Read Central Bicolano Genesis 29 Bible Online

Genesis 29 - Central Bicolano bible

Genesis 29

¹Nagpadagos sa paglakaw si Jacob asin nakaabot sa daga kan mga taga sirangan.

²Mantang nangangalagkalag siya, nahiling niya an sarong bubon sa oma asin an tolong grupo nin mga karnero na nagloloko sa palibot kan bubon. Digdi sa bubon na ini, na nalulukdoan nin dakulang gapo, pinapainom an mga karnero.

³Kun nagkakatiripon na an gabos na karnero, tarabang na hinahale kan mga pastor an dakulang gapo dangan pinapainom an mga karnero; pakatapos, ibinabalik ninda an lukdo sa bubon.

⁴Hinapot ni Jacob an mga pastor, “Mga tugang, mga taga saen kamo?” Nagsimbag sinda, “Taga Haran.”

⁵Naghapot giraray si Jacob, “Midbid nindo si Laban na aking lalaki ni Nahor?” Nagsimbag sinda, “Midbid mi.”

⁶“Komusta siya?” an hapot ni Jacob. Nagsimbag sinda, “Marahay man, asin uya, nagdadangadang si Rachel na aki niyang daraga kaiba an mga karnero kan saiyang ama.”

⁷Nagsabi siya, “Nin huli ta halangkaw pa an aldaw, asin dai pa dapat ipuli an mga hayop, tadaw ta dai ngona nindo pinapainom saka pinapasabsab an mga karnero?”

⁸Nagsimbag sinda, “Dai mi magigibo iyan sagkod na dai nagkakatiripon an gabos na karnero asin sagkod na dai pa nahahale an dakulang gapo; dangan mi mapapainom an mga karnero.”

⁹Mantang kaolay ni Jacob an mga pastor, nag-abot si Rachel kaiba an inaataman niyang mga karnero na sadiri kan saiyang ama.

¹⁰Kan mahiling ni Jacob si Rachel kaiba an mga karnero ni Laban na tugang ni Rebecca, nagduman siya sa bubon, hinale an lukdo na gapo asin pinainom an mga karnero ni Laban.

¹¹Dangan hinadokan niya si Rachel asin naghibi sa kaogmahan.

¹²Sinabihan niya si Rachel, “Sobrino ako kan saimong ama, aki ako kan tiya mong si Rebecca.” Nagpuli tolos si Rachel asin inosipan an saiyang ama.

¹³Kan madangog ni Laban an bareta, naghidali siya sa pagsabat ki Jacob. Kinugos niya ini asin hinadokan dangan ipinag-iba sa saiyang harong. Inistorya ni Jacob ki Laban an gabos na nangyari,

¹⁴asin nagsabi ini, “Tunay nanggad na laman ka nin sakong laman asin dugo nin sakong dugo.” Duman na nag-erok si Jacob sa laog nin sarong bulan.

¹⁵Nagsabi si Laban ki Jacob, “Maski sobrino taka, sala na magtrabaho ka sako na mayong bayad. Kaya magsabi ka kun gurano an isusweldo ko saimo.”

¹⁶Si Laban igwang duwang aking daraga: si Lea an matua, asin si Rachel an ngohod.

¹⁷Magayon an mga mata ni Lea, alagad mas magayon si Rachel.

¹⁸Namoot si Jacob ki Rachel, kaya nagsabi siya ki Laban, “Malingkod ako saimo sa laog nin pitong taon kun ipaagom mo sako an ngohod mong aking si Rachel.”

¹⁹Nagsimbag si Laban, “Mas marahay pang itao ko siya saimo ki sa ibang lalaki; digdi ka sako.”

²⁰Kaya nagmanugang ki Laban si Jacob para ki Rachel sa laog nin pitong taon na garo sana nagkapirang aldaw huli kan pagkamoot niya ki Rachel.

²¹Dangan sinabihan ni Jacob si Laban, “Tapos na an panahon nin sakong paglingkod; ipakasal mo na sako an saimong aki.”

²²Kaya tiniripon ni Laban an gabos na kalalakihan sa lugar na idto asin nagbangkete siya.

²³Alagad kan bangging idto, dinara ni Laban ki Jacob si Lea, asin dinorogan ini ni Jacob.

²⁴(Itinao ni Laban ki Lea an oripon niyang babaeng si Zilpa tanganing magin saiyang katabang.)

²⁵Pagkaaga, nahiling ni Jacob na an kadorog niya iyo si Lea, kaya sinabihan niya si Laban, “Ano ining ginibo mo sako? Bakong nagmanugang ako saimo para ki Rachel? Tano ta dinaya mo ako?”

²⁶Nagsimbag si Laban, “Bakong ugale digdi na enot na ipaagom an ngohod.

²⁷Taposon mo ngona an sarong semanang selebrasyon nin pagkasal, dangan itatao mi saimo si Rachel, kun paglilingkodan mo giraray ako nin pitong taon.”

²⁸Nag-oyon si Jacob, kaya kan tapos na an sarong semana nin selebrasyon, itinao ni Laban an saiyang aking si Rachel ki Jacob bilang agom.

²⁹(Itinao ni Laban ki Rachel an oripon niyang babaeng si Bilha tanganing magin saiyang katabang.)

³⁰Dinorogan man ni Jacob si Rachel asin namotan niya ini nin labi pa ki Lea. Dangan naglingkod siya ki Laban nin pito pang taon.

³¹Kan mahiling nin Kagurangnan na pinaorog ni Jacob si Rachel, pinagmarahay niyang magkaaki si Lea alagad ginibo niyang baog si Rachel.

³²Kaya nagbados si Lea asin nag-aki nin sarong lalaki na nginaranan niyang Ruben, huli ta nagsabi siya, “Nahiling nin Kagurangnan an sakong kasakitan asin ngunyan mamomotan na ako kan sakong agom.”

³³Nagbados siya giraray asin nag-aki nin lalaki. Nagsabi siya, “Itinao pa sako an aking ini huli ta nadangog nin Kagurangnan na ikinakaongis ako;” kaya an aki nginaranan niyang Simeon.

³⁴Nagbados siya giraray asin nag-aki nin lalaki. Olay niya, “Ngunyan, orog na kuminosog an bugkos kan samong pag-inagoman, huli ta natawan ko na siya nin tolong aking lalaki;” kaya an aki nginaranan niyang Levi.

³⁵Nagbados naman siya asin nag-aki nin lalaki. Olay niya, “Ngunyan, oomawon ko an Kagurangnan;” kaya an aki nginaranan niyang Juda; dangan dai na siya nag-aki.