic bipu ememcom, jak fak aememcomom.

¹⁶Ow, wun dosa aemces, aram damir baf opok aemcemes. Ow, e ajowow e damir baf opokas dosa bwem aporces, ar janim Allah baanimces. Allah masirin, jiwneas e dosa ow atatamcema. E nat, ow e wun dosa aemces, aram damir aafcemes. Do nat, ow, inim dosa bwem ow, janim Allah manimtam, bare inim atakam opok.

¹⁷E fasias takas, bare dosa ara. E nat, ow e wun dosa aemces, aram damir baf opok aemcemes.

¹⁸Bare, Allah atiperes, dosa bwemawar opok apormom. Allah atiw nat, e ow cir asiomama. Inimas e Jursumec Ipic, e ow bwemjurusum asan opok.

¹⁹Dar Allah atiperes ara. Daram inimas apormom. E nat, e Jursumec Ipic, awames capinmias takas aomomama. Daram inimas apormom.

²⁰Bare, Allah atiw emcaenawef apormom ara. Aram bi binip umuton emcatetamforow. Inimas dar e Allah anakat namsom ara. Daram e Allah anakat cowkon aatamapawarmom. Bare, dar e atiw Yesus Kristus, cowkon aatamapawarmom. Aramat ipic e Allah anakat ara. Aram jiwnenak atatamamar ipic ara.

²¹Tiperesa. Car e Allah anakat opokas basicim arapok.