Read Central Bicolano Genesis 20 Bible Online

Genesis 20 - Central Bicolano bible

Genesis 20

¹Hale sa Mamre, nagpasiring sa habagat na parte kan Canaan si Abraham asin nag-erok sa pagultanan kan Kades asin Sur. Kan nag-eerok na siya sa Gerar,

²ipinamidbid niya bilang tugang an saiyang agom na si Sara. Kaya ipinakua si Sara ni Abimelek na hade nin Gerar.

³Sarong banggi, nagpahiling an Dios ki Abimelek sa pangatorogan asin nagtaram, “Magagadan ka huli ta kinua mo an babaeng ini na may agom.”

⁴Alagad dai pa nararanihan ni Abimelek si Sara kaya nagsabi siya, “Kagurangnan, mayo akong kasalan! Gagadanon mo daw ako asin an sakong banwaan?

⁵Si Abraham mismo an nagsabing tugang niya si Sara, asin iyo man an sabi kan babaeng ini. Malinig an sakong konsyensya asin mayo akong naginibong maraot.”

⁶Nagsimbag an Dios sa pangatorogan, “Aram kong malinig an saimong konsyensya kaya dai ko itinugot na magkasala ka sako asin madotdot mo siya.

⁷Kaya ngunyan ibalik mo siya sa saiyang agom na si Abraham. Saro siyang propeta asin ipapamibi ka niya tanganing dai ka magadan. Alagad kun dai mo ibalik si Sara, magagadan ka asin an gabos mong nasasakopan.”

⁸Amay pa kan sunod na aldaw inapod ni Abimelek an gabos niyang opisyal dangan inosipan kan nangyari. Natakot sinda

⁹kaya inapod ni Abimelek si Abraham asin sinabihan, “Ano ining ginibo mo samo? Ano an nagin kasalan ko saimo ta dinara mo sako asin sa bilog kong nasasakopan an kapahamakan na ini? Ginibo mo sa sako an mga bagay na dai dapat gibohon.

¹⁰Tadaw ta ginibo mo idto?”

¹¹Nagsimbag si Abraham, “An paghona ko mayo nin siisay man digdi na may pagkatakot sa Dios, asin gagadanon ninda ako tanganing makua an sakong agom.

¹²Totoo na tugang ko si Sara. Aki siya kan sakong ama, alagad bako kan sakong ina, asin inagom ko siya.

¹³Kaya kan pahaleon ako nin Dios sa harong kan sakong ama, sinabihan ko siyang, ‘Saen man kita makaabot ikakapahiling mo an saimong pagkamaimbod sako sa pagsabi sa kiisay man na tugang mo ako.”’

¹⁴Ibinalik ni Abimelek si Sara ki Abraham dangan tinawan pa niya ini nin mga karnero, mga baka, asin mga oripon.

¹⁵Sinabihan ni Abimelek si Abraham, “Uya an bilog kong daga; mag-erok ka kun saen mo gusto.”

¹⁶Sinabihan man niya si Sara, “Tinawan ko an tugang mo nin sangribong pedasong plata bilang patotoo sa gabos mong kairiba na ika inosente; maaaraman ninda na mayo kang kasalan.”

¹⁷Dangan namibi sa Dios si Abraham asin binulong nin Dios si Abimelek. Binulong man nin Dios an agom kan hade asin an mga oripon na babae tanganing magkaaki sinda,

¹⁸huli ta pinadusahan nin Kagurangnan na dai mangaki an mga babae sa palasyo ni Abimelek huli kan nangyari ki Sara na agom ni Abraham.