Read Central Asmat BAPOROMTAMAS 9 Bible Online

BAPOROMTAMAS 9 - Central Asmat bible

BAPOROMTAMAS 9

¹Bare, e malaikat kelima e afwi aamef. Dor masirin, e capinmi akoyjuneyef bayar cowok aporof. Allah, kunci e bayar atetamef. E kunci e kakunakut jip jimasap bapajimas ara.

²E bayar e jip jimasap apajimef. E jimasap apajimef masirin, jisamwin apwijisef. E jisamwin, bare jowse awutnakut jisamwin cimin ara. E jip apwijisef jisamwinam, e onam op jiwic acamtopomef. Eram e jopok awukapiopef.

³Pimus arkeam e jisamwin aemtepef asan apipineyef. Allah jirsiki, e pimus takas atatamtotoref. E jirsiki, a capinmi cowoc anokos jirsiki awcawor ara.

⁴Allah nat, atakam e pimus aotawef. “Car e capinmi fumin bajurusum arapok. E pok akanam, e osam, bajurusum arapok. Do nat, e wun asmat ow e abipis bi bokomapom opok aemof. Bare, car e ow cowok mamjurusumey.” Inim aeef.

⁵Aramat ipicam, e pimus, e ow desen bajurusum, pir lima ajiwar, atatamef. E nat, ar e ow bacatiw arapoken. E ow ajurusemcesas, bare cowoc anokos, asmat ow sis aatcemar asesak inim cimin ara.

⁶E pir lima ajiwar, ow damir baf jec awucemes. E nat, ar damir bwemaf asan opok. Aram damir baf jak aseremomcemes. E nat, aram damir opokut arew.

⁷E pimus, bare owec bamo aememfes kuda cimin ara. E pimus e akus aporsipor, pok aemaptotorfes. E pok, bare emas pok akatipic cimin ara. E pimus abiam, asmat ow bi cimin ara.

⁸E afinam, bare cepes fin cimin ara. Asisam, singa sis cimin ara.

⁹Aram pok e awu aporsipor ajimomtotorfes. E pok, bare baju besi cimin ara. E pimus jaromak takas, ajutotoref. E ajutotorefas, kereta arke ajucemar cimin ara— er kuda e owec bamo asanpu foronakut ajijimtawcemes kereta ajucemar cimin ara.

¹⁰E pimus ep, bare cowoc anokos ep sis awcawor ara. Inimas ar ow sis aatcema. Ar e arep aman, ow bajurusum fakas, aomomtotorfes. Ar e fakas pir lima ajiwar aomomtotorfes.

¹¹E pimus araja ipic, bare e kakunakut jip manmok atiwmar malaikat ara. Ibrani atakam ara, ajuwas “Abadan” ara. Yunani atakam masirin, ajuwas “Apolion” ara. E juwas daratakam “Daniwis Bemapom Ipic” ara.

¹²E bap asan pwicaknakutas bare. Wun asan pwicaknakutas jamnuk masirin, aoenawcemes.

¹³Bare, e malaikat keenam e afwi aamef. Dor masirin, atakam jen ajiof. E atakam, e Allah pok jis bafamtam jowse fwinic empat ajiwar, akoreyisimef. E jowse, bare emas jowse ara. E jowseam Allah bipu aemapma.

¹⁴E atakam, e fwi epcom malaikat keenam, aotawef. “Allah, malaikat empat ajiwar, e jo awut juwas Efrat, manam ajikapomef. Bare, or e malaikat mamsusurumey.” Inim aeef.

¹⁵Bap ara, Allah, e malaikat empat ajiwar, asmat ow sepertiga ajiwar bacajimirtiw, atakam emetatiwef. Aram e malaikat e ow bacajimirtiw jamam, jofayam, piram, tahunam, atakam emetatiwef. Inimas e malaikat keenam, e wun malaikat empat ajiwar, e ow bacajimirtiw, asusurumtamef.

¹⁶Kuda bak ton ajarfes tentara owam, dua juta ajiwar aememfes. Doram inim atakam jen ajiof.

¹⁷E pok desen aporof ara, dor e kudaam, e kuda bak ton ajarfes owam, inim bi aporof: E kuda bak ton ajarfes ow, baju besi, e awu aporsipor ajimomtotorfes. E baju besi, bare jismak inim esakam ara. Er sosokam, jirpeteyam, ara. E kuda kus takas masirin, singa kus awcawor ara. Jismak komenam, jisamwinam, amopnakut jirpeteyasam, e kuda aporsipor bweyof afistotorfes.

¹⁸E kuda bweyof afistotorfes jismak komenam, jisamwinam, amopnakut jirpeteyasam, bare e asmat asan pwicaknakut bemapomas mamincop ara. Asmat ow sepertiga ajiwaram, e asan pwicaknakut bemapomas mamincop aman, bare damir aaffes.

¹⁹E kuda, asmat ow bacajimirtiw fakas, e abweyof ara. E fakas, e arepam ara. E kuda ep takas, bare amer cimin ara. E kuda ep aporsipor, amer kus epcom cimin ara. Ar masirin, e arep, ow ajurusumfes.

²⁰Bare, e asan pwicaknakut bemapomas aman damir opok ow, e aban akenemapomfesas basicim, barewem opok. Ar e datam, e ēcoām aatamsicimawiris. E ēco, bare emasam, perakam, tembagaaam, ekam, osam, inim pok ara. E nat, e ēco, manmok bwemtiw asan opok. Aram atakam jen bwemji asan opok. Aram bwemjar asan opok.

²¹E ow nat, e sanaw aetiwa aefesasam, e dat epcom ow atakam ji aea aefesam, e cen cemen osom aea aefesasam, e pok osom aea aefesasam, barewem opokut aemfes.