Read Central Asmat BAPOROMTAMAS 8 Bible Online

BAPOROMTAMAS 8 - Central Asmat bible

BAPOROMTAMAS 8

¹Bare, e Domba Jiwi e buku bakamimapom pok ketujuh akoromtewef. Akoromtewef masirin, e onam op, setengah jam ajiwarnew camu opok cowok aemamesef.

²Doram e Allah bipu aememames malaikat tujuh ajiwar bi aporof. Allaham fwi tujuh ajiwar e malaikat atatamef.

³Wun malaikat cowok masirin, e Allah pok jis bafamtam jowsepu aenawomef. Aram emas co pok atowomef. E co pok, pinim akat pok batewapom asan ara. Bare, e malaikat, pinim akat pok awut atewef. E pok, e Allah pok jis bafamtam jowse jis bafamtamas ara. E pok jis bafamtam asan, bare emas ara. Eram e raja fa bemap asanpu ara. Bare, e tarowat ow janim Allah aanima aefes, e malaikatam e pok Allah jis afamtama aefes.

⁴Bare, e pinim akat pok jisamwin, e malaikat ban ton apwitometef. E jisamwinam, e ow tarowat janim Allah manimasam, Allah bipu akac atometpwitepfes.

⁵E malaikat masirin, e pinim akat co pok atewef. Aram e Allah pok jis bafamtam jowse jismak atewef. Wunam ar e jismak e capinmi ajumnemef. Wirut masirin, afakayef. Jonutam awumef. Bwerutam apaparamef. Ajowutam asimef.

⁶Wunam, e fwi tujuh ajiwar atowomfes malaikat tujuh ajiwar aememfes. Ar e fwi bam sur aotemfes.

⁷Bare, e bap malaikat e afwi aamef. Fwi aamef masirin, ar jufu es ek arkenakutam, jismakam, dam es epcom aartamtawef. Ar masirin, e pok e capinmi ajujumsamnemef. Bare, e capinmi sepertiga ajiwar sos afayef. Os sepertiga ajiwaram sos afayef. E fumin takasam sos afaykurumef.

⁸Wunam, e malaikat kedua e afwi aamef. Ar pok cowok awutnakut e jicupum bwi ajumnemef.

⁹E bwi aman pok sepertiga ajiwar damir aaffes. E kapal takas sepertiga ajiwaram daniwis aamsetotorfes.

¹⁰Wunam, e malaikat ketiga e afwi aamef. Bayar cowok awutnakut masirin, e onam op ewkoyjuneyef. E bayar, sos pok cimin aaptetereyef. Bare, e bayar e jo takas sepertiga ajiwar aneyjusetotoref. E bayaram e bwi e capinmi arma apupuismar asan takas sepertiga ajiwar aneyjusetotoref.

¹¹E bayar juwas “Asesak Os” ara. E bwi sepertiga ajiwar takas asesak bwi ajaworseef. E bwi, bare asesaknakut ara. Inimas e bwi aanfes ow arkenakut damir aaffes.

¹²Wunam e malaikat keempat e afwi aamef. Allah e jopok poman sepertiga ajiwar jiwic acamtiwef. Aram e pir poman sepertiga ajiwaram, e bayit sepertiga ajiwaram, e bayar sepertiga ajiwaram, jiwic acamtiwef. Inimas e jofay, jok jo jirow opoknakap aemef. Iramam e sereas jirow opoknakap aemef.

¹³Bare, doram manmok atiwof. Dor waraw cowok onam opnakut apief aporof. Dor e waraw e afakaytawef atakam jen ajiof. E atakam, “E wun malaikat mamincop fwi aamcemes. Inimas e capinmi ow, asan pwicaknakutas mamincop ajiwar aemapcemes.” Inim aeef.