Read Central Bicolano Genesis 2 Bible Online

Genesis 2 - Central Bicolano bible

Genesis 2

¹Kaya nahaman an kalangitan asin an daga.

²Kan matapos nin Dios an gabos niyang gibo, nagpahingalo siya sa ikapitong aldaw.

³Kaya benendisyonan niya asin pinabanal an ikapitong aldaw, huli ta sa aldaw na iyan nagpahingalo siya sa gabos niyang gibo nin paglalang.

⁴Siring kaini an pagkalalang kan kalangitan asin kan daga. Kan gibohon nin Kagurangnan Dios an kalangitan asin an daga,

⁵mayo nin ano man na tinanom asin banhi na nagtalubo sa ibabaw nin daga, huli ta dai pa niya pinapauran asin mayo pa nin mag-aataman;

⁶alagad an tubig hale sa irarom kan daga iyo an nakakadumog sa daga.

⁷Dangan nagkua nin kabokabo hale sa daga an Kagurangnan Dios; pinorma niyang tawo asin hinangosan sa dungo kan hinangos nin buhay asin an tawo nagin sarong buhay na linalang.

⁸Dangan nagbugtak an Kagurangnan Dios nin sarong tatamnan sa Eden sa parteng sirangan, asin duman niya ibinugtak an tawo na saiyang ginibo.

⁹Pinatalubo niya duman an manlaen-laen na kahoy na magayon paghilingon asin nagtatao nin masiram na bunga. Sa tahaw kan tatamnan idtoon an kahoy na nagtatao nin buhay, saka an kahoy na nagtatao nin pakaaram kan marahay asin kan maraot.

¹⁰May sarong salog na nagbubulos sa Eden asin nagpapatubig kan tatamnan; pakaluwas sa Eden minasanga ini asin nagigin apat na salog.

¹¹An enot iyo an Pison; minabulos ini sa palibot kan daga nin Havila.

¹²Digdi makukua an purong bulawan, an mga pambihirang pahamot asin mga batong oniks.

¹³An ikaduwa iyo an Gihon na minabulos sa palibot kan daga nin Cus

¹⁴An ikatolo iyo an Tigris na minabulos sa sirangan kan Asiria asin an ikaapat iyo an Eufrates.

¹⁵Dangan ibinugtak nin Kagurangnan Dios an tawo sa tatamnan nin Eden tanganing pangatamanon asin bantayan ini.

¹⁶Tinaraman niya an tawo, “Pwede mong kakanon an bunga kan arin man na kahoy digdi

¹⁷alagad dai ka nanggad magkakan kan bunga kan kahoy nin pakaaram kan marahay asin maraot; sa oras na magkakan ka, magagadan ka.”

¹⁸Dangan nagtaram an Kagurangnan Dios, “Bakong marahay na magsolo-solo an tawo. Magibo ako nin sarong maninigong kaibahan niya na makakatabang saiya.”

¹⁹Hale sa daga ginibo nin Kagurangnan Dios an gabos na hayop asin gamgam dangan dinara niya an mga ini sa tawo tanganing ngaranan; an inginaran sainda iyo na an pag-apod sainda.

²⁰Kaya nginaranan kan tawo an gabos na gamgam asin hayop alagad dai siya nakakua nin sarong maninigong kaibahan na makakatabang saiya.

²¹Kaya pinatorog nin Kagurangnan Dios an tawo asin mantang torog pa ini, kuminua siya nin sarong gusok dangan isinara niya an laman.

²²Guminibo siya nin sarong babae hale sa gusok asin dinara niya ini sa lalaki.

²³Dangan nagsabi an lalaki, “Ini nanggad an tolang kan sakong tolang asin an laman kan sakong laman. Aapodon siyang ‘Babae’ huli ta kinua siya hale sa lalaki.”

²⁴Kaya babayaan nin lalaki an saiyang ama saka ina dangan masaro sa saiyang agom na babae, asin sindang duwa magigin saro.

²⁵An lalaki asin babae parehong huba, alagad dai sinda nasopog.