Read Central Asmat BAPOROMTAMAS 4 Bible Online

BAPOROMTAMAS 4 - Central Asmat bible

BAPOROMTAMAS 4

¹Bare, aramat ipic inim atakam atawkurumef masirin, dor e onam op jimasap bapayiem aporof. E bap jen ajiof atakam, fwi cimin ara. Eram atakam aotawfan. “Arasan akunawey. Dor masirin, e asep jofay aenawcowas, atakam or aotawcimin.” Inim aefan.

²E Allah Roh masirin, e dobi binip asarimomomkurumfan. Dor masirin, raja fa bemap asan, e onam op aporof. Jipic cowokam e fa bemap asan aemapef.

³E aemapef ipic bi, harga awut ek juwas baiduri pandanam, delimaam, bir bir inim aeef. Wunam jīr e fa bemap asan fumi abwicirapef. E jīr, ek juwas samrud inim awcawor ara.

⁴Wun fa bemap asan dua puluh empat ajiwar, e raja fa bemap asan fumi aamwicirimapfes aporof. Owducur ow dua puluh empat ajiwaram, e fa bemap asan aemaptotorfes. Aram pakaian fwesak atamwiapfes. Aram kus bamapom akatipicas e akus aporsipor aamapfes. E akatipicas, bare emas pok ara.

⁵Bwerut e raja fa bemap asan aman apaparamisimef. Jonutam e fa bemap asan desen awumisimef. Wirutam e fa bemap asan aman afakayisimef. Sos pok tujuh ajiwar e fa bemap asan e bap atereyapef. E sos pok, e Allah Roh tujuh ajiwar inim awcawor ara.

⁶E fa bemap asan e bap, pok, kaca awutnakut inim cimin aemamesef. Eram bwi awutnakut inim cimin ara. Owam e pok manmok akan bapematam ara. E fa bemap asan pim mamincop takas ak, tetakay pok empat ajiwar aememfes. E tetakay pok e biam, e bakam, manmok arke ara.

⁷E wun tetakay pok, singa inim awcawor ara. E wun tetakay pok masirin, sapi jiwi inim awcawor ara. E wun tetakay pok masirin, abi asmat bi inim awcawor ara. E wun tetakay pok masirin, apicemar waraw inim awcawor ara.

⁸E tetakay pok empat ajiwar aporsipor, jaromak enam ajiwar ara. E jaromak tonam, e jaromak amanam, manmok takas ara. Bare, e tetakay pok, jokam, iramam, so aatamemes. Aram ses ban opok cowok. “E Tuhan Allah tarowat anakatnakut ara. Aram e faknakut ipic ara. Aramat ipic ametnak aatamememawiri. Wowam awamec. Asep jofayam aatamememawarcema.” Inim so aatamemes.

⁹E raja fa asan aemapmar ipic, jiwne aatamemapawarmar ipic ara. E tetakay pokam, atakam aotawa aemes. “E aramat ipic akatnakut ara.” Inim aea aemes. Aram e aramat ipic asicima aemes. Aram terima kasih atakam e aramat ipic aotawa aemes.

¹⁰Ar inimas aema aemes ara, e ownucur ow dua puluh empat ajiwar, e raja fa bemap asan aemapmar ipic bipu, bi fop aneyjiapa aemes. Aram e jiwne batamememawar ipic asicima aemes. Aram aporsipor e akus bamapom akatipicas, e raja fa bemap asanpu atatiwa aemes. Ar masirin, inim so aea aemes:

¹¹“Or daTuhan ara. Oram darAllah ara. Or e pok takas akenemapomfem. Bare, or inimas akat aporfem, wunam e pok akenemapomfem. Or akat aporfem. Inimas e pok ji aerapfes. Inimas ara, ow or akatnakut, inim atakam atawa aemes. Aram or asicima aemenes. Aram or faknakut, inim atakam atawa aemes. Bare, or eras takas awcawor ipic araman.” Inim so aea aemes.