Read Central Bicolano Genesis 19 Bible Online

Genesis 19 - Central Bicolano bible

Genesis 19

¹Kan mag-abot sa Sodoma an duwang anghel kan bangging idto, si Lot nagtutukaw sa may trangkahan kan syudad. Kan mahiling niya sinda, nagtindog siya asin sinabat sinda. Nagduko siya sa atubang ninda

²dangan nagsabi, “Mga kagurangnan ko, nakikimaherak akong mag-ontok ngona kamo sa harong ko; hanawan nindo an saindong bitis asin magpahingalo kamo. Dangan, pwede kamong magmatang amay asin magpadagos sa paglakaw.” Nagsimbag sinda, “Dai na; sa tinampo na sana kami mapaaga.”

³Alagad pinirit sinda ni Lot kaya uminiba na sana sinda saiya asin nagdagos sa saiyang harong. Pinagbotan ni Lot an saiyang oripon na magluto nin tinapay asin mag-andam nin pagkakan para sa mga bisita. Kan andam na, nagkarakan sinda.

⁴Kan makatorog na sinda, pinalibotan an harong ni Lot kan kalalakihan nin Sodoma. Idtoon duman an gabos na lalaki, aki asin gurang.

⁵Inapod ninda si Lot asin hinapot, “Haen an mga lalaking nakikitorog diyan saimo? Paluwasa sinda tanganing samong madorogan.”

⁶Linuwas sinda ni Lot dangan sinerahan an pinto.

⁷Sinabihan niya sinda, “Mga tugang, nakikimaherak ako, dai nindo paggibohon an siring na karatan.

⁸Igwa ako nin duwang aking babae na anas pa birhen; iluluwas ko sinda sa saindo asin gibohon nindo sa sainda an gusto nindong mangyari, alagad dai nindo paggibohan nin ano man an mga lalaking ini. Mga bisita ko sinda asin kaipuhan na ingatan ko.”

⁹Alagad nagsabi sinda, “Hale diyan! Dayuhan ka sana digdi asin mayo kang deretsong magsabi samo kaiyan. Hale diyan ta tibaad mas maraot pa an mangyari saimo ki sa mga bisita mo.” Itinuklang ninda si Lot tanganing gabaon an pinto.

¹⁰Alagad binutong si Lot palaog kan saiyang mga bisita dangan sinerahan an pinto.

¹¹Pakatapos, binuta kan duwang anghel an gabos na lalaki duman sa luwas kaya dai ninda nahiling an pinto.

¹²Dangan sinabihan si Lot kan duwa niyang bisita, “Kun igwa ka pang pag-iriba digdi—mga aki, mga manugang o iba pang kadugo na nag-eerok sa syudad—pahaleon mo sinda digdi,

¹³huli ta tutunawon mi an lugar na ini. Nadangog nin Kagurangnan an gabos na sumbong laban sa mga nag-eerok sa Sodoma asin sinugo niya kami tanganing tunawon ini.”

¹⁴Kaya dinuman ni Lot an mga lalaking gustong mag-agom kan duwa niyang daraga asin sinabihan, “Maghale tolos kamo digdi; tutunawon nin Kagurangnan an syudad na ini.” Alagad an mga ini naghona na nagkakalwag sana si Lot.

¹⁵Kan nagbabanaag na an aldaw, pinahidali kan mga anghel si Lot. “Dalian mo!” an sabi ninda. “Ipag-iba mo an saimong agom asin an duwa mong aking daraga dangan humale na kamo tanganing dai kamo magkagaradan kun tunawon na an syudad.”

¹⁶Nagduwa-duwa si Lot, alagad naherak saiya an Kagurangnan, kaya kinapotan kan duwang anghel an saiyang kamot asin an kamot kan saiyang agom saka kan saiyang mga aki dangan ilinuwas sinda sa syudad.

¹⁷Pakatapos, nagsabi an sarong anghel, “Dulag na kamo! Ligtasan an saindong buhay! Dai kamo magsalingoy asin dai kamo mag-ontok sa kapantayan. Magduman kamo sa kabubuldan tanganing dai kamo magadan.”

¹⁸Alagad nagsimbag si Lot, “Kagurangnan ko, hare man kami pagpagiboha kaiyan;

¹⁹nawilihan mo ako asin naherakan, kaya ilinigtas mo an sakong buhay; alagad harayong marahay an kabubuldan, tibaad dai pa ako nakakaabot duman abotan na ako kan kapahamakan asin magadan ako.

²⁰Nahihiling mo an sadit na banwaan na idto? Mas harani idto; tugote akong magduman. Sadit sana an lugar asin magigin ligtas ako duman.”

²¹Nagsimbag an anghel, “Sige, tinutugotan taka. Dai ko raraoton an banwa na sinabi mo.

²²Alagad maghidali ka, huli ta dai akong magiginibo sagkod na dai ka pa nakakaabot duman.” Kaya an lugar nginaranan Zoar huli ta inapod ini ni Lot na sadit.

²³Nagsisirang na an aldaw kan makaabot si Lot sa Zoar.

²⁴Dangan, an Sodoma asin an Gomorra pinauranan nin Kagurangnan nin nagkakalayong asupre.

²⁵Natunaw an duwang syudad asin an bilog na kapantayan, kaiba an gabos na tawo asin an mga tinanom na nabubuhay duman.

²⁶Alagad nagsalingoy an agom ni Lot kaya nagin sarong hariging asin siya.

²⁷Amay pa kan sunod na aldaw, naghidali si Abraham sa lugar na tinindogan niya sa atubang nin Kagurangnan.

²⁸Nagdungaw siya sa Sodoma saka sa Gomorra patin sa bilog na kapantayan asin nahiling niya an aso na nag-iitaas hale sa daga, siring sa aso na gikan sa sarong dakulang horno.

²⁹Alagad kan tunawon nin Dios an mga syudad sa kapantayan na pinag-erokan ni Lot, nagiromdoman nin Dios si Abraham, asin itinugot niyang makaligtas si Lot.

³⁰Natakot si Lot na mag-erok sa Zoar, kaya ipinag-iba niya an duwa niyang aking daraga asin nagtukad sinda sa kabubuldan dangan nag-erok sa sarong lungib.

³¹Nagsabi sa saiyang tugang an matuang aki ni Lot, “Gurang na an satong ama asin mayong lalaki sa dagang ini na pwedeng mag-agom sato tanganing magkaaki kita.

³²Marahay pang buraton ta an satong ama tanganing madorogan ta siya asin magkaaki kita huli saiya.”

³³Kaya kan bangging idto, pinainom siya ninda nin arak dangan dinorogan kan matua niyang aki. Alagad dai ini naaraman ni Lot huli ta burat siya nin marahay.

³⁴Sunod na aldaw, nagsabi sa saiyang tugang an matuang aki ni Lot, “Dinorogan ko siya kasubanggi; buraton ta siya giraray ngunyan na banggi asin ika man an magdorog saiya tanganing pareho kitang magkaigwa nin aki sa satong ama.”

³⁵Kaya kan bangging idto, binurat giraray ninda an saindang ama asin an ngohod na man an nagdorog saiya. Siring kan enot na banggi, dai nakaaram si Lot kan nangyari.

³⁶Kaya nagbados an duwang daragang aki ni Lot huli sa saindang ama.

³⁷An matua nag-aki nin lalaki na saiyang nginaranan Moab; ini an ginikanan kan mga tawo na ngunyan inaapod Moabita.

³⁸An ngohod nag-aki man nin lalaki na saiyang nginaranan Ben-ammi; ini an ginikanan kan mga tawo na ngunyan inaapod Ammonita.