Read Central Asmat BAPOROMTAMAS 19 Bible Online

BAPOROMTAMAS 19 - Central Asmat bible

BAPOROMTAMAS 19

¹E malaikat inim aeef masirin, dor awun atakam jen ajiof. E atakam, onam op ow arke atakam awut inim cimin ara. “E werey cowoc e jursumec aemawirias, bare e capinmiin capinmiin ow siksa aemawiri. Allah nat, e werey cowoc siksa aemor. Ametnak ara, e cowocam e Allah kerja bwemtam ow acajimirawiri. Allah nat, e cowoc aemawirias siksa aemor. Bare, e Allah e siksa aemamaras, tarowat ara. Eram anakatas ara. Inimas Allah mamsicimey! Aramat ipic ajortewcema. Aram akatnakut ara. Aram faknakut ara.” Inim aefes.

³Ar masirin, atakam aotawfes. “Allah mamsicimey! E cowoc sos afayor jisamwin op aatampwitometawarma.” Inim aefes.

⁴Bare, Allah e raja fa bemap asan ton aemapef. E ownucur ow dua puluh empat ajiwaram, e tetakay pok empat ajiwaram, Allah bipu bi fop aneyjiaptotorfes. Aram aramat ipic asicimfes. “Atakamnak ara. Allah mamsicimey.” Inim aefes.

⁵Bare, atakam, e raja fa bemap asan akoreyisimef. “E car Allah kerja bwemtam ow awutam kanimam. E car Allah omar ow awutam kanimam. Ca takas e darAllah mamsicimey.” Inim aeef.

⁶Bare, dor wun atakamam jen ajiof. E atakam, ajarewsiapfes ow arke atakam cimin ara. Eram bwi ajururupuef cimin ara. Eram wir awut afakayef cimin ara. E atakam ara, “E daTuhan Allah faknakut ara. Aram e takas aomomkurumamar ara. Inimas aramat ipic mamsicimey.

⁷Jak akatnakut ememamoc. Dar aramat ipic e arakatnakutas, atakam atawmoc. Bare, e Domba Jiwi, cepes batewet jofay emeenawef. E atewetcow cowocam ower bajuwut emeememef.

⁸Allaham lenan picin fwesak orom akatipic e cowoc bajimom atetamef.” Inim aeef. (E lenan picin, ow tarowat e akatas aemames awcawor ara.)

⁹E malaikat masirin, atakam dor aotawfan. “Allah, wun ow, e Domba Jiwi owerse pokbwi akac memen, janim aanimef. E ow, bare asan akat ara.” Wunam, “A atakam, bare e Allah atawef atakamnak ara.” Inim aeef.

¹⁰Dor masirin, e malaikat basicim, e abipu bi fop aneyjiapof. E malaikat nat, “Inim arapok. Dor, oram, e ojowowam, Allah kerja bwemtam akac aemamom. Dar takas e Yesus atawef atakamnak ajamkawimom. Bare, Allah mamsicimey. E Yesus atakam atawefas, e Allah atakam botaw ow fwe anakat ara.” Inim aeef.

¹¹Bare, dor e onam op amuapef aporof. Erasan kuda fwesak aememef. E kuda bak ton aemapef ipic juwas “Tarowat Ipic” ara. Aramat ipicam juwas “Atakamnak Ipic” ara. Aramat ipic ow siksa aemcownew, owec aamocownew, bare er tarowatas jipu ara.

¹²E amanmok, jismak komen inim aaptetereyef. Kus bamapom akatipicas arkeam e akus apakayapfes. E dam picinam, ajuwas asuk wow aampakayapef. Kawey ow nat, e juwas amsom opok cowok. Ar cowok amsom.

¹³E ajimomef baju jirow, es awut epcom. Aramat ipic juwasam “Allah Atakam.”

¹⁴E onam op tentara owam e ipic ajamkawifes. Aram kuda bak ton aemaptotorfes. E apakaian, bare lenan ipic ara. E lenan picin fwesaknakut. Aram oromnakut.

¹⁵Owec parang foro e abweyof aemtepef. E parang, e capinmiin capinmiin ow bakumimosomas ara. E aramat ipic, besi bini atowomcema, wunam ar e ow jirmec ajirimcema. E aramat ipicam e anggur eke, e anggur bwi barumwisim asan, bwey aurumwisimcema. E asan, bare e Allah jak amopnakut aemcowas asan ara.

¹⁶E aramat ipic juwas asuk wow, e apakaianam, e aream, aampakayapef. E juwas “Raja Anakat. Tuhan Anakat.” Inim juwas ara.

¹⁷Bare, dor malaikat cowok e jopok ton aememef aporof. Aram atakam awut, e opnakut apakaytepef sok takas afakayotawef. “Deyo. Arasan aniapey. E Allah pokbwi awut akac memen.

¹⁸Car raja ow dam das aemencomokom. Car tentara kepala owam, fak owam, kudaam, e kuda bak ton bemap owam, e adam das takas aemencomokom. Bare, car asmat ow takas adam das aemencomokom. Car e arop kerja bwem owam, e mami kerja bwemtam owam, e kanim owam, e awut owam, bare e ow takas adam das aemencomokom.” E malaikat inim aeef.

¹⁹Bare, dor e binatangam, e capinmiin capinmiin raja owam, e atentara bak ton bemap ipicam, e ipic atentara owam, owec bamo ajaniapfes.

²⁰E nat, e ipicam, e atentara owam, e binatang ban akimomfes. Aram e suw allah atakam botaw ipic ban akimomfes. Ar masirin, e binatangam, e ipicam, jismak awutnakut asan aman, tetakay ajiwimfes. Er e amopnakut jirpeteyas aaptataraymar asan ara. Bare, ametnak ara, e suw allah atakam botaw ipic, e junam bweas, e binatang bipu aemef. Ar e junam bweas, e binatang juwas asuk wow epcom ow, tot aotef. Bare, e juwas asuk wow epcom ow, e binatang ēco basicim ow ara.

²¹E kuda bak ton aemapef ipic, e abweyof aemtepef owec parang, e wun ow takas acajimirkurumef. E sok takas masirin, e ow dam das awutnakut aanfes. Inimas ar jak apitapkurumfes.