Read Central Asmat BAPOROMTAMAS 17 Bible Online

BAPOROMTAMAS 17 - Central Asmat bible

BAPOROMTAMAS 17

¹Bare. E piring tujuh ajiwar atowomfes malaikat tujuh ajiwar, aememfes. E wun cowok masirin, dor aenawomfan. Aram atakam aotawfan. “Deyo! Dor Allah e werey cowocut siksa aemcowas, or aporomtamcimin. E cowoc, bare kota awut ara. Ow, e kota cem, jo sotop aeapomfes.

²E capinmiin capinmiin raja ow, e werey cowoc, jursumecas aemfes. E capinmiin capinmiin mami owam, e cowoc, jursumecas aemfes.” Inim aeef.

³Bare, e Allah Roh e dobi binip aomomkurumfan. E malaikat masirin, dor cem opok asan ajisomosfan. Erasan ara, dor, cowoc, binatang esakam bak ton aemapef aporof. E binatang picin, Allah cemew atakam juwas asuk wow kekenakap. E binatang, kus tujuh ajiwar ara. Wacam sepuluh ajiwar ara.

⁴E cowoc, jirpetey pakaianam, esakam pakaianam, ajimapef. Ar emas pokam, ek akatipic kanimnakasam, wun ek kanim juwas mutiaraam, inim pok cosow aasomapef. Aram emas mok ban atowopef. E mok, e cowoc pwicaknakutasam, jursumecasam, imwinakap ara.

⁵E abipisam, amannakut juwas asuk wow aampakayapef. E juwas ara, “Babel Awut. Ar e werey cepesam, awames capinmi jursumecasam, arosowoc ara.” Inim juwas asuk wow pakayap.

⁶E cowoc, e ow tarowat aresam, e Yesus atemen batam ow aresam, emcaanef. Ar e es bwi aanef, jayic aemef aporof. Dor manmok e cowoc atiwof, junum awutnakut aeof.

⁷E malaikat masirin, atakam dor aotawfan. “Or junum aemem nat, ucimaram? Dor e cowoc amannakut atakamam, e bak ton aemapmar binatang amannakut atakamam, o botaw aemin. E binatang e kus tujuh ajiwar epcomam, wac sepuluh ajiwar epcomam, inim binatang ara:

⁸Ametnak ara, e aporerem binatang, tetakay aememef. E nat, damir aafef. Asep jofay masirin, ar e kakunakut jip ewkunawcema, wunam e daniwis aamamescow asan ajisoscema. Ametnak ara, e binatang tetakay aememef. E nat, damir emeafef. Asep jofay masirin aojisomcema. E capinmi ow inimas aporces, junum awut aecemes. E nat, e junum aeces ow ajuwas, e jiwnenak aatamemawarces ow juwas epcom buku aman opok ara. Allah e capinmi bakenemapom opok ara, ar ow juwas e buku aman aeapomef.”

⁹“Bare, bi binip umuton mamceceremey. E kus tujuh ajiwar, sikon tujuh ajiwar awcawor ara. Er e cowoc aemapmar asan ara. E kusam, raja ow tujuh ajiwar awcawor ara.

¹⁰E wun raja ow lima ajiwar, bare damir emeaffes. E wun cowok awap. E wun cowok masirin, bwenaw opok. Aenawcow, aram raja ipic, jipin inim aememcema.

¹¹E binatang tetakay aememef. E nat, damir aafef. Bare, e binatang e raja ipic kedelapan ara. Aram e raja ow tujuh ajiwar wun raja ipic cowok ara. E raja ipic, bare e daniwis aamamescow asan ajisoscema.”

¹²“E aporerem wac sepuluh ajiwar, raja ow sepuluh ajiwar awcawor ara. E raja ow, ow jirmec bajirim fakas momom opok. E nat, Iblis, e fakas, e raja owam, e binatangam, jam cowoknakap atetamcema.

¹³E raja ow sepuluh ajiwar bi binip cawor ara. Ar e afakas takas e binatang atetamcemes.

¹⁴Aram e Domba Jiwi owec aamocemes. E Domba Jiwi nat, Tuhan anakat ara. Aram e Raja anakat ara. Bare, e Domba Jiwiam, e amamkawi owam, e raja ow, akac akumimosomcemes. E amamkawi ow, e aramat ipic ajateef ow ara. Er e aramat ipic aereremtawef ow ara. Er e aramat ipic mamkawiawar ow ara.” E malaikat inim aeef.

¹⁵E malaikat atakam dor aootawfan. “Or, e werey cowoc, e jopu aemapor aporerem. Bare e jo, ow samat awcawor ara. E jo, mami ow arkeam, capinmiin capinmiin owam, aporsipor atakam owam, awcawor ara.

¹⁶E aporerem kus wac sepuluh ajiwaram, e binatangam, bare e werey cowoc bifan afayomcemes. Ar e cowoc e apok takasam ces aecemes. Aram e cowoc dam fi atewemcemes. Aram e cowoc dam das aemencemes. E cowocam jismak afamtiwcemes.

¹⁷Bare, Allah, e at asakamtiwefas bwemkurum, bi binip, e raja ow sepuluh ajiwar atetamcema. E raja owam inim bi binip cawor aceceremcemes. Inimas e raja ow, e afakas takas e binatang atetamcemes. E binatangam e fakas aomomawarcema— e Allah atakam aotawefas aemkurumcow jofay ajiwar ara.

¹⁸E aporerem cowoc, kota awcawor ara. E kota ownucur owam, jirmec e capinmiin capinmiin raja ow ajirimames.” E malaikat inim aeef.