Read Central Asmat BAPOROMTAMAS 11 Bible Online

BAPOROMTAMAS 11 - Central Asmat bible

BAPOROMTAMAS 11

¹Bare, Tuhan fir atetamfan. E fir, meter awcawor ara. Aram atakam aotawfan. “Or e Allah cem mamapeney. E cemam, e pok Allah jis bafamtam jowseam tamat mamtamey. E erasan Allah basicim owam mamjucucumirey.

²E nat, e cemsan tamat batam arapok. Allah, e cemsan, e Allah amsom opok ow atetamcema. E ow, e akatnakut kota, pir empat puluh dua ajiwar ajurusumcemes. Inimas or e cemsan tamat batam arapok.

³Doram fakas e doratemen batam ipic jamnuk atetamcimin. E ipic jamnuk jak pwicak aememcemes, wunam kus junuk aakcemes. Ar masirin, bar 1.260 ajiwar doratakam aotawcemes.” Inim aeef.

⁴E ipic jamnuk e Tuhan bipu aememames saitun os jamnuk ara. Aram e Tuhan bipu aememames lampu asan jamnuk ara. Bare, Tuhan a capinmi aramat ara.

⁵Ow e ipic jamnuk bajurusum aememces, jismak e ipic jamnuk biyof afiscema. E jismak e ajewew ow afamkurumcema. Bare, e ipic jamnuk bajurusum ememces ow, e jismak damir aafcemes.

⁶E jipic jamnukam, e onam op te baneyasin fakas aomomames. Te, e ipic jamnuk e Allah atakam aotawces bar 1.260 ajiwar, baneyasin. Aram bwi, es baworomsem fakas aomomames. Aram, a capinmi ow, aterin aterin takas bwem fakas aomomames. Inimas, ar akat aporces ara, ar ow ater bwem ara.

⁷E nat, ar e atemen aatamkurumces, e kakunakut jip akunawcow binatang, owec e ipic jamnuk aamocema. Aram e ipic jamnuk akumimosomcema, wunam acatiwcema.

⁸E sumu ipic jamnuk masirin, e kota awut e jalanan awut aemamescemes. Ametnak ara, ow, e ipic jamnuk aTuhan, e kota cowok, salib os op acatopomfes ara. Atakam baposomtew ara, e kota juwas Sodom ara. Wun juwasam Mesir ara.

⁹E ow samat takas e wun owam, e aporsipor atakam takas e wun owam, e capinmiin capinmiin takas e wun owam, manmok e sumu ipic jamnuk asirimcemes. Ar bar tiga setengah ajiwar manmok e sumu ipic jamnuk asirimcemes. Aram ow e sumu ipic jamnuk se bawuapom acuw aatcemes.

¹⁰Ametnak ara, e Allah atakam botaw ipic jamnuk awames capinmi ow ajurusumfes. Inimas awames capinmi bemap ow, e ipic jamnuk damir aporces, ar jak akat aemapcemes. Aram si asicemes. Pokam juw auwumcicirimamatcemes. Ar e Allah atakam botaw ipic jamnuk, a capinmi ow ajurusumfes aporcemes.

¹¹Bare, e ipic jamnuk, bar tiga setengah ajiwar damir aafcemes. Allah masirin, joses e sumu ipic jamnuk aotetamcema. E ipic jamnuk masirin, bwey aositemcemes. Ow e ipic jamnuk aporces, aram omar awutnakut aecemes.

¹²Onam op atakamam afakaynemcema. “Dey. Arasan akunawey.” Inim aecema. E ipic jamnukam inim atakam jen ajicemes. Ar masirin, jak fwesak aman onam op aaptometcemes. E jewew owam e ipic jamnuk manmok asirimcemes.

¹³E jofay cowokam, ajow awutnakut asimcema. E kota sepersepuluh ajiwar daniwis aamamescema. Ow tujuh ribu ajiwaram damir e ajow aman aafcemes. E damir opok ow masirin, omar awutnakut aecemes. Aram, e onam op Allah asicimcemes.

¹⁴E asan pwicaknakutas kedua bare, ajisoscema. E asan pwicaknakutas ketiga masirin, asarimenawcema.

¹⁵Bare, e malaikat ketujuh e afwi aamef. Onam op ow masirin, atakam awutnakut afakaytawfes. “E daTuhanam, e Aeremtewef Ipicam, awames capinmi momomkurum fakas atowopmes. Aram a capinmi aatamomomkurumawarcemes.” Inim aefes.

¹⁶Bare, e ownucur ow dua puluh empat ajiwar, e araja fa bemap asan aemaptotorfes. Ar Allah bipu aemaptotorfes. Aram bi fop aneyjiaptotorfes, wunam Allah asicimtotorfes.

¹⁷Aram atakam aotawfes: “Tuhan Allah faknakutenem! Wow awamcem. Ametnakam aatamememawirim. Or e ofakas awutnakut atowoperem, wunam awames capinmi aomomkurumerem. Inimas dar terima kasih atakam or aotawmenom.

¹⁸E capinmiin capinmiin ow, jak amop aememfes. E nat, oram jak amop aememfem. E damir aafes ow siksa bwem atakam basakamtiw jofayam, bare emeenawor. E okerja bwemtam owam, e oratakam botaw owam, e orowam, e or basicim ow awutam kanimam, e aemfesas jipu asan akat batetam jofay emeenawor. Wun ow awames capinmi daniwis aemapomfes. Bare e ow, adaniwis memames jofayam emeenawor.” Inim aefes.

¹⁹Allah, e aronam op cem jimasap apajimef. Ow masirin, e Allah e asmat ow atayi aeefas surat epcom peti, e cem aman aporfes. Bweram apaparayef. Owam atakam atawfes. Wiram jururu aeef. Ajowam asimef. Te awutnakutam, jufu es ek jiwi arkenakutam, akac aneyef.