Read Central Asmat 2 YOHANES 1 Bible Online

2 YOHANES 1 - Central Asmat bible

2 YOHANES 1

¹Enew. Dor e ketua ipic ara. Dor awames surat oram, otiperesam, aemtamamin. Bare, Allah or aeremtewfan. Doram damos car ajiomamin. E nat, dorop opok. E atakamnak amsom ow takasam damos car ajiomaman.

²E atakamnak e dajak aman aemapmarow. E atakamnakam dar cowkon aatamemapawarcemarow. Inimas dor damos car ajiomamin.

³Daricipic Allaham, atiw Yesus Kristusam, asan akat dar atatamcemarowos. Aram serow dar ajiomcemarowos. Aram jak akat atatamcemarowos. Ar eras awapom atakamnak namsom owam, awapom damos aamjiomamom owam, aemcemarowos.

⁴Daricipic Allah e atakamnak ji bweawar, jirmec ajirimforow. Inimas dor e wun otiperes, e atakamnak ji bwe aporof, doram jak akat aememof.

⁵Enew. Dor janim or manimpor. Dar takas damos aamjiomamoc. Eras ay jirmec opok. A surat or aemtamamin jirmec, bare e ametnak jen ajiawirum jirmec cowok ara.

⁶Damos ajiomames ow, Allah jirmec ji aeawarmes. Allaham, “Car damos mamjiomawarey,” inim jirmec ajirimef. Caram ametnak e jirmec jen ajiawirukum.

⁷Tot bot ow arke, e capinmi takas emcajisosfes. E owam, “Yesus Kristus asmat ipic ajaworemef,” inim atakam botaw opok aemes. Inim ow tot bot ow ara. Aram Kristus ajewew ow ara.

⁸Caram pimicima. E jec awuawirukumas bapakapiosasin. E Allah car batatamji aememamaras takas, mamtewetkurumey.

⁹Ow, e Kristus atakam aotawefas aofeces, wunam e atakam ji batameawar opok aemces, bare e ow Allah mamkawi opok. E atakam ji aatameawarmes ow nat, Allah ajamkawimes. Aram Allah atiw ajamkawimes.

¹⁰Ow car aapenawces, wunam inim atakam batowotnaw opok aemces, caram e ow cem batowomiw arapok. Caram e ow “selamat” baji arapok.

¹¹E ow, pwicakas bwem ow ara. Inimas ow e ow “selamat” ajices, aram e ow e pwicakas akac aemcemes.

¹²Dor wun atakam arke ca botaw aemin. E nat, dor e atakam, surat bweapom pwicak. Dor jaki e cacapinmi dorma bapenaw, bare akat ara. Dar atakam bipu mamtaw akat ara. Inimas dar jak akat aememcomom.

¹³Bare, Allaham e oromwes aeremtewef. E oromwes atiperesam selamat atakam car aotawmes.