Read Central Bicolano Genesis 1 Bible Online

Genesis 1 - Central Bicolano bible

Genesis 1

¹Sa kapinonan, kan lalangon nin Dios an kalangitan asin an daga,

²an kinaban mayo nin ano man na porma saka laog. An nag-aalimbukay na kadagatan na minatahob kaini napapatos nin kadikloman asin an espiritu nin Dios naghihiro sa ibabaw kan katubigan.

³Nagboot an Dios, “Magkaigwa nin liwanag,” asin nagkaigwa nin liwanag.

⁴Nahiling nin Dios na marahay an liwanag. Isinuhay niya an liwanag sa kadikloman

⁵dangan inapod niyang “Aldaw” an liwanag, asin an kadikloman inapod niyang “Banggi.” Nagkahapon dangan nagkaaga: an enot na aldaw.

⁶Dangan nagboot an Dios, “Magkaigwa nin kahiwasan na masuhay kan katubigan tanganing mamugtak ini sa duwang lugar.”

⁷Nangyari ini. Ginibo nin Dios an kahiwasan na nagsuhay kan tubig na nasa irarom sa tubig na nasa ibabaw.

⁸An kahiwasan inapod niyang “Kalangitan.” Nagkahapon dangan nagkaaga: an ikaduwang aldaw.

⁹Dangan nagboot an Dios, “Magkatiripon sa saro sanang lugar an katubigan sa irarom kan kalangitan tanganing mahiling an mamarang kadagaan,” asin ini nangyari.

¹⁰An mamarang kadagaan inapod niyang “Daga,” asin an nagkatiripon na katubigan inapod niyang “Dagat.” Nahiling nin Dios na ini marahay.

¹¹Dangan nagboot siya, “Magkaigwa sa daga kan gabos na klase nin tinanom na nagtatao nin banhi asin nin kahoy na nagtatao nin bunga.” Nangyari ini.

¹²Kaya nagtaralubo sa daga an gabos na klase nin tinanom asin kahoy, saka nahiling nin Dios na ini marahay.

¹³Nagkahapon dangan nagkaaga: an ikatolong aldaw.

¹⁴Dangan nagboot an Dios, “Magtunga sa kalangitan an mga ilaw tanganing masuhay an aldaw sa banggi, asin tanganing maaraman kun nuarin mapoon an mga aldaw, an mga taon patin an mga panahon.

¹⁵Magliliwanag an mga ini sa kalangitan tanganing magtao nin liwanag sa daga.” Nangyari ini.

¹⁶Kaya ginibo nin Dios an duwang darakulang ilaw: an aldaw na masakop kan bilog na maghapon asin an bulan na masakop kan bilog na banggi; ginibo man niya an mga bitoon.

¹⁷Ibinugtak niya sa kalangitan an mga ilaw tanganing magtao nin liwanag sa daga,

¹⁸magsakop kan aldaw saka banggi, asin magsuhay kan liwanag sa kadikloman. Nahiling nin Dios na ini marahay.

¹⁹Nagkahapon dangan nagkaaga: an ikaapat na aldaw.

²⁰Dangan nagboot an Dios, “Magkaigwa nin manlaen-laen na may buhay an katubigan asin nin manlaen-laen na gamgam an kaitaasan.”

²¹Kaya linalang nin Dios an mga darakula saka makangirhat na linalang sa katubigan, an gabos na nabubuhay diyan asin an gabos na klase nin gamgam. Nahiling nin Dios na ini marahay.

²²Benendisyonan niya ini gabos asin tinaraman, “Magdakul kamo asin panoon nindo an kadagatan asin magdakul man an mga gamgam sa daga.”

²³Nagkahapon dangan nagkaaga: an ikalimang aldaw.

²⁴Dangan nagboot an Dios, “Magkaigwa sa daga kan gabos na hayop: manso asin lalaw, dakula saka sadit,”—asin nangyari ini.

²⁵Kaya ginibo nin Dios ini gabos asin nahiling niya na ini marahay.

²⁶Dangan nagtaram an Dios, “Ngunyan gibohon ta an katawohan sa satong ladawan; gibohon ta sindang arog sato. Magkakaigwa sinda nin kapangyarihan sa mga sira, sa mga gamgam, asin sa gabos na hayop, manso man o lalaw, dakula man o sadit.”

²⁷Kaya linalang nin Dios an katawohan siring sa saiyang ladawan; linalang niya sindang lalaki asin babae.

²⁸Benendisyonan niya sinda dangan tinaraman, “Magmabinunga asin magdakul kamo; panoon nindo an bilog na kinaban asin pamahalaan iyan. Magkaigwa kamo nin kapangyarihan sa mga sira, sa mga gamgam asin sa gabos na hayop.

²⁹Itinatao ko saindo an gabos na klase nin tinanom na nagtatao nin banhi asin nin mga kahoy na nagtatao nin bunga; iyan an saindong magigin pagkakan.

³⁰Sa gabos na hayop asin gamgam, itinatao ko an mga doot saka an mga madahon na tinanom, bilang pagkakan.” Nangyari ini.

³¹Nahiling nin Dios na an gabos niyang ginibo orog karahay. Nag-aga dangan naghapon—iyo idto an ikaanom na aldaw.