Read Central Asmat BAPOROMTAMAS 14 Bible Online

BAPOROMTAMAS 14 - Central Asmat bible

BAPOROMTAMAS 14

¹Bare, dor manmok atiwof. Erasan e Domba Jiwi e sikon juwas Sion op aememef. Ow 144.000 ajiwar e Domba Jiwi akac aememfes. E ow, e Domba Jiwi juwas asuk wowam, e aricipic juwas asuk wowam, e abipis aporsipor aampakayapef.

²Doram onam op ajuefas jen ajiof. E ajuefas, bwi ajururupuef cimin ara. Eram wir ajief cimin ara. E jen ajiofas, bare, ow gitar atow aefes cimin ara.

³E ow 144.000 ajiwar e raja fa bemap asanpuam, e tetakay pok empat ajiwar bipuam, e owducur ow bipuam, ay so aefes. Kawey ow nat, e so bwemtewet asan opok. E Yesus e capinmi ajortewef ow cowok, e so atewetfes.

⁴E ow, jursumecas, cepes bwem opok ow ara. Ar ow tarowat aatamememfes. Aram e Domba Jiwi e ajisosmar asanin asanin ajamkawimes. Yesusam inim ow ajortewef. E ow e Allaham, e Domba Jiwiam, aras ara. Ar e Allaham, e Domba Jiwiam, e bapnak atewetfes ow ara.

⁵E owam suw atakam amsom opok ow ara. Aram atakam bokorsakay opok cowok.

⁶Bare, dor wun malaikat cowok e onam opnakut atopipief aporof. Ar jiwne atakam akat atowomef. Ar e atakam e capinmi ow takas botawen. E atakam, e ow samat takas owam, e aporsipor atakam takas owam, e capinmiin capinmiin takas owam, jen bajias ara.

⁷Aram atakam awut aotawef. “Allah e ow siksa bwem jofay, bare emeenawor. Inimas aramat ipic omar mameey. ‘Allah akatnakut ara,’ inim mameey. Ametnak ara, Allah, e onam opam, e capinmiam, e jicupum bwiam, e capinmi arma afisma bwiam, takas akenemapomef. Bare. Caram aramat ipic mamsicimey.” Inim aeef.

⁸Bare, wun malaikat e bap malaikat fa asoromef. Aram atakam afakaytawef. “Daniwis aamamesef! E awut kota juwas Babel, bare daniwis aamamesef! Bare, e kota, e samatin samatin takas ow, e ajursumecas akac bwem, jen opok aatamef. Allaham, jak amop, inim jursumecas aemames ow, aomcema.” Inim aeef.

⁹Wun malaikat masirin, e bap malaikat jamnuk fa asoromef. Aram atakam awut afakaytawef. “Wun ow e binatangam, e binatang ēcoām, asicimames. Aram e binatang juwas asuk wow, e abipisnew, e abannew, pakayap.

¹⁰Allaham jak amop e ow aomcema. Bare, ar jak amop anakatnakut e ow aomcema. Ar jismakam, amopnakut jirpeteyasam, e inimas aemames ow, ajurusumcema. Ar e ow, e malaikat tarowat bipuam, e Domba Jiwi bipuam, ajurusumcema.

¹¹E ow bajurusumas jisamwin, join join aatampwitometawarcema. Eram bakari opok cowok. E binatangam, ēcoām, asicimames ow, jokam, iramam, aatamjurusemcemes. E binatang juwas asuk wow epcom ow, jokam, iramam, aatamjurusemcemes.” E malaikat inim aeef.

¹²Inimas ara, e ow tarowat, jak fak baememawarces. Er e Allah jirmec ji bweam, Yesus mamkawiawaram, inim ow ara.

¹³Bare, dor onam op atakam jen ajiof. “A atakam, tulis eapomey. ‘Wow ajiwar, e Tuhan ajamkawimes wunam damir aafmes ow, bare asan akatnakut aemapmes.’ Inim atakam tulis eapomey.” Inim atakam jen ajiof. E Allah Roham atakam aotawef. “Owoman. Allah, e ow e akat aemawirisas aporma. Inimas ar e ow asan akat aomcema. Inimasam e ow e jutur kerja aemawirisas, akoromtiwcemes.” Inim aeef.

¹⁴Bare, dor manmok atiwof. Dor masirin, jak fwesak aporof. Pok cowokam e jak fwesak ton aemapef. Eras, bare asmat ipic bi awcawor ara. E akusam, emas kus bamapom akatipicas ajimapef. Aram foro parang e aban atowopef.

¹⁵Bare, doram wun malaikat e Allah cem afisef aporof. Aram atakam, e jak fwesak ton aemapef ipic afakayotawef. “E capinmi e cesapok, bare piwi ara. E cesapok basesakamtaw jofay emeenawor. Inimas o oparang mamatewey. Oram e pok mamsesakamtawey.” Inim aeef.

¹⁶Bare, e jak fwesak ton aemapef ipic, e aparang, e capinmi atowoneyef, wunam e cesapok asesakamtawef.

¹⁷Bare, wun malaikatam e Allah cem afisef. Aram foro parang atowomef.

¹⁸Wun malaikatam, e pok Allah jis bafamtam jowse asan afisef. E malaikat, jismak batowom fakas aomomef. Aram atakam e foro parang epcom malaikat afakayotawef. “E capinmi anggur eke, bare piwi ara. Inimas e oparang foro mamatewey. E anggur eke mamtopomsesakamnemey.” Inim aeef.

¹⁹Bare, e malaikat e aparang atewef. Aram e capinmi anggur eke takas e cowok asan aaramsimapomef. Ar masirin, e eke, e Allah anggur bwi burumwisim asan awut, bipar a takas ajiwimef. E asan, e Allah jokmen aememcow asan ara.

²⁰Ow, e anggur bwi, e kota cesen aurumwisimfes. Es masirin, e anggur bwi burumwisim asan afisef. E afisef es, bare kilometer tiga ratus ajiwar airirineyef. E es kakuam, kuda bweyof ajiwar ara.