Read Central Asmat BAPOROMTAMAS 3 Bible Online

BAPOROMTAMAS 3 - Central Asmat bible

BAPOROMTAMAS 3

¹“Bare, or a atakamam surat eapomey. Wunam a surat, e Sardis Yesus basicim ajarewsiapmes ow amalaikat, mamtiwirimtamey: Jipic cowok e Allah Roh tujuh ajiwar epcom ara. Aram e bayar tujuh ajiwar atowomamar ara. Aramat ipic a atakam car aotawman: E aemawirukumas nomsom. Kawey ow atakam, ‘E Sardis ow tetakay araman,’ inim aemes. E nat car damir aaffokom ow inim awcawor ara.

²Allah, e aemawirukumas takas, aratakam jipunak opok apormar ara. Doram inimas apormin ara. Bare, car damir bafken inim cimin ow ara. Inimas ara, basitey! Car tetakay kanim awapokom. Inimas caram fak mamemey. Car damir bafasin.

³Inimas ara, e amememfokomasam, e jen ajifokomasam, binip mamcomomey. E atakamam ji mameey. E cadosa bak mampayemey. Car basit opok aemcokom, dor pok ces bwetew ipic cimin car aanawomcimin. E car aenawomcin jam, bare camsom opok.

⁴E nat, caw un Sardis ow mamincop, e capakaian, sakar bemapom opok. Inimas asep jofay car pakaian ajimemcomokom, wunam dor akac acowojarcomom. Car inimas bwem, awcawor ow araman.

⁵Allah e pwicakas akumimosomces ow, inim pakaian fwesak ajimapomcema. Doram e ow juwas, e jiwnenak juwas epcom buku, bakokoromosom opok aemcimin. Dor, e doricipic bipuam, e amalaikat bipuam, atakam atawcimin. ‘A ow doras ara.’ ” Inim aecimin.

⁶“E Roh Kudus a atakam e Yesus basicim ajarewsimes ow aotawmar ara. Ow takas a atakam jen bajices.” E ipic inim aema. Inim atakam surat, e Sardis Yesus basicim ajarewsiapmes ow amalaikat, mamtiwirimtamey.

⁷“Bare, or a atakamam surat eapomey. Wunam a surat, e Filadelfia Yesus basicim ajarewsiapmes ow amalaikat, mamtiwirimtamey: Jipic cowok tarowat ipic ara. Aram atakamnak ipic ara. Aramat ipic, e Daud aomomef kunci, aomomama. Ar jimasap apayimcow, ow e jimasap bwemkapimapom asan opok. Aram jimasap akapimapomcow, ow e jimasap bwemopayim asan opok. Aramat ipic a atakam car aotawman:

⁸Dor e aemawirukumas nomsom. Dor e cabipu jimasap apayimtamfin. Owam e jimasap bwemkapimapom asan opok. Caram fak kanimnakap aememamokom. Caram e doratakam ji aefokom. Caram do bapacin opok aemfenokom.

⁹E wun ow, Iblis basicim ajarewsiapmes ow ara. E ow atakam, ‘Dar Yahudi ow ara,’ inim aemes. E nat, ar Yahudi ow opokut. Ar suw ow ara. Doram e ow car bwenawom, wunam e cabipu jine onok baneyotap, inim jirmec ajirimcimin. Doram e damos car ajiomfinas, e ow aporomcimin.

¹⁰Bare, asep jofay, asmat ow takas bajurusumas aenawcema. E bajurusumas, ow takas bwemporas ara. Doram, car jak fak mamemawar, jirmec ajirimfin. Caram e jirmec ji aefokom. Inimas ara, e bajurusum jofay, doram mantem fak car atiwomcimin.

¹¹Bare, dor asarimenawcimin. E aomomamokomas ban fak mamomosomey. Ow e cakus amapomcokom akatipicas batewasin.

¹²Dor e pwicakas akumimosomames ow, e dorAllah acem aman omow os inim atewemcimin. Aram e cem aman inim aatamemawarcemes. Dor e dorAllah juwasam, e ay kota Yerusalem juwasam, e doray juwasam, e ow dam ton, tulis aeapomcimin. Bare, e ay kota Yerusalem, e onam op ewneycow kota ara.”

¹³“E Roh Kudus a atakam e Yesus basicim ajarewsimes ow aotawmar ara. Ow takas a atakam jen bajices.” E ipic inim aema. Inim atakam, e Filadelfia Yesus basicim ajarewsiapmes ow amalaikat, mamtiwirimtamey.

¹⁴“Bare, or a atakamam surat eapomey. Wunam a surat, e Laodikia Yesus basicim ajarewsiapmes ow amalaikat, mamtiwirimtamey: Jipic cowok juwas ‘Atakamnak’ ara. Aram atemennak batam ipic ara. Ametnak ara, Allah pokin pokin akenemapomef ara, e ipicam e pokin pokin ji aeremapomef. E ipicam a atakam car aotawman:

¹⁵Dor e aemawirukumas nomsom. Car jufunak opok. Caram amopnak opok. E nat, car jufunaknew, amopnaknew, bare akat ara.

¹⁶Bare, car amop kanimnakap ara. Car amopnak opok. Caram jufunak opok. Inimas dor car bo bamoisimtam aememamin.

¹⁷Bare, car atakam, ‘Dar pok awut ara. Daram uang awut ara. Dar wun pok boporomtew opok.’ Inim aemokom. E nat, car asan pwicak ow ara. Caram ajurusapmokom ara. Car pok opokam, manmok kapiam, dam fiam, aemapmokom ara. Ca nat, camsom opok.

¹⁸Inimas ara, dor atjen car aowmin: Car e awompey emas mamjititey. E emas, bare e wun pok bokawim opok emas ara. Inimas car pok awut aomomcomokom. Caram e awompey fwesak pakaian mamjititey. Inimas car pakaian ajimomcomokom. Ow e cadam fi baporasin. Caram namke mememasin. Caram e awompey manmok obat mamjititey. Inimas e camanmok atetereyapcema.

¹⁹Dor e damos ajiomamin ow, jiman aafcimin. Doram e ow ajurusumcimin. (Er e ow, akatas bwem, mamememtamas ara.) Inimas car do mamkawi faka. E pwicakas bak mampayemkurumey.

²⁰Jakaperey. Dor e jimasappu aememamin. Doram e jimasap akakajumamin. Ow e jimasap apayimtamcenesnew, dor e cem afiwapcimin. Dor masirin, amos e ow akac aemencimin.

²¹Dor e pwicakas akumimosomces ow, e doraja fa bemap asan dor akac bemap, atetamcimin. Eras e pwicakas akumimosomof, wunam dor e doricipic e araja fa bemap asan akac aemapfom,” inim awcawor ara.

²²“E Roh Kudus a atakam e Yesus basicim ajarewsiapmes ow aotawmar ara. Ow takas a atakam jen bajices.” E ipic inim aema. Inim surat e Laodikia Yesus basicim ajarewsiapmes ow amalaikat, mamtiwirimtamey. E aramat ipic inim atakam aotawfan.