Read Central Bicolano Genesis 26 Bible Online

Genesis 26 - Central Bicolano bible

Genesis 26

¹Nagkaigwa nin gutom sa daga, na laen man kan naenot na gutom kan panahon ni Abraham. Nagduman si Isaac sa Gerar, ki Abimelek na hade kan mga Filistio.

²Nagpahiling an Kagurangnan ki Isaac asin nagtaram, “Dai ka magduman sa Egipto; mag-erok ka sa daga na itataram ko saimo.

³Mag-erok ka sa dagang ini; iibahan asin bebendisyonan taka. Itatao ko saimo asin sa mga kapagarakian mo an bilog na dagang ini, asin ootobon ko an sakong panuga sa saimong ama na si Abraham.

⁴Papadakulon ko siring sa mga bitoon sa kalangitan an saimong mga kapagarakian asin itatao ko sa sainda an bilog na teritoryong ini. Sa paagi ninda, bebendisyonan ko man an gabos na nasyon sa daga.

⁵Bebendisyonan taka, huli ta nagsunod sako si Abraham asin inotob niya an gabos kong mga togon asin mga pagboot.”

⁶Kaya nag-erok si Isaac sa Gerar.

⁷Kan hapoton siya kan kalalakihan duman manongod sa saiyang agom, nagsimbag siya na tugang niya ini. Dai niya inako na agom ini, huli ta takot siyang gadanon kan mga lalaki duman tanganing makua sana si Rebecca na magayon nin marahay.

⁸Kan haloy-haloy nang nag-erok si Isaac duman, nagdungaw sa bintana si Hadeng Abimelek asin nahiling niyang nagdodorog si Isaac asin si Rebecca.

⁹Kaya ipinaapod ni Abimelek si Isaac dangan sinabihan, “Agom mo palan si Rebecca! Tano ta nagsabi kang tugang mo siya?” Nagsimbag si Isaac, “Hona ko kaya, gagadanon ako kun sabihon kong agom ko siya.”

¹⁰Naghapot si Abimelek, “Ano ining ginibo mo samo? Pasil kutanang madorogan an saimong agom kan saro sa mga tawohan ko, asin kun nangyari ini, ika an babasolon.”

¹¹Kaya pinatanidan ni Abimelek an gabos na tawo: “Gagadanon an siisay man na mag-api sa lalaking ini o sa saiyang agom.”

¹²Nag-oma duman si Isaac, asin sa taon na idto, nag-ani siya nin sanggatos na beses kan itinanom niya, huli ta benendisyonan siya nin Kagurangnan.

¹³Padagos siyang nag-uswag asin nagyaman nin marahay.

¹⁴Naara saiya an mga Filistio huli kan kadakul niyang rogaring na hayop asin mga sorogoon.

¹⁵Kaya tinahoban kan mga Filistio an gabos na bubon na kinalot kan mga sorogoon kan ama ni Isaac na si Abraham kan buhay pa ini.

¹⁶Dangan sinabihan ni Abimelek si Isaac, “Humale ka sa samong daga huli ta mas mapangyari ka na ki sa samo.”

¹⁷Kaya naghale si Isaac sa dagang idto asin nagkampo sa Kapantayan nin Gerar asin nag-erok duman.

¹⁸Kinalot niya giraray an mga bubon na tinahoban kan mga Filistio, na kinalot sa panahon kan ama niyang si Abraham. Nginaranan niya an mga bubon kan parehong ngaran na itinao kan saiyang ama.

¹⁹Nagkalot pa nin bubon duman sa kapantayan an mga sorogoon ni Isaac asin nakakua sinda nin tubig.

²⁰Alagad iniwal an mga pastor ni Isaac kan mga pastor sa Gerar na nagsasabi, “Samo an tubig na ini.” Kaya Esek an inginaran ni Isaac sa bubon, huli ta iniwal siya ninda.

²¹Nagkalot giraray nin bubon an mga sorogoon ni Isaac, asin arog kan enot na nangyari, pinag-iriwalan man idto. Kaya Sitna an inginaran ni Isaac sa bubon.

²²Naghale duman si Isaac asin nagkalot giraray nin bubon. Ini dai na pinag-iriwalan kaya inapod niyang Rehobot, huli ta olay niya, “Tinawan kita nin Kagurangnan nin lugar sa dagang ini asin magigin mauswag kita digdi.”

²³Hale duman nagpasiring si Isaac sa Beer-sheba.

²⁴Kan bangging idto, nagpahiling saiya an Kagurangnan asin nagtaram, “Ako an Dios kan saimong ama na si Abraham. Dai ka matakot, huli ta kaiba mo ako. Bebendisyonan taka asin papadakulon ko an saimong mga kapagarakian huli ki Abraham na sorogoon ko.”

²⁵Kaya nagtugdok duman nin altar si Isaac asin nagsamba sa Kagurangnan. Duman na siya nag-erok, asin nagkalot duman nin saro pang bubon an saiyang mga sorogoon.

²⁶Hale sa Gerar, nagduman si Abimelek ki Isaac, kaiba si Ahuzzat na saiyang parahatol asin si Ficol na pamayo kan saiyang hukbo.

²⁷Hinapot sinda ni Isaac, “Tano ta nagdirigdi kamo? Bakong naoongis kamo sako asin pinahale nindo ako sa saindong daga?”

²⁸Nagsimbag sinda, “Nahiling mi ngunyan na kaiba mo an Kagurangnan, kaya samong naisip na dapat magkaigwa kita nin kontrata

²⁹na dai mo kami gigibohan nin maraot. Nagin marahay kami saimo asin matoninong mi ikang pinahale. Mayong duda na benendisyonan ka nin Kagurangnan.”

³⁰Kaya nag-andam nin bangkete si Isaac para sa sainda asin nagkakan saka nag-inoman sinda.

³¹Pagkaaga, amay sindang nagmata asin sinda gabos nanumpa sa lambang saro; dinespedir sinda ni Isaac asin nagburulag sinda bilang mga magkatood.

³²Kan aldaw na iyan, nag-abot an mga sorogoon ni Isaac asin nag-osip saiya manongod kan bubon na kinalot ninda. Olay ninda, “Nakakua kami nin tubig.”

³³An bubon nginaranan Sheba ni Isaac; kaya sagkod ngunyan an syudad inaapod Beer-sheba.

³⁴Kan kwarenta na an edad ni Esau, inagom niya si Judith na aki ni Beeri na Heteo asin si Basemat na aki ni Elon na saro pang Heteo.

³⁵Huli sainda, nagin mapait an buhay ni Isaac asin ni Rebecca.