Read Central Asmat BAPOROMTAMAS 16 Bible Online

BAPOROMTAMAS 16 - Central Asmat bible

BAPOROMTAMAS 16

¹Bare, atakam awutnakut e Allah cem aman akoreyisimef. Doram e atakam jen ajiof. E atakam aotawef ipic, atakam e malaikat tujuh ajiwar aotawef. “Caram mamjisosey. E atowomamokam piring tujuh ajiwar, e Allah jokmenas epcom. E jokmenas e capinmi mamjumnemey.” Inim aeef.

²Bare, e bap malaikat ajisosef. Aram e atowomef piringas, e capinmi ajumnemef. Ajumnemef masirin, e binatang juwas asuk wow epcom owam, e binatang ēco asicimfes owam, doso awutnakut e adam atatakayistotoref. E dosoam asesaknakut arawen.

³Bare, e malaikat keduaam, e atowomef piringas, e jicupum bwipu ajumnemef. E bwi masirin, es ajaworseef. E es, damir aaffes ow es inim awcawor ara. E bwi aman tetakay pok takasam damir aafkurumfes.

⁴Bare, e malaikat ketiga, e atowomef piringas, e jo bwipuam, e capinmi arma afismar bwipuam, ajumnemef. E bwi takasam es ajaworseef.

⁵Doram e bwi aramat malaikat atakam jen ajiof. “Allah. Or tarowat ipic ara. Oram jiwne ipic ara. E atakam asakamtiwfem siksa bwemas, bare tarowatas ara.

⁶E ow, e ow tarowatam, e oratakam botaw owam, acajimirfes. Inimas oram e ow acajimirmem. E aemamemas e pwicak aemfesas jipu ara.” E malaikat inim aeef.

⁷Bare, wun atakamam e pok Allah jis bafamtam jowse akoreyisimef. Doram e atakam jen ajiof. “Tuhan Allah. Or faknakut ara. E ow siksa aemamemas, bare anakatas ara. Eram tarowatas ara.” Inim aeef.

⁸Bare, e malaikat keempat e atowomef piringas e jopokpu ajumnemef. Allah masirin, asmat ow dam, sos bafamtew fakas, e jopok atetamef.

⁹Inimas ara, e jopok, asmat ow dam sos awutnakut afamtewef. E owam, Allah, e asan pwicakas jirmec ajirimef aporfes. Inimas ar Allah juwas cemew atakam aotawfes. Aram e aemawiris pwicakas bak bapayem opokut. Aram aramat ipic basicim opokut.

¹⁰Bare, e malaikat kelima, e atowomef piringas, e binatang raja fa bemap asanpu ajumnemef. E binatang aomomkurumef asan takas masirin, jiwic acamesef. E binatang mamkawi owam dam asesaknakut aemaptotorfes. Inimas ar e komen sis ajeremoptotorfes.

¹¹Ar e dam asesak aporfes. Aram e dam doso aporfes. Inimas ar cemew atakam e onam op Allah aotawfes. E ow nat, e aemawiris pwicakas bak bapayem opokut.

¹²Bare, e malaikat keenam, e atowomef piringas, e awut jo juwas Efratpu ajumnemef. Inimas e jo bwi sarkam asaramesef. E jopok amotomwisimcemar asanpu capinmi araja ow aenawces, aram e jo camow aokorjircemes.

¹³Bare, jursumec dat mamincop, e ewam, e binatangam, e suw allah atakam botaw ipicam, abweyof afisfes. Doram inimas aporof. E dat, ēcō inim awcawor ara.

¹⁴E datam junam bweas aemfes. Ar e capinmiin capinmiin takas raja ow ameroma aefes. Ar e raja ow, owec bamo, cowok asan aanimapoma aefes. E owec bamo jofay, e faknakut Allah ajofayut ara.

¹⁵Bare, Yesus Kristusam atakam aotawef. “Caram jen pijiey. Bare, dor osom ipic inim aenawcimin. E isi bwes opokam, e pakaian bafortiw opokam, inim ow asan akat aememcemes. Aram dam fi opok aememcemes. Kawey ow, e ow aporces, e ow namke opok aememcemes.” Inim aeef.

¹⁶Bare, e dat, e raja ow, capinmi juwas Harmagedon aanimapoma aefes. E Harmagedon, Ibrani atakam juwas ara.

¹⁷Bare, e malaikat ketujuh, e atowomef piringas, op ajiwitometemef. Op ajiwitometemef masirin, atakam awutnakut e Allah cem aman raja fa bemap asan akoreyisimef. “Bare! Emeemtiweres!” Inim aeef. Doram inim atakam jen ajiof.

¹⁸Bare, bwerut apaparayef. Jonutam awumef. Wirutam afakayef. Ajow awutnakutam asimef. Allah, asmat ow akenemapomef jafayam, wow ajiwaram, inim ajow awutnakut opok.

¹⁹Bare, e kota awut apapayef. Mamincop ajiwar apapayamesef. E capinmiin capinmiin kotaam daniwis aamamestotoref. Allaham e awut kota juwas Babel bi binip acomomef. Ar masirin, e aranggur bwi e kota ow anamef. E anggur bwi, bare Allah jak amopnakut aememefas ara.

²⁰E jicupum wōwām takas aaniostotoref. E sikon takasam aaniostotoref.

²¹Te jufu es ek epcom, e onam op asayneyef. E es ek aporsipor, bare kilogram lima puluh ajiwar ara. E es ekam asmat dam ton aneypapamef. E ow, Allah, e te, jufu es ek epcom atewnemef aporfes. Er asan pwicaknakutas aporfes Inimas e ow cemew atakam Allah asesakayotawfes.