Read Central Bicolano Genesis 23 Bible Online

Genesis 23 - Central Bicolano bible

Genesis 23

¹Nabuhay si Sara sa laog nin syento beynte y syeteng taon.

²Nagadan siya sa Kiriat-arba na inaapod man Hebron sa daga nin Canaan. Ipinagmondo asin tinangisan ni Abraham an saiyang pagkagadan.

³Binayaan niya an saiyang gadan na agom asin nagduman siya sa mga Heteo. Nagsabi siya sainda,

⁴“Dayuhan ako digdi na nakikihimanwa sa saindo; pabakalan nindo ako nin daga tanganing ikalubong ko an sakong agom.”

⁵Nagsimbag sinda,

⁶“Dangoga kami, kagurangnan. Minimidbid mi ika bilang sarong dakulang lider kaya ilubong mo an saimong agom sa pinakamarahay ming lulubngan. Mayo nin siisay man sa samo na masayuma saimo kan saiyang lulubngan o maolang saimo sa paglubong kan saimong gadan.”

⁷Nagduko si Abraham sa atubang kan mga Heteo

⁸dangan nagsabi, “Kun tugot kamong digdi ko ilubong an sakong agom, kaolayon nindo si Efron na aking lalaki ni Zohar

⁹tanganing ipabakal niya sako an lungib nin Macpela na sadiri niya; nasa poro ini kan saiyang oma. Kaolayon nindo siya na sa atubang nindo, babakalon ko idto saiya sa presyong gusto niya tanganing masadirihan ko bilang lulubngan.”

¹⁰Kan oras na iyan, kaibahan si Efron kan mga Heteo na nagtutukaw sa may trangkahan kan syudad. Sinimbag niya si Abraham sa pandangog kan gabos,

¹¹“Dangoga ako, kagurangnan; sa atubang kan sakong mga kahimanwa, itatao ko saimo an bilog na oma asin an lungib na yaon duman tanganing ikalubong mo an saimong agom.”

¹²Alagad nagduko si Abraham sa atubang kan mga Heteo

¹³asin nagsabi ki Efron sa pandangog kan gabos, “Dangoga ngona ako; babakalon ko an bilog na oma. Akoa an kabayadan tanganing ikalubong ko duman an sakong agom.”

¹⁴Nagsimbag si Efron,

¹⁵“Kagurangnan, para sa satong duwa, ano na an daga na nagkakahalaga nin kwatro syentos na pedasong plata? Ilubong mo na duman an saimong agom.”

¹⁶Nag-oyon si Abraham kaya tinimbang niya an halagang sinambit ni Efron sa atubang kan mga tawo—kwatro syentos na pedasong plata, sosog sa kinaugalean na timbang na ginagamit kan mga negosyante.

¹⁷Kaya nasadirihan ni Abraham an rogaring ni Efron duman sa Macpela, sa sirangan nin Mamre. Nabakal niya an daga kaiba an oma, an lungib asin an gabos na kahoy na nasa laog kan daga.

¹⁸Minidbid kan gabos na Heteo na nagtiripon duman na an daga sadiri na ni Abraham.

¹⁹Dangan ilinubong ni Abraham an saiyang agom na si Sara sa lungib nin Macpela harani sa Mamre, na inaapod man Hebron, sa daga nin Canaan.

²⁰Kaya an oma na dating pagsadiri kan mga Heteo asin an lungib duman nagin pagsadiri ni Abraham asin ginibo niya ining lulubngan.