Read Central Asmat BAPOROMTAMAS 1 Bible Online

BAPOROMTAMAS 1 - Central Asmat bible

BAPOROMTAMAS 1

¹A surat atakam, e Yesus Kristus aporomtamefas ara. Bare, Allah, e akerja bwemtam ow, e sarim aenawcowas, atakam jen baji akat arawen. Inimas aramat ipic a atakam e Yesus Kristus aotawef. E Yesus Kristus masirin, e amalaikat, Yohanespu atewnemef. E malaikatam, e Yesus Kristus aporomtamefas, atakam e Yohanes aotawef.

²E Yohanesam, e aporefas takas, atakam aotawef. A atakam e Allah aotawefas ara. A atakamam, e Yesus Kristus atemen aatamefas ara.

³A atakam, e asep jofay aenawcowas ara. E aenawcowas, bare sotop. Inimas, ow a atakam baca aemces, asan akat aemapcemes. Owam a buku atakam jen ajices, wunam a atakam ji aeces, asan akat aemapcemes.

⁴Bare, dor Yohanes ara. Dor a atakam, e car Asia capinmi Yesus basicim ajerewsiapmokom samat tujuh ajiwar ow, aotawmin: Wow Allah awamec. Ametnakam ara, aramat ipic aatamememawiri. Asep jofayam, aramat ipic aatamememawarcema. Roh tujuh ajiwaram e aramat ipic raja fa bemap asanpu aememames. Bare, e Yesus Kristus e atemen batam tarowat ipic ara. Aramat ipic e bapnak aojaworsitef ipic ara. Aram awames capinmi raja ow jirmec bajirim ipic ara. Bare, e Allaham, e Roham, e Yesus Kristusam, asan akat car baomcan. Aram jak akat car batetamcan. Bare, e Yesus Kristus damos ajiomamarow. Aram damir aaftamforow. Inimas ar e dadosa asurumtamforow.

⁶Aram dar aomomkurumforow, wunam ar dar e aricipic atakam mamtaw tugas ow atawemforow. E aricipicam, bare Allah ara. Bare, ow “Yesus Kristus akatnakut ara,” inim baatamjiawarces. Aramat ipicam faknakut baatamememawarcow. A atakam, bare atakamnak ara.

⁷Caram atakam jen pajiey. Aramat ipic e onam op jak aman aneycema. Ow takasam aramat ipic bi aporcemes. E aramat ipic amitfes owam, e aramat ipic bi aporcemes. Awames capinmi samatin samatin takasam, e aramat ipic omar aecemes. Inimas aram bwec abweccemes. Bare, inim cowok baemces. A atakam, bare atakamnak ara.

⁸Bare, e Tuhan Allah atakam, “Dor e bapnak ipic ara. Doram e asepnak aememcey ipic ara. Dor wow awamcey. Ametnakam ara, dor aatamememawiru. Asep jofayam aatamememawarcimin. Dor e faknakut ipic ara.” Inim aema.

⁹Dor Yohanes ara. Doram cajowow ipic ara. Doram, caram, Yesus akac ajamkawimom. Inimas ow dar ajurusumamarowos. Daram, e Yesus Pemerintah Asan, akac aemapcomom. Aramat ipicam, jak jirow, doram, caram, atatamamarow. Bare, dor e Allah atakam acacapiomof. Doram e Yesus atemen aatamefas aotawof. Inimas ara, ow ban akimomfenes. Aram e wōw juwas Patmos atowomosfenes. Dor masirin, erasan aemapawiru.

¹⁰Bare, Hari Tuhan aemapof ara, e Roh Kudus, e dobi binip aomomkurumfan. Doram e dobakpu, atakam awut jen ajiof. E atakam, bare fwi cimin ara.

¹¹E atakam, “E apormemas, buku aman mameapomey. E buku masirin, e Yesus basicim ajarewsimes ow asan tujuh ajiwar, mamtiwirimtamey. E asan, bare Efesus ara. Simirna ara. Pergamus ara. Tiatira ara. Sardis ara. Filadelfia ara. Laodikia ara. Inima.” Inim atakam jen ajiof.

¹²Dor masirin, e atakam dor aotawfan ipic bi bapor, asamanam ajiemof. Asamanam ajiemof masirin, dor emas pelita batewapom asan tujuh ajiwar aporof.

¹³Dor, e pelita batewapom asan e wasec, jipic cowok aememef aporof. E ipic asmat ipic bi awcawor ara. E aramat ipic, baju jirow atamwiemef. E baju e aramat ipic bwey ajiwar ara. Aramat ipicam, emas picin, e awu ajikapomef.

¹⁴E akus finam, domba fin fwesak inim ara. E finam salju inim fwesaknakut ara. E amanmokam jismak komen inim awcawor aaptatarayef.

¹⁵E abweyam, ow jismak aman atewapomfes tembaga awcawor ara. E aratakamam, bwi ajururupuef inim awcawor ara.

¹⁶Aramat ipicam, bayar tujuh ajiwar, e ban bo atowomef. E abweyofam owec parang benamnuk aemapef. E abiam, serenakut, jomenet inim, aturumapomef.

¹⁷Dor e aramat ipic bi aporof ara, e abweypu bi fop aneyjiapof. Eras damir aafof inim awcawor ara. Aramat ipic masirin, e ban bo e dodam ton atatiwfan. Wunam, atakam aotawfan. “Omar arapok. Dor e bapnak aememof ipic ara. Doram e asepnak aememcimin ipic ara.

¹⁸Doram e tetakay ipic ara. Dor damir aafof. E nat, jakaperey! Dor jiwne aatamemawarmin. Doram ow bacatiw fakas aomomamin. Doram e damir ow bemap asan, doramat.

¹⁹Inimas ara, e apormemas, surat mameapomey. E wow aemamarasam, e asep jofay aenawcowasam, surat mameapomey.

²⁰Bare, or e doban bo atowomamin bayar tujuh ajiwar apormem. Dor e bayaram, e emas pelita batewapom asan tujuh ajiwaram, e amannakut atakam or aotawmin. E bayar tujuh ajiwar, e do basicim ajarewsimes ow asan tujuh ajiwar amalaikat awcawor ara. E pelita batewapom asan tujuh ajiwar masirin, e do basicim ajarewsiapmes ow asan tujuh ajiwar awcawor ara.”