Read Central Bicolano Genesis 13 Bible Online

Genesis 13 - Central Bicolano bible

Genesis 13

¹Pakahale sa Egipto, naglakaw si Abram pasiring sa habagat na parte kan Canaan kaiba an saiyang agom asin an gabos niyang rogaring; nag-iba man saiya si Lot.

²Mayaman nang marahay si Abram huli ta kadakul na kan saiyang mga hayop, plata asin bulawan.

³Hale sa duman, nagpadagos siyang maglakaw sagkod na makaabot sa pagultanan kan Betel asin Ai, sa lugar na tinugdokan niya kaidto kan saiyang tolda,

⁴asin pinatindogan niya nin altar. Duman nagsamba si Abram sa Kagurangnan.

⁵Si Lot, na nag-iba ki Abram, igwa man nin mga karnero, kanding asin baka. Igwa man siya nin pamilya asin mga oripon.

⁶Huli ta kadakul na kan mga hayop na pagsadiri ni Abram asin ni Lot, an daga dai na magkanigo para sa saindang duwa.

⁷Kaya nagkaigwa nin pag-iriwal an mga pastor ni Abram asin ni Lot. (Kaidto, an mga Cananeo asin Perezeo iyo an nag-eerok sa lugar na idto.)

⁸Dangan sinabihan ni Abram si Lot, “Magkadugo kitang duwa, kaya dai dapat na mag-iriwal an satong mga pastor.

⁹Mas marahay pang magsuhay kita; pilion mo an arin man na parte kan daga na magustohan mo; kun pumawala ka, mapatoo ako; kun pumatoo ka, mapawala ako.”

¹⁰Nangalagkalag si Lot asin nahiling niya na mayaman sa tubig an bilog na Kapantayan nin Jordan sagkod sa Zoar, arog kan tatamnan kan Kagurangnan o arog kan daga nin Egipto. (Ini an kamugtakan kan daga bago tunawon nin Kagurangnan an Sodoma asin an Gomorra.)

¹¹Kaya pinili ni Lot an bilog na Kapantayan nin Jordan, asin naglakaw siya pasiring sa sirangan; sa siring na paagi nagsuhay sindang duwa.

¹²Nagpawalat si Abram sa Canaan mantang si Lot nag-erok sa mga syudad duman sa kapantayan na harani sa Sodoma.

¹³An nag-eerok sa Sodoma mga maraot na tawo asin mga parakasala sa Kagurangnan.

¹⁴Pakahale ni Lot, nagtaram an Kagurangnan ki Abram, “Mangalagkalag ka sa palibot mo,

¹⁵huli ta an gabos na daga na nahihiling mo itatao ko sa saimo asin sa mga kapagarakian mo sagkod lamang.

¹⁶Papadakulon ko siring sa alpog kan daga an saimong mga kapagarakian. Dai nin makakabilang sainda huli ta mayo nin makakabilang kan alpog kan daga.

¹⁷Lakaw asin hilinga an bilog na daga ta itatao ko gabos iyan saimo.”

¹⁸Kaya naghale duman si Abram asin nag-erok harani sa sagradong mga kahoy ni Mamre sa Hebron. Nagpatindog siya nin altar duman para sa Kagurangnan.