Read Central Asmat BAPOROMTAMAS 10 Bible Online

BAPOROMTAMAS 10 - Central Asmat bible

BAPOROMTAMAS 10

¹Bare, dor wun faknakut malaikat cowok, e onam op akorneyef aporof. Aram jak fwesak, pakaian cimin, ajimneyef. Jīrām e akus fumi aamwiricopef. E abiam jo apan inim aseremneyef. Akamtaram jismak komen jirow inim awcawor ara.

²Aram e aban, ajaportomomef surat kanim atowomef. E suratam emcapaparamomef. Aramat ipic e bo bwey e iwnim bwi asowemef, wunam e tamo bwey e capinmi asowemef.

³Aram atakam awutnakut afakaytawef— e singa afakaytawcemes atakam cimin ara. Atakam afakaytawef masirin, e wir tujuh ajiwaram akac ajufes. E ajufesas atakamam ara.

⁴E wir tujuh ajiwar atakam atawfes masirin, dor e atakam surat bweapom aememof. Do nat, onam op atakam jen ajiof. “E wir tujuh ajiwar atawmes atakam, mamcukumopey. E atakam, surat bweapom arapok.” Inim aeef.

⁵Bare, e iwnim bwiam, capinmiam, asowemef aporof malaikat, e aban bo op ajoromtometemef.

⁶E malaikat, Allah e jiwnenak batamemawar ipic ara, inim aporef. Aram Allah, e onam opam, e capinmiam, e jicupum bwiam, e pok takasam, inim akenemapomef ipic aporef. Inimas ar, Allah juwas ajief, wunam atayi faknakut aeef, “Allah, e aemcowas bosimwenem opok.

⁷Aenawcow jofay, e malaikat ketujuh e afwi aamcema. Allah masirin, e amannakut atakam asakamtiwefas aemkurumcema. Bap ara, ar e asakamtiwef atakam, e akerja bwemtam ow aotawef. E ow, e Allah atakam botaw ow ara.” E malaikat inim aeef.

⁸Bare, e bap jen ajiof onam op atakam, jen aojiof. “Oram e malaikatpu jisosey— e iwnim bwiam, capinmiam, asowemamar malaikata. Or masirin, e ban atowomamar ajaportomamesef surat kanim batewey. E suratam emcapaparamomef.” Inim aeef.

⁹Bare, dor e malaikatpu aapenof, wunam, atakam aotawof. “A ajaportomamesef surat kanim do tetamcan.” Inim aeof. Aramat ipic masirin, atakam dor aotawfan. “A surat batewey, wunam memeney. A surat masirin, e ojak aman jirsiki aemcema. E nat, e obweyof aman, e surat emor bwi fomes cimin aemcema.” Inim aeef.

¹⁰Dor masirin, e malaikat e ban atowomef surat atewof. Doram e surat aemenof. E surat e dobweyof aman emor bwi fomes cimin aemef. E nat, aemenof ara, e surat e dojak aman jirsiki aemef.

¹¹Aramat ipic masirin, “Allah, ow samat arke, atakam atawma. Ar capinmi arke owam, aporsipor atakam ow arkeam, raja ow arkeam, atakam atawma. Bare, or e atawmar atakam kawey ow mamotawey.” Inim aeef.