Read Central Asmat BAPOROMTAMAS 21 Bible Online

BAPOROMTAMAS 21 - Central Asmat bible

BAPOROMTAMAS 21

¹Bare, dor ay onam opam, ay capinmiam, aporof. E bap onam opam, e bap capinmiam, bare emejisosfes. E jicupum bwiam emeaniosef.

²Doram e dosa opok kota, e onam op aewneyef aporof. Er e ay kota Yerusalem ara. E kota, e Allah bipu aewneyef aporof. Allaham e kota akenemef. Inimas e kota, ower ajuwutcow cowoc inim cimin ara. (E ower ajuwutces cepes, owersey pakaian ajimomcemes, wunam ar e amiwis, biamnuk memamtew, aememcemes.) Bare, e kotaam inim cimin aemef.

³Bare, doram atakam awut e raja fa bemap asan akoreyisimef, jen ajiof. “E Allah aemapmar asanam, e asmat ow aemapmes asanam, bare cowkon arew. E Allah e ow cowkon aemapcema. E owam Allah arow aemapcemes. Allah, bare e ow akac aemapcema. Aram e ow arAllah aemapcema.

⁴Aram e ow e abwec manem takas aerewosomkurumcema. Owam damir boaf opok aemcemes. Aram jak pwicak boemap opok aemapcemes. Aram bwec bobwec opok aemapcemes. Aram dam asesak boem opok aemapcemes. E bapas takas, bare opok arew.” Inim atakam jen ajiof.

⁵E raja fa asan aemapef ipic atakam aotawef. “Bare, dor eras takas akenemapomamin.” Wunam, “A atakam, bare, anakat ara. Aram atakamnak ara. Inimas a atakam, surat mameapomey.” Inim aeef.

⁶Aramat ipic masirin, atakam dor aotawfan. “Bare, emeemtiwof. Dor e bapnak aememof ipic ara. Doram e asepnak aememcey ipic ara. Dor e ametnakas ara. Doram e asepnakas ara. Dor, e capinmi arma apupuismar bwi, e bwito ow takas mami atatamcimin. Owam e bwi aances ar jiwne aatamemawarcemes.

⁷Dor eras, e pwicakas akumimosomces ow, atatamcimin. Doram arAllah aememcimin. Aram dotiperes aememcemes.

⁸E nat, e omar owam, e basicim opok owam, e pwicakas aemames owam, e daw bacatiw owam, e sanaw bwetiw owam, e jursumec owam, e araw pok aemames owam, e ēco asicimames owam, e suw atakam atawmes ow takasam, bare e aatamemapces asan e jismak awutnakut aman ara. E asan, bare jismakam, amopnakut jirpeteyasam, aaptataraycemes. E asan, bare e asep damir boaf asan ara.” Inim aeef.

⁹Bare, e piring tujuh ajiwar atowomfes malaikat tujuh ajiwar aememfes. E piring takas e asepnak asan pwicaknakutas epcom ara. E wun malaikat cowok masirin, atakam dor aotawfan. “Dey. Dor e Domba Jiwi atewetcow cowoc or baporomtam— er e Domba Jiwi arem ara.” Inim aeef.

¹⁰Bare, Roh Kudus e dobi binip aomomkurumfan. Inimas e malaikat, sikon awutnakut op atowotometfan cimin ara. Ar e dosa opok kota aporomtamfan— er kota Yerusalem ara. E kota, e Allah bipu onam op aewneyef aporof.

¹¹E kota e Allah arakatnakutas epcom ara. Inimas e kota atereyef. Er harga awut ek juwas “baiduri pandan” cimin atereyef. Owam inim ek manmok apematamcemes.

¹²E kota fumi, pagar awut aemapef. E pagaram opnakut ara. E pagar jimasap, bare dua belas ajiwar ara. Malaikat dua belas ajiwaram e jimasappu aememfes. E jimasap takas, juwas asuk wow epcom. E juwas, e Israel ow samat dua belas ajiwar juwas ara.

¹³Jimasap mamincop e kota e timur poman ara. Wun mamincop masirin, e utara poman ara. Wun mamincopam e selatan poman ara. Wun mamincopam e barat poman ara.

¹⁴E kota pagar, bare ek bes dua belas ajiwar ton aemamesef. E ek aporsipor, juwas asuk wow epcom. E juwas, e Domba Jiwi e atakam botaw atewosomef ow juwas dua belas ajiwar ara.

¹⁵E atakam dor aotawfan malaikat, emas meter bini atowomef. E meter e kotaam, e jimasapam, e pagaram, tamat batamas ara.

¹⁶E kota jipmor empat takas, bare tarowat ara. E jipmor takasam tamat awcawor ara. Bare, e malaikat, e atowomef meter bini, e kota, tamat aatamef. Ar e kota jirow kilometer 2.415 ajiwar aporef. E kota param, e kota opam, inim kilometer ajiwar awcawor aporef.

¹⁷Aram e pagar op, tamat aatamef. Er meter enam puluh ajiwar aporef. E malaikat meter tamat aatamefas, bare asmat meter awcawor ara.

¹⁸E pagar, ek juwas “baiduri pandan” ara. E kota masirin, emas ara. E emas, wun pok bokawim opokas ara. E emas, kaca cimin ara. Owam e emas manmok apematamcemes.

¹⁹E pagar ek bes, cosow pok epcom. E cosow pok harga awut ek jukpiri ara. E bap ek bes, baiduri pandan ek ara. E ek bes kedua masirin, nilam ek ara. E ek bes ketiga masirin, yakut ek ara. E ek bes keempat masirin, samrud ek ara.

²⁰E ek bes kelima masirin, baiduri sepah ek ara. E ek bes keenam masirin, delima ek ara. E ek bes ketujuh masirin, ratna cempaka ek ara. E ek bes kedelapan masirin, pirus ek ara. E ek bes kesembilan masirin, topas ek ara. E ek bes kesepuluh masirin, krisopras ek ara. E ek bes kesebelas masirin, lasuardi ek ar. E ek bes kedua belas masirin, kecubung ek ara.

²¹E pagar jimasap dua belas ajiwar, mutiara ek dua belas ajiwar ara. E jimasap aporsipor, bare mutiara ek cowokut ara. E kota bokotpu, bare emas pok ara. E emas, wun pok bokawim opokas ara. E emas, kaca cimin ara. Ow e emas manmok apematamcemes.

²²Dor e kota Allah cem opok aporof. E faknakut Tuhan Allaham, e Domba Jiwiam, bare Allah cem ara.

²³Allah sereas e kota aseremtiwma. E Domba Jiwiam, e kota alampu cimin ara. Inimas jopok e kota bwemseremtiw asan opok. Piram e kota bwemsokomtiw asan opok.

²⁴Bare, capinmiin capinmiin ow e kota sereas aman ajarcemes. E raja owam, e arakatnakutas, e kota atowomiwcemes.

²⁵E kota pagar jimasap takas jo ajorowcow, inim cowok aatammuaptotorcema. Erasanam, bare iram opok cowok ara. Inimas, ow e jimasap bakapimapom opok aemcemes.

²⁶Ow, e capinmiin capinmiin ow arakatnakutasam, apok awututam, e kota atowomiwcemes.

²⁷E nat, e ponowas e kota bwemfiw asan opok. E pwicakas bwem owam, e suw owam, e kota bwemfiw asan opok. E nat, e Domba Jiwi e asurat aman juwas ow cowok, e kota afiwcemes. E buku aman juwas ow, bare e jiwnenak aatamemawarcemes ow ara.