Read Central Asmat 3 YOHANES 1 Bible Online

3 YOHANES 1 - Central Asmat bible

3 YOHANES 1

¹Gayus. Dojowow ipic akatenem. Dor e ketua ipic ara. Dor awames surat or aemtamamin. Doram damosnak or ajiomamin.

²Dojowow ipic akatenem. Dor, Allah asan akatam, dam tarowatam, o batetamkurum, janim aanimamin— e Yesus ajamkawimem akatipic inim jipua.

³Wun Yesus ajamkawimes ow aapenawfes. Aram atakam aotawfenes. “E Gayus tarowatnak aememama. Aram e atakamnak ajamkawiawarma.” Inim aefenes. Inim atakam jen ajiof ara, doram jak akat aememof.

⁴Ow atakam dor aotawcenes, “E otiperes atakamnak ajamkawiawarmes,” inim aecenes, bare jak akatnakut aememcimin. E wun atakam takas, jak akat kanimnakap inim aemapomaman.

⁵Dojowow ipic akatenem. Or e wun Yesus ajamkawimes ow omsom opok. E nat, e ow e cacapinmi ajinawmes, oram pok e ow afafaytamamem. Inimas or tarowat ipic ara.

⁶E owam, atakam, e arasan Yesus basicim barewsi ow aotawfes. “E Gayus damos awut ajiomamarow.” Inim aefes. E owam baysos aememces, oram e ow e bowsec memenas mamtetamey— e Allah akat apormaras jipua.

⁷E ow Kristus kerja bwemtam ajisosfes. Aram e Kristus basicim opok ow, apok batan opok aemes.

⁸Inimas dar pok e ow batatamji. Dar inimas aemcomnew, dar e ow e atakamnak botaw akac aemcomom.

⁹Bare, dor surat e orasan Yesus basicim barewsi ow atiwirimof. E nat, e Diotrefes, ow awut memem jak aserememama. Inimas ar daratakam ji bwe opok aemama.

¹⁰E ipic dar atakam wun ow aotawma. E atakam pwicak ara. Eram atakamnak opok. E pwicakas aemamar nat, e cowok opok. Aram e Yesus mamkawi ow e acem batowomiw opok. Aram wun ow e ow e arop cem batowomiwam acuw aatma. Owam e ow e arop cem batowomiw aememamesnew, ar inimas bwem ow, e Yesus basicim barewsi ow asan, aotewerisimama. Inimas ara, aenawcey ara, dor e aemamaras, atakam umuton aotawcimin.

¹¹Dojowow ipic akatenem. Or e jursumec ow e aemamesas jipu jamemcem. E nat, e akat ow e aemamesas jipu mamemey. E akatas aemawarmes ow, Allah atakam jipu aemames. E jursumec aemawarmes ow nat, Allah amsom opok.

¹²Ow takas atawmes, “Demetrius jipic akat ara,” inim aemes. E aramat ipic e atakamnak ji aema. Inimas, ow e ipic akat apormes. Daram, e aramat ipic akat, inim atakam atawmom. Caram e daratakam atawmomas atakamnak apormokom.

¹³Dor wun atakam arke o botaw aemin. E nat, dor e atakam surat bweapom pwicak.

¹⁴Dor jakasan basarimenaw at aetiwmin. Dar masirin, atakam bipu aamtawcomom.

¹⁵Allah, jak akat, or batetamcan. E arasan dajowow selamat atakam or aotawmenes. Oram selamat atakam erasan dajowow aporsipor mamotawtotortamcan.