Read Central Asmat BAPOROMTAMAS 7 Bible Online

BAPOROMTAMAS 7 - Central Asmat bible

BAPOROMTAMAS 7

¹Dor eras aporkurumof masirin, malaikat empat ajiwar aporof. E malaikat a capinmi bip empat ajiwar aememfes. Aram e fo empat ajiwar ciram asiapfes. E fo, e capinminew, e jicupum bwinew, e osin osinnew, bakurumasin.

²Dor masirin, wun malaikat cowok, e jopok amotomwisimcemar asanpu ewenawef aporof. Bap ara, e jiwne Allah, ow bipis bokomapom bi, e malaikat atetamef. E malaikat masirin, e bi atowotnawef. E malaikatam atakam awutnakut, e wun malaikat empat ajiwar afakaytawef— er e Allah, e capinmiam, e jicupum bwiam, bajurusum fakas atetamef malaikat empat ajiwar ara.

³“Car e capinmiam, e jicupum bwiam, e osam, bajurusum arapok. Dar, e darAllah kerja bwemtam ow, e abipis aporsipor, bi batakamokomapom.” Inim aeef.

⁴Dor masirin, wun atakamam jen ajiof. “E bipis bi epcom ow takas, ow 144.000 ajiwar ara. Er e Israel samatin samatin dua belas ajiwar ow e wun ow ara.

⁵Er e Ruben samat owam 12.000 ajiwar ara. E Gad samat owam 12.000 ajiwar ara.

⁶E Asyer samat owam 12.000 ajiwar ara. E Naftali samat owam 12.000 ajiwar ara. E Manasye samat owam 12.000 ajiwar ara.

⁷E Simeon samat owam 12.000 ajiwar ara. E Lewi samat owam 12.000 ajiwar ara. E Isakar samat owam 12.000 ajiwar ara.

⁸E Sebulon samat owam 12.000 ajiwar ara. E Yusuf samat owam 12.000 ajiwar ara. E Benyamin samat owam 12.000 ajiwar ara. Bare, inim ow, bipis bi epcom ow ara.” Inim atakam jen ajiof.

⁹Dor eras aporkurumof masirin, doram ow arkenakut aporof. Owam e ow bwemjucucumir asan opok. E ow, e capinmiin capinmiin takas e wun owam, e ow samat takas e wun owam, e aporsipor atakam takas e wun owam, bare inim ow ara. E owam e raja fa bemap asanpu aememfes. Aram baju fwesak jirow atamwiemtotorfes. Aram tem tore atowomtotorfes.

¹⁰E owam atakam afakaytawfes. “E DarAllah e raja fa bemap asan ton aemapma. Aramat ipicam, e Domba Jiwiam, ow ajortewmes.” Inim aefes.

¹¹E malaikat takas, e raja fa bemap asan fumiam, e ownucur ow fumiam, e tetakay pok empat ajiwar fumiam, aamwicirimomfes. E malaikatam e raja fa bemap asanpu bi fop aneyjiapfes, wunam Allah asicimfes. Aram atakam atawfes.

¹²“Atakamnak ara. Ow e darAllah basicimces. Aramat ipic awutnakut ara. Aram amsomnakut. Owam terima kasih atakam awut e aramat ipic baotawces. Owam, ‘Allah akatnakut ara,’ inim baeces. E Allah, takas aomomkurumama. Aram faknakut ara. Bare, a atakam, atakamnak ara.” E malaikat inim aefes.

¹³Wunam, ownucur ipic cowok, atakam dor aotawfan. “E baju fwesak jirow atamwiemtotormes ow, ucim owam? Ar ocenak asan aewenawfes?” Inim aeef.

¹⁴Dor masirin, “Tuan. Dor nomsom opok. O nat, omsom ara.” Inim aeof. E ownucur ipic masirin, atakam dor aotawfan. “Ow, ewamces ow ajurusumawiris. E nat, ewamces ow asan akat aememames. Aram e abaju jirow, e Domba Jiwi ares, acicikimtotorfes. Wunam e baju aporsipor, fwesak afwesakamtiwfes.

¹⁵Inimas jokam, iramam, ar e Allah fa bemap asanpu aatamememawarmes. Aram e Allah e acem aman aatamsicimawarmes. E fa bemap asan ton aemapmar ipic masirin, e ow akac aatamemapawarcema.

¹⁶E fa bemap asanpu aememamar Domba Jiwi, e ow bap ajaromatcema. Ar, e ow, e bwi, capinmi arma apupuismar asanpu bap ajaromatcema. Owam e bwi aances, ar jiwne aatamemawarcemes. Inimas e ow amostonew, bwitonew, boemem opok cowok aememcemes. E jopok amopnakut, e ow dam boneymotomem opok cowok aemcema. Allaham e ow e bwec manem takas aererewtawcema.” E ownucur ipic inim aeef.