Read Central Asmat BAPOROMTAMAS 5 Bible Online

BAPOROMTAMAS 5 - Central Asmat bible

BAPOROMTAMAS 5

¹Wunam dor e raja fa bemap asan aemapef ipic aporof. Doram e aramat ipic ban bo, buku atowomef aporof. E buku, ajaportomamesef surat ara. E buku, e amanam, tonam, surat asuk wow epcom. E bukuam, bakamimapom pok tujuh ajiwar epcom.

²Dor masirin, faknakut malaikat cowok aporof. E malaikat atakam awutut afakaytawef. “E buku bakamimapom pok bakokoromtew awcawor ipic cam? E buku baparamom awcawor ipic cam?” Inim aeef.

³E nat, e onam op owam, e capinmi owam, e damir asan owam, e buku bwemparamom asan opok cowok. Aram e buku aman bwempor asan opok cowok.

⁴Dor ow e buku baparamom, wunam e buku aman bapor, inim awcawor ow opok aporof. Inimas bwec awutut abwecof.

⁵E wun ownucur ipic cowok masirin, atakam aotawfan. “Bwec arapok. Yehuda samat ipic cowok singa inim cimin ara. Aram Daud urpis ara. Aramat ipic e pwicakas akumimosomef. Inimas ar e buku bakamimapom pok tujuh ajiwar akokoromtawcema. Ar masirin, e buku aparamomcema.” Inim aeef.

⁶Wunam, dor Domba Jiwi e raja fa bemap asanak memem aporof. E tetakay pok empat ajiwaram, e ownucur ow dua puluh empat ajiwaram, e Domba Jiwi fumi aamwicirimomfes. E Domba Jiwi, ow ar acatiwfes inim cimin aememef. Aram kus wac tujuh ajiwar epcom. Aram manmok tujuh ajiwar epcom. E manmok e Allah Roh tujuh ajiwar inim awcawor ara. Ametnak, Allah, e Roh, capinmi asanin asanin atewosomef.

⁷E Domba Jiwi, e raja fa bemap asan aemapef ipicpu ameromef. Ar masirin, e ipic e ban bo atowomef buku atewef.

⁸Ar e buku atewef masirin, e tetakay pok empat ajiwaram, e ownucur ow dua puluh empat ajiwaram, e Domba Jiwi bipu bi fop aneyjiapfes. Aram aporsipor gitar inim cimin pok atowomfes. E pok juwas kecapi ara. Aporsiporam emas piring atowomfes. E piring takas, pinim akat pok imwinakap ara. E pok e tarowat ow, e janim Allah aanimfes, inim awcawor ara.

⁹E tetakay pok empat ajiwaram, e ownucur ow dua puluh empat ajiwaram, ay so aefes: “Ow or acatiwfenes. Oram, e ores, ow ajititfem, wunam e ow Allah atetamfem. E ajititfem ow, e ow samat takas e wun owam, e aporsipor atakam takas e wun owam, e capinmiin capinmiin takas e wun owam, inim ow ara. Or e ow aomomkurumfem, wunam or e ow, Allah atakam mamtaw tugas ow, atawemfem. E owam, e capinmi ow jirmec ajirimcemes. Or inimas aemfem. Inimas or e buku batowom, wunam e bakamimapom pok bakokoromtew, inim awcawor ipic awamcem ara.” Inim so aefes.

¹¹Dor masirin, manmok atiwof. Doram malaikat arkenakut aratakam jen ajiof. Ar e raja fa bemap asanam, e tetakay pokam, e ownucur owam, fumi aamwicirimomfes.

¹²Aram inim so awut aefes: “Ametnak ara, ow e Domba Jiwi acatiwfes. E nat, e Domba Jiwi faknakut ara. Aram pok awutnakut aomomama. Aram amsomnakut ara. Owam inim atakam baotawces. Owam aramat ipic basicimces. Aram, ‘Aramat ipic akatnakut ara,’ inim baeces. Bare, aramat ipic inimas takas awcawor awamec ara.” Inim so aefes.

¹³Dor masirin, e Allah e onam op akenemapomefas takas e atakam atawfesas jen ajiof. Doram, e Allah capinmi akenemapomefas takasam, e capinmi aman akenemapomefas takasam, e bwi aman akenemsemefas takasam, e atakam atawfesas jen ajiof. Aram inim so aefes: “Ow, e raja fa bemap asan ton aemapmar ipicam, e Domba Jiwiam, baatamsicimawarces. Ow, ‘Aramat ow akatnakut ara,’ inim baatamjiawarces. Ow takasam aratakam ji baeawarces.” Inim so aefes.

¹⁴E tetakay pok empat ajiwar masirin, “Inim atakam, atakamnak ara,” inim aefes. Wunam e ownucur ow, bi fop aneyjiapfes. Aram asicimfes.