Read Central Asmat BAPOROMTAMAS 20 Bible Online

BAPOROMTAMAS 20 - Central Asmat bible

BAPOROMTAMAS 20

¹Bare, dor malaikat cowok e onam op aewneyef aporof. Ar e kakunakut jip kunciam, rantai awutam, e aban atowomef.

²Ar e ew ban akamimtewef, wunam tahun seribu ajiwar, rantai manam ajiktiwawiri. E ew, bare e tarey amerut ara. Ar Iblis ara. Awun juwasam Setan ara.

³E malaikat, e Iblis, e kakunakut jip aman ajiwimef. Ar masirin, e jip jimasap, kunci aemapomef. Wunam ar pokkari e jimasap aemapomef. E Iblis e capinmiin capinmiin ow, tahun seribu ajiwar, tot bootasin. Tahun seribu ajiwar aemapces masirin, Tuhan, e Iblis asurumisimcema.

⁴Bare, dor raja fa bemap asan arke aporof. Allah, kawey ow siksa bwem atakam basakamtiw fakas, e fa bemap asan aemapfes ow, atetamef. Ametnak ara, wun ow Yesus atakam atemen aatamfes. Aram Allah atakam aotawfes. Inimas, kawey ow, e ow kus asakamtiwtotorfes. E damir aaffes ow, e binatangnew, e areconew, basicim opok ow ara. Aram ow e binatang juwas asuk wow e abipis bemapomnew, e aban bemapomnew, acuw aatfes ow ara. Bare, dor e damir aaffes ow e aranakat ow aporof. Ar masirin, aojaworsitfes, wunam Kristus cowkon, jirmec e capinmiin capinmiin ow, tahun seribu ajiwar ajirimawiris. Bare, e ow aojaworsitfes, e bapnak bojaworsitas ara.

⁵E wun damir aaffes ow masirin, tahun seribu ajiwar bojaworsit opok aemfes.

⁶E bapnak aojaworsitfes ow, asan akat ara. Aram ow tarowat ara. Aram e asep damiras omar opok. E ow nat, Allaham, Kristusam, atakam mamtaw tugas ow aememcemes. Aram Kristus cowkon, tahun seribu ajiwar, jirmec a capinmi ow ajirimcemes.

⁷Bare, tahun seribu ajiwar asakayjiapces, Tuhan, e Iblis, e penjara cem asurumisimcema.

⁸E Iblis masirin, e capinmiin capinmiin ow samat, tot bot ajisoscema. E wun ow samat juwas Gog ara. E wun masirin, juwas Magog ara. Iblis e ow owec bamo aaramsimapomcema.

⁹E ow e capinmi asanin asanin apacayoscemes. Ar e ow tarowat aemapces asanam, e Allah damos ajiomamar kotaam, fumi aamwiricomcemes. E nat, jismak e onam op aewneycema, wunam e kota fumi aamwiricomces ow sos afamtiwkurumcema.

¹⁰Bare, Iblis tot e ow aotef ipic ara. Tuhan nat, e Iblis e jismak awutnakut aman ajiwimef. Er e amopnakut jirpeteyas aaptataraymar asan ara. Er e binatangam, e suw allah atakam botaw ipicam, e aemapfes asan ara. Erasan ara, ar jokam, iramam, aatamjurusawarcemes.

¹¹Bare, dor raja fa bemap asan awut fwesak aporof. Doram e fa asan ton aemapef ipic aporof. E capinmiam, e onam opam, e ipic bipu aanioscemes. Bare, aram opok arew.

¹²Dor e damir aaffes ow awutam, kanimam, e fa bemap asan bipu aememfes aporof. E fa asan ton aemapef ipic buku arke apaparamopef. Aram wun buku cowok aparamopef. Er jiwnenak aatamemawarces ow juwas epcom buku ara. Bare, e buku arke, e damir aaffes ow, e aemawirisas atakam ara. Tuhanam, e ow e aemawirisas jipu, siksa bwem atakam asakamtiwef. Eras e buku arke atakam jipu ara.

¹³E jicupum bwi damir aaffes ow, e bwi aman asewasifes. E Damir Ow Bemap Asan aemapfes owam afisfes. Bare, e damir aaffes ow takas aojaworsitfes. Tuhan masirin, e ow e aemawirisas jipu, siksa bwem, atakam asakamtiwef.

¹⁴Tuhan masirin, e damirasam, e Damir Ow Bemap Asanam, e jismak awutnakut asan aman ajiwimef. E jismak awutnakut asan, bare e damir boaf asan ara.

¹⁵Wun ow, e ajuwas, e jiwnenak aatamemawarces ow juwas epcom buku aman, bare opok ara. Tuhan, e ow, e jismak awutnakut asan ajiwimef.