Read Central Asmat BAPOROMTAMAS 12 Bible Online

BAPOROMTAMAS 12 - Central Asmat bible

BAPOROMTAMAS 12

¹Bare, ow, junum bweas awut e onam op aporfes. E junum bweas, cowoc cowok ara. E cowoc apakaian, bare e jopok ara. Aram e pir op aememef. Aram kus bamapom akatipicas ajimapef. E kus bemapom akatipicas, bare bayar dua belas ajiwar epcom ara.

²E cowocam jak asuapef. Aram ju ajitimef. Inimas dam asesak acuwef, wunam jen ajief.

³Bare, ow, wun junum bweas, e onam op aporfes. E junum bweas, esakam ew awut cimin ara. E ew, kus tujuh ajiwar epcom. Aram kus wac sepuluh ajiwar epcom. E kus aporsiporam kus bamapom akatipicas ajimaptotorfes.

⁴E ew ep awawarayef. Inimas ar e onam op bayar sepertiga ajiwar, e capinmi akokomnemef. E ewam e jiwi bapeap aemapef cowoc bipu aememef. Ar e ajispetiwcow jiwi basarimcan aememef.

⁵Bare, e cowoc ower jiwi ajispetiwef. E jiwi awut aememcow, ar besi onok pok cimin atowomcema, wunam e capinmiin capinmiin ow takas jirmec ajirimcema. E nat, jipic cowok, e jiwi asarimtopomtewef, wunam Allahpu atowotometef. Aram e jiwi, e Allah raja fa bemap asanpu atowotometef.

⁶Bare, e cowoc, cem opok asan, omar ajisosef— er Allah e cowoc bap akenemapomtamef asan ara. E asan e Allah manmok e cowoc batiw isi 1.260 ajiwar asan ara.

⁷Bare, e onam op, owec aamofes. Mikaelam, e amalaikat arkeam, e ew owec aamofes. E ewam, e amalaikat arkeam, amatam pomatam e Mikael aemfes.

⁸E nat, e ewam, e amalaikatam, bare kumit ara. Inimas ar e onam op bwemoemap asan opok.

⁹Mikaelam, e amalaikatam, e ew awut, e cesen ajiwimfes. E ew, bare e tarey amer ara. Ar juwas Iblis ara. Wun juwas masirin, Setan ara. Ar e capinmi ow takas tot aotmar ipic ara. Bare, ow, e ewam, e amalaikat takasam, e capinmi ajumnemfes.

¹⁰Bare, dor e onam op atakam awut jen ajiof. “Jipic cowok e darAllah bipu aememawiri. E ipic jokam, iramam, e dajowow salah atakam atawawiri. Ow nat, e ipic ajumnemames. Inimas wow ara, Allah e ajewew ow akumimosomama. Wowam aramat ipic e afakas aporomtamama. Wowam aramat ipic aPemerintah aenawma. Wowam e Allah Aeremtewef Ipic atakam faknakut atawma.

¹¹E Domba Jiwi, e ares airimnemef. Owam, e Domba Jiwi aemefas, atemen aatamfes. Inimas ow, e ow salah atakam atawawiri ipic, akumimosomames. E owam damir baf omar opok aemames.

¹²Onam op poka! Onam op owa! Ca jak akat ememey. Cenes capinmia! Bare, asan pwicaknakut aemapcemem. Jicupum bwia! Oram asan pwicaknakut aemsecemem. E Iblis carasan aneyma.” Inim atakam jen ajiof.

¹³Bare, e ew, Mikael, ar cenes capinmi ajumnemef aporef ara, ar e ower jiwi ajispetiwef cowoc amirimef.

¹⁴Allah masirin, waraw awut joromak jamnuk, e cowoc atetamef. Er e cowoc, cem opok asan bapiosas ara. E asan e Allah e cowoc akenemapomtamef asan ara. Allah, tahun tiga setengah ajiwar, amos e cowoc batetam aememef. Erasan ara, e amer e cowoc bwemjurusum asan opok.

¹⁵E ameram bwi awut e abweyof aokomisimef. Ar e bwi e cowocpu aokomisimef. E bwi, jo bwi awutnakut cimin ara. E bwi, e cowoc bwi je basoromomosas ara.

¹⁶E nat, e capinmi e cowoc asan akat aomef. E capinmi okon aakef cimin ara. Ar e ew e abweyof aokomisimef jo bwi anakurumef.

¹⁷Bare, e ew jak amop awutnakut e cowoc aomef. Ar masirin, e cowoc e awun jiwi, owec bamo ajisosef. E ajiwi, e Allah jirmec ji bwe ow ara. Aram e Yesus atemen aatamefas ji bwe ow ara.

¹⁸E ew masirin, e jopir aememef.