Read Central Asmat BAPOROMTAMAS 6 Bible Online

BAPOROMTAMAS 6 - Central Asmat bible

BAPOROMTAMAS 6

¹Wunam, dor e ajaportomamesef surat, bakamimapom pok tujuh ajiwar aporof. Doram e Domba Jiwi e wun bakamimapom pok cowok, akoromtewef aporof. E tetakay pokam empat ajiwar e wun cowok, e atawef atakam jen ajiof. E atakam, bare wir cimin ara. “Dey!” Inim aeef.

²Doram manmok atiwof. Fwesak kuda cowok aporof. E kuda bak ton aemapef ipic āman atowopef. Allah, kus bamapom akatipicas, e ipic atetamef. Bare, e ipic, ow bakumimosom ipic ara. Aram ow bakumimosom ajisef.

³Wunam e Domba Jiwi e buku bakamimapom pok kedua akoromtewef. Akoromtewef masirin, dor e tetakay pok kedua e atawef atakam jen ajiof. “Dey!” Inim aeef.

⁴Bare, wun kudaam ajisef. E kuda esakam ara. Allaham, fakas, e kuda bak ton aemapef ipic, atetamef. E fakas, awames capinmi ow owec bamo jirmec fakas ara. E ipic owec bamo jirmec ajirimcow, ow aramaman aamcajimirtiwcemes. Bare, Allaham owec parang awut e ipic atetamef.

⁵Wunam, e Domba Jiwi e buku bakamimapom pok ketiga akoromtewef. Akoromtewef masirin, tetakay pok ketiga e atawef atakam jen ajiof. “Dey!” Inim aeef. Doram manmok atiwof. Sosok kuda cowok aporof. E kuda bak ton aemapef ipic timbangan ban atowopef.

⁶Doram e tetakay pok empat ajiwar aman, ow atakam atawefas inim cimin jen ajiof. E atakam ara, “Gandum, liter cowok aharga, kerja ipic bar cowok agajias ara. Jagung, liter mamincopam aharga, kerja ipic bar cowok agajias ara. Car e saitun osam, e anggur kebunam, bafakam arapok.” Inim aeef.

⁷Wunam, e Domba Jiwi, e buku bakamimapom pok keempat akoromtewef. Akoromtewef masirin, dor e tetakay pok keempat e atawef atakam jen ajiof. “Dey!” Inim aeef.

⁸Doram manmok atiwof. Jirpetey kuda cowok aporof. E kuda bak ton aemapef ipic juwas “Damiras” ara. E afa asoromef ipic juwas “Damir Ow Bemap Asan.” Allaham, fakas, e ipic jamnuk atetamef. E fakas, awames capinmi ow seperempat ajiwar damir bafas ara. E wun ow owec parang damir aafcemes. E wun owam amosto damir aafcemes. E wun ow masirin, ater damir aafcemes. Awames capinmi wasan binatang masirin, e wun ow acancemes.

⁹Wunam, e Domba Jiwi e buku bakamimapom pok kelima akoromtewef. Akoromtewef masirin, dor damir aaffes ow aranakat ow aporof. E anakat ow, e Allah pok jis bafamtam jowse caman aemapfes. Bap ara, e ow, e Allah atakam, kawey ow aotawawiris. Aram e Allah aemefas atemen aatamawiris. Wun ow masirin, inimas aporfes, wunam e ow acajimirtiwfes.

¹⁰E ow aranakat ow, atakam afakaytawfes. “Tuhan. Or tarowat ara. Oram atakamnak ara. Or awames capinmi ow siksa bwem ucim emcem? E ow dar acajimirtiwforowos. Or inimas bic baji ucim emcem?” Inim aefes.

¹¹Allaham baju fwesak jirow e ow atetamtotoref. Aram atakam e ow aotawef. “Ow, kerja car akac aemawirukum. Wun ow masirin, e ow acajimirtiwcemes— ar car acajimirtiwfan inim cimin ara. Aram cajowow ara. Bare, car e jofaynakap ajiwar ses patakamaney.” Inim aeef.

¹²Wunam dor e Domba Jiwi e buku bakamimapom pok keenam akoromtewef aporof. Bare, ajow awutnakut asimef. E jopok, sosok kain, inim sosoknakut aemapef. E piram, es inim esakamnakut apeapef.

¹³E op bayaram awames capinmi akokoysayneyef. Er jon awut e os juwas “arā” wari wari aemcema, wunam e ofo arā eke akokomsamnemcema inim cimin ara.

¹⁴E onam opam aaniosef. Er kertas ajaportomamesef inim cimin ara. E sikonam takas wun asan ameraptotorfes. E wōw takasam wun asan ameraptotorfes.

¹⁵Wunam awames capinmi raja ow takasam, e kepala owam, e tentara kepala owam, e pok awut epcom owam, e fak owam, e kawey ow mami kerja bwemtam owam, e arop kerja bwem owam, ek jip aman acukaptotorfes. Aram e sikon ek pacin aman acukaptotorfes.

¹⁶E owam atakam e sikonam, e ekam, aotawfes. “Baneypwirimopcarowey. E raja fa asan aemapmar ipic dar baporasin. E Domba Jiwiam jokmenas dar bwemasin.

¹⁷E aramat ow, e jokmen enememces jofay, bare emcaenawor. Owam, e ipic jamnuk bipu, bwemakajirem asan opok.” Inim aefes.