Read Central Asmat BAPOROMTAMAS 18 Bible Online

BAPOROMTAMAS 18 - Central Asmat bible

BAPOROMTAMAS 18

¹E malaikat inim aeef masirin, dor wun malaikat cowok e onam op aewneyef aporof. E malaikatam, atakam faknakut malaikat ara. E arakatnakutasam e capinmi takas aseremtiwef.

²Ar atakam awut afakaytawef. “Daniwis aamamesor! E awut kota juwas Babel daniwis aamamesor. Aram dat bemap asan aemamesma. Ar e jursumec dat takas asan aemamesma.

³Ametnak ara, ar e samatin samatin ow takas, e ajursumecas mamkawi, jen opok aatamef. E capinmiin capinmiin raja owam, e Babel, jursumecas aamfes. Bare, e Babelam pok awutnakut aomomef. E capinmiin capinmiin pedagang ow masirin, e pok ajitita aefes. Inimas aram pok awut aomomfes.” Inim aeef.

⁴Bare, dor wun onam op atakam jen ajiof. “Awapokom owa. Car dojowow ara. E Kota Babel e adosa amanapor tonapor e onam op ajiwar atometapma. E kota jokmenas aemawiri. Allaham eras bi binip acomomef. Inimas car e kota mamfisey. Car e adosa mamkawiasin. Caram e asan pwicaknakut emapcowas, mamemapasin.

⁶E Babel, pwicakas, kawey ow aomef. Car masirin, amatam eras jipu, e Babel mamomey. E kanim inim pwicakas aemawiri, amatam awut mamomey. Ar pwicakas mok bwi kanim inim, kawey ow anamawiri. Car masirin pwicakas mok bwi awut, e Babel mamnamey.

⁷Aram atakam arma atawma. ‘Do raja cowoc awapey ara. Do fwisma cowoc opokut. Doram bwec opok cowok aemcimin.’ Inim aema. Bare, aram awutut arma atawsicimama. Aram pok awutut ajitamerma. Inimas caram eras jipu e Babel jak pwicak mamferemapomey.

⁸E Babel, pwicakas aemama. Inimas bar cowoknakap, e asan pwicakas takas, e Babel aoomcema. Er ater ara. Bwec ara. Amosto awutnakut ara. Jismakam ar afamtewcema. Bare, Tuhan e Babel siksa aemcema. Aramat ipic, bare faknakut ara.” Inim atakam jen ajiof.

⁹E capinmiin capinmiin raja ow, e Babel, jursumecas aamfes. Aram e apok awutnakut akac aomomfes. Ar e Babel sos bafay jisamwin aporces, aram bwec abweccemes. Aram semow aecemes.

¹⁰Ar e Babel ajurusemcowas aporces, aram omar awutnakut aecemes. Inimas aram dawon opok aememcemes. Aram atakam atawcemes. “Babel! Or kota awut aemamesawirim. Oram faknakut aemamesawirim. E nat, or asan pwicaknakut aemamesmem. Bare, jam cowoknakap ara, Allah or siksa aemaman.” Inim aecemes.

¹¹E capinmiin capinmiin pedagang owam e kota bwec abweccemes. Aram jak pwicak aememcemes. E pedagang ow, ow, e apok bojitit opok aporces ara.

¹²E pedagang pok, bare emas ara. Perak ara. Ek akatipic kanimnakasam ara. Ek kanim juwas mutiara ara. Picin juwas lenan ara. Picin jirpetey ara. Picin juwas sutera ara. Picin esakam ara. Pinim akat os jukpiri ara. Gajah okos pok jukpiri ara. Harga awut os pok jukpiri ara. Tembaga pok jukpiri ara. Besi pok jukpiri ara. Ek juwas pualam pok jukpiri ara.

¹³Kayu manis picin ara. Amos pok fomes bwem pok ara. Pinim akat pok ara. Minyak wangi ara. Pinim akat os capi juwas kemenyan ara. Anggur bwi ara. Minyak ara. Tepung ara. Gandum ara. Sapi ara. Domba ara. Kuda ara. Kereta ara. Mami kerja bwemtam ow ara. Bare, er asmat ow ara. E pedagang pok, bare, inim pok ara.

¹⁴E pedagang owam atakam e kota aotawcemes. “E jak asinomawirim pok, bare emejisoseres. E ōpōk awututam, e ōpōk akatipicutam, bare emepakapioseres. Oram e pok bwemotew asan opok.” Inim aecemes.

¹⁵Ametnak ara, pedagang ow, pok, e kota ajitameratfes. Inimas aram e kota pok awutut aomomfes. Ar e kota ajurusemcowas aporces, aram omar awutnakut aecemes. Inimas aram dawon opok ameremcemes. Aram bwec abweccemes. Jakam pwicak aememcemes.

¹⁶Atakamam aotawcemes. “E kota awut, asan pwicaknakut aemamesma. Bap ara nat, e kota ow, lenan picinam, jirpetey picinam, esakam picinam, ajimomawiris. Ar emas pokam, ek akatipic kanimnakasam, mutiara ekeam, inim cosow pok aasowawiris.

¹⁷E nat, jam cowoknakap ara, e pok awut takas apakapioseres.” Inim aecemes. Bare, e kapal arke kapten ow takasam, e kapal bamuw ow takasam, e kapal kerja ow takasam, e kapal bamuw pajiri bwe ow takasam, dawon opok ameremcemes.

¹⁸Ar e kota sos afaycow amwin aporces, atakam afakaytawcemes. “Wun kota a awut kota awcawor opok.” Inim aecemes.

¹⁹E ow masirin, semow aecemes. Bwecam abweccemes. Aram jak pwicak aememcemes. E ow masirin, “E kota, bare awut ara. E nat, ar asan pwicaknakut aemamesma. E jicupum ajira ajiawiris kapal takas, e kota pok atowomira aeawiris. Inimas e kapal aramat ow, pok awutut aomomames. E nat, jam cowoknakap, e kota pok takas apakapioseres.” Inim aecemes.

²⁰Onam op owa. Jak akat mamememey. Ca tarowat owam, Yesus Kristus car atakam botaw atewosomfan owam, ca Allah atakam botaw owam, jak akat mamememey. Bare, Allah, e kota siksa aemor. Ar e kota aemawirinas bic ajior.

²¹Bare, Faknakut malaikat cowok, ek atewef. E ek, bare amos pok mananasim ek cimin ara. Aram e ek jicupum bwi ajupumef. E malaikat masirin, “Allah, e kota awut juwas Babel, inim faknakut cenes ajumnemcema.

²²Ow, gitaram, soam, sulingam, fwiam, e orasan jen boji opok cowok aemcemes. Pok bakenemapom cescuw owam, e orasan boemap opok cowok aemcemes. Owam amos pok e orasan bokenemapom opok cowok aemcemes.

²³Owam, pelita sereas, e orasan bopor opok cowok aemcemes. Ow, ay petew ipic aratakamam, ay ower cowoc aratakamam, e orasan jen boji opok cowok aemcemes. E opedagang ow, e capinmiin capinmiin an afufuosawiris. E odat epcom owam, e samatin samatin tot aotawiris.

²⁴Bare, e Allah atakam botaw ow aresam, e tarowat ow aresam, ow e capinmiin capinmiin acajimirfes ow aresam, e kota airineyef. Inimas Allah e kota siksa aemor.” E malaikat inim aeef.