Read Central Asmat BAPOROMTAMAS 22 Bible Online

BAPOROMTAMAS 22 - Central Asmat bible

BAPOROMTAMAS 22

¹Bare, e malaikat, jo aporomfan. E jo bwi tartar awutnakut aemef. Owam e bwi aances, ar jiwne aatamemawarcemes. E jo, e Allaham, e Domba Jiwiam, e raja fa bemap asan aman ewkayneyef.

²E jo bwi, e kota bokotpu wasec airineyef. E jo pim jamnuk jiwne batamemawaras os aememfes. E os, tahun cowok, eke, bar dua belas ajiwar apeteptotora aeef. Pir cowok, eke, bar cowok apetepa aeef. E os sense e capinmiin capinmiin dam ow baworomtawas ara.

³E Allah pwicak aporefas takas, bare erasan opok. E Allaham, e Domba Jiwiam, araja fa bemap asan, erasan aemapcema. E Allah kerja bwemtam owam, aramat ipic asicimcemes.

⁴Aram aramat ipic bi aporcemes. Aramat ipic juwas asuk wow e ow bipis aemapcema.

⁵Erasan iram boem opok cowok arew. Tuhan Allah asereas cowok, e ow asan aseremtiwcema. Inimas erasan, lampunew, jopoknew, baseremtiw opok cowok arew. E owam raja ow aememcemes. Aram jirmec aatamjirimawarcemes.

⁶Bare, e malaikatam atakam dor aotawfan. “A atakam, bare anakat ara. Aram atakamnak ara. E Tuhan Allah, e aratakam, e aratakam botaw ow aotawtamef. Aramat ipicam e akerja bwemtam ow, e sarim aenawcowas bapor, akat arawen. Inimas ar e amalaikat, eras, e ow baporomtam, atewosomef.” Inim aeef.

⁷E Yesusam atakam aotawef. “Jakaperey. Dor sarimnakap aenawcimin. A buku e aenawcowas atakam ara. A buku atakam ji bwe ow, bare asan akat aemapcemes.” Inim aeef.

⁸Bare, dor Yohanes ara. Dor a surat aeapomamin atakam takas jen ajiof. Doram eras takas manmok atiwof. Dor eras atakam jen ajiof. Doram eras manmok atiwof. Dor masirin, e pok aporomtamfan malaikat bipu bi fop aneyjirapof.

⁹E malaikat nat, atakam dor aotawfan. “Or inimas arapok. E Allah atakam botaw ow, bare ojowow ara. Doram, oram, e Allah atakam botaw owam, a buku atakam ji bwe owam, Yesus kerja akac aemtamamom. Inimas Allah cowok mamsicimey.” Inim aeef.

¹⁰Bare, e malaikat atakam dor aootawfan. “A buku atakam, e aenawcowas ara. E aenawcowas jofay, bare sotop. Inimas or a buku atakam bacukumtiw arapok.

¹¹E fasi ow, e afasias inim baatamemawarces. E jursumec owam, e ajursumecas inim baatamemawarces. E akat owam, e arakatas inim baatamemawarcer. E tarowat owam, e atarowatas inim baatamemawarces.” Inim aeef.

¹²Yesus masirin, atakam aotawef. “Jakaperey. Dor sarim aenawcimin. Doram akatas atowoneycimin. Dor masirin, ow e aemawirisas jipu, aporsipor amatam atatamtotorcimin.

¹³Dor e bapnak aememof ipic ara. Doram e asepnak aememcey ipic ara. Dor e ametnakas ara. Doram e asepnakas ara.”

¹⁴“Bare, e apakaian bwi acicikimames ow, asan akat aemapmes. Allah, e ow, e jiwne os eke memen, atatamcema. Aram, e ow, e kota pagar jimasap bafiw, jirmec ajirimcema.

¹⁵E nat, e juwur cimin baferey owam, e araw pok bwem owam, e jursumecas bwem owam, e daw bacatiw owam, e sanaw bwetiw owam, e ēco basicim owam, e suw atakam damos bajiom owam, e suw atakam botaw owam, bare e kota cesen aememcemes.”

¹⁶“Dor Yesus ara. Dor, e domalaikat, e atakam ca botaw, atewosomof. E atakam, e do basicim ajarewsiapmes ow jen bajias ara. Bare, dor Daud urpis ara. Doram e apicemar jo bayar cimin ara.” Yesus inim aeef.

¹⁷Bare, e Allah Roham, e ower ajuwutcow cowocam, atakam atawmes, “Dey,” inim aemes. E jen ajimes owam, “Dey,” inim baeces. E bwito ow baenawces. E bwi ban jak aseremomames ow, e bwi mami baances. Ar e bwi aances, jiwne aatamemawarcemes.

¹⁸Bare, dor Yohanes ara. A buku atakam, e aenawcowas ara. Dor a buku atakam jen baji ow atjen aowmin. Ow, a buku atakam aokayimces, Allaham, asan pwicaknakutas, e ow aomcema. E asan pwicaknakutas e buku atakam jipu ara.

¹⁹Wunam, ow a buku atakam poman apamosomces, Allaham, e ow e jiwne batamemawaras ow eke memen, batatam opokut aemcema. E owam e dosa opok kota, bwemfiw asan opok. E os eke atakamam, e kota atakamam, bare a buku atakam jipu ara.

²⁰A atakam takas atawmar ipic atakam aotawma. “Bareman. Dor sarim aenawcimin.” Inim aema. Bare, er atakamnak ara. Tuhan Yesus! Mamenawey!

²¹E Tuhan Yesus, asan akat, e tarowat ow, baomomcow.