Read Central Asmat BAPOROMTAMAS 2 Bible Online

BAPOROMTAMAS 2 - Central Asmat bible

BAPOROMTAMAS 2

¹“Oram inim atakam, surat eapomey. Wunam a surat, e Efesus Yesus basicim ajarewsiapmes ow amalaikat, mamtiwirimtamey: Jipic cowok, bayar tujuh ajiwar, e ban bo atowomamar ara. Aramat ipicam e emas pelita batewapom asan e wasec acowojarma. Aram a atakam car aotawman:

²E aemawirukumas nomsom. E kerja awutut aemawirukumasam nomsom. E jak fak aememawirukumas nomsom. Caram, e pwicakas aemames ow, jak jirow bwemem asan opok. Wun owam, ‘Dar Kristus atakam botaw atewnamforow ow ara.’ Inim aemes. E nat, Kristus e ow bajirimenam opokut. Caram e ow aoworporfokom, wunam ar suw ow aporfokom.

³Bare, car jak fak aememawirukum. Car dor ajamkawiawirinukum. Inimas ow car ajurusumawirin. Caram bakorompim opok aemawirukum.

⁴E nat, car pwicakasam aemamokom apormin ara. Ametnak ara, car damos awut dor ajiomfenokom. Wow masirin, car damos kanim inim dor ajiomamenokom.

⁵E bap akat aemfokomasam, e jepen pwicak acemfokomasam, bi binip mamceceremporey. E pwicakas bak mampayemey. E bap aemfokomas masirin, mamoemey. E pwicakas bak bapayem opok aemcokom, dor car aenawomcimin. Doram e capelita batewapom asan atowomoscimin.

⁶E nat, car wun akatas aemamokom. Car e Nikolaus ajamkawimes ow e aemamesas, bifan afayomamokom. Doram e ow e aemamesas bifan afayomamin.”

⁷“Bare, e Roh Kudus, a atakam e Yesus basicim ajarewsimes ow, aotawmar ara. Ow takas a atakam jen bajices. Bare, e pwicakas akumimosomces ow, e Allah capinmi akatipic, aemapcemes. Doram erasan, e jiwne os eke, e ow memen, atatamcimin.” E ipic inim aema. Inim atakam surat, e Epesus Yesus basicim ajarewsiapmes ow amalaikat, mamtiwirimtamey.

⁸“Bare, or a atakamam surat eapomey. Wunam a surat, e Simirna Yesus basicim ajarewsiapmes ow amalaikat, mamtiwirimtamey: Jipic cowok bapnak aememef. Aram asepnak aememcema. Aramat ipic damir aafef, wunam aojaworsitef. Aram a atakam car aotawman:

⁹E ajurusemamokomas nomsom. E pok opokut aemapmokomas nomsom. E nat, car anakatas awutut awompokom. Bare, e wun ow atakam, ‘Dar Yahudi ow ara.’ Inim aemes. E nat, ar Yahudi ow opokut. Ar Iblis basicim ajarewsimes ow ara. E ow e cemew car asesakayman nomsom.

¹⁰Bare, e ajurusemcokomas omar arapok. E Iblis, e ca wun ow, penjara cem aman afimimceman. Er car bwemporas ara. Owam, isi sepuluh ajiwar car ajurusumceman. Owam car acajimircannew, e nat, car do bakorompim opok aecenokomnew, bare dor kus bamapom akatipicas car atatamtotorcimin. Car masirin, jiwne aatamemawarcomokom.”

¹¹“E Roh Kudus, a atakam, e Yesus basicim ajarewsiapmes ow aotawmar ara. Ow takas a atakam jen bajices. E pwicakas akumimosomces ow, damir boaf opok aemcemes. Aram bajurusem opok aemcemes.” E ipic inim aema. Inim atakam surat e Simirna Yesus basicim ajarewsiapmes ow amalaikat, mamtiwirimtamey.

¹²“Bare, or a atakamam, surat eapomey. Wunam a surat, e Pergamus Yesus basicim ajarewsiapmes ow amalaikat mamtiwirimtamey: Jipic cowok, owec parang benamnuk aomomamar. Aram a atakam car aotawman:

¹³E aemapmokom asan nomsom. Er e Iblis aomomamar asan ara. E nat, car do mamkawi fak aememamokom. Bare, e Antipas doratemen batam ipic aememef. Aram do basicim fak ipic aememef. Owam e aramat ipic, cawowoc acatiwfes ara, caram do bapacin opok aemfenokom. Bare, carasan e Iblis aemapmar asan ara.

¹⁴E nat, car a pwicakasnakas aemamokom apormin ara. E pwicakas ara, ca wun awapokom ow, e Bileam atakam ji aemokom. Ametnak ara, e Bileam pwicakas bwem, jipic juwas Balak, amememtamefen. E Balak masirin, e pwicakas bwem, e Israel ow acajijimtawefen. E jofayam ara, wun ow, amos pok, dat atetamfesen. E Balak masirin, e Israel ow, e pok memen acajijimtawefen. E Balakam, ow jursumecas bwem acajijimtawefen. Bare, ar inim pwicakas bwem, e Israel ow acajijimtawefen.

¹⁵Wunam, e ca wun awapokom ow, e Nikolaus atakam ji aemokom.

¹⁶Inimas ara, e pwicakas bak mampayemey. E pwicakas bak bapayem opok aemcokom, dor car asarimenawomcimin. Dor masirin, e dobweyof aemapmar owec parang owec car aamocimin.”

¹⁷“E Roh Kudus a atakam e Yesus basicim ajarewsiapmes ow aotawmar ara. Ow takas a atakam jen bajices. Bare, dor e Allah umuton ajistewapomcow amos pok juwas manna, e pwicakas akumimosomces ow, sey aseyetamcimin. Doram ek kanim fwesak, e ow atetamtotorcimin. E ek aporsipor, asuk wow epcom pakayap. E asuk wow ay juwas ara. Kawey owam e juwas bwempor asan opok. E ek atatces ow nat, e juwas aportotorcemes.” E ipic inim aema. Inim atakam surat e Pergamus Yesus basicim ajarewsiapmes ow amalaikat, mamtiwirimtamey.

¹⁸“Bare, or atakamam surat eapomey. Wunam a surat, e Tiatira Yesus basicim ajarewsiapmes ow amalaikat, mamtiwirimtamey: Allah Atiw amanmok jismak komen inim cimin aaptatarayma. E abweyam, tembaga inim cimin tarawu aema. Aram a atakam car aotawman:

¹⁹E aemawirukumas nomsom. E damos ajiomawirukumasam nomsom. E asicimawirukumasam nomsom. E jak fak aememawirukumasam nomsom. Bare, e bapnak aemfokomas, pwicak inim apormin. E jepen aemfokomas masirin, akat inim apormin.

²⁰E nat, car inim pwicakas aemamokom apormin ara: Car e cowoc juwas Isebel desen aporkamimokom. E cowoc atakam, ‘Dor Allah atakam botaw cowoc awamcey ara,’ inim aema. E cowoc nat, e dokerja bwemtam ow tot aotma. Ar e ow jursumecas bwem amememtamama. Kawey owam amos pok dat atetamames. E cowocam, e amos pok memen, e dokerja bwemtam ow, amememtamama.

²¹Doram e cowoc, e aemef dosa bak bapayem, bar jirow emetetamof. E nat, ar e jursumecas bak bapayem pwicaken.

²²Inimas ara, dor dam awut e cowoc atetamcimin. Ar masirin, tepen ton aemamescema. Aram, ajursumecas ajamemames owam, e aemamesas bak bapayem opok aemces, ar bajurusem awutnakut aemcemes.

²³Doram e cowoc atiperes takas acatiwcimin. Bare, dor asmat bi binipasam, asmat jak amanasam, nomsom. Doram e aemawirukumas jipu amatam pomatam aemcimin. E asanin asanin Yesus basicim ajarewsiapmes ow, inimas aporcemes.”

²⁴“Do nat, atakam, e caw un Tiatira ow, aotawmin. Car e cowoc e ajursumec atakam ji bwe opok aemamokom. Wun ow atakam, ‘E jursumecas e Iblis acesaras ara,’ inim aemes. Bare, car e Iblisas mamemem opok aemamokom. Inimas ara, dor wun jirmec car bajirim opok ara.

²⁵E nat, e car aenawomcey jofay ajiwar, e amememfokomas, inim mamatamomopey.

²⁶Bare, wun ow, e pwicakas akumimosomames. Aram e asepnak jofay ajiwar, e dor akat aporminas jipu aatamemawarcemes. Dor masirin, e samatin samatin jirmec bajirim fakas, e ow atetamcimin.

²⁷Aram besi onok pok cimin atowopcemes. Ar masirin, e samatin samatin jirmec ajirimcemes. Aram, e samatin samatin, piring batu cimin, daniwis aamtiwcemes. E atetamcimin fakas, e doricipic, dor atetamfan fakas cowok ara.

²⁸Bare, doram e jo bayar car atetamcimin.”

²⁹“E Roh Kudus a atakam e Yesus basicim ajarewsiapmes ow aotawmar ara. Ow takas a atakam jen bajices.” E ipic inim aema. Inim atakam e Tiatira Yesus basicim ajarewsiapmes ow amalaikat, mamtiwirimtamey.