Read Central Bicolano Genesis 3 Bible Online

Genesis 3 - Central Bicolano bible

Genesis 3

¹Sa gabos na hayop na ginibo nin Kagurangnan Dios, an halas an pinakatuso. Hinapot kan halas an babae, “Totoo mananggad na tinaraman kamo nin Dios na dai magkakan kan bunga kan arin man na kahoy sa laog kan tatamnan?”

²Nagsimbag an babae, “Pwede ming kakanon an bunga kan arin man na kahoy sa laog kan tatamnan

³alagad tinaraman kami nin Dios na dai nanggad kami magkakan o magdotdot kan bunga kan kahoy sa tahaw kan tatamnan; kun gibohon mi iyan, magagadan kami.”

⁴Alagad nagsimbag an halas, “Bakong totoo iyan; dai kamo magagadan.

⁵Itinaram iyan nin Dios huli ta aram niya na sa oras na kumakan kamo kaiyan, makakaarog kamo sa Dios asin maaaraman na nindo an marahay asin an maraot.”

⁶Nahiling kan babae na magayon an kahoy asin garo masiram pagkakanon an bunga kaini patin naisip niya na an kahoy makakatao nin kadonongan. Kaya kuminua siya kan bunga dangan kuminakan. Dangan tinawan man niya an saiyang agom asin kuminakan man ini.

⁷Pakatapos nindang magkakan, nagkaigwa sinda nin pakasabot, asin naaraman ninda na sinda huba; kaya nagtahi sinda nin mga dahon kan higera dangan ginibo ninda ining pantahob sa saindang hawak.

⁸Kan hapon na idto nadangog nindang naglalakaw sa tatamnan an Kagurangnan Dios, kaya nagtago sinda sa kakahoyan.

⁹Alagad inapod nin Kagurangnan Dios an lalaki, “Haen ka?”

¹⁰Nagsimbag siya, “Nadangog taka sa tatamnan; natakot ako kaya nagtago ako huli ta huba ako.”

¹¹“Siisay an nagsabi saimo na huba ka?” an hapot nin Dios. “Nagkakan ka kan bunga kan kahoy na ipinapangalad ko?”

¹²Nagsimbag an lalaki, “An babaeng itinao mo tanganing magin kaibahan ko iyo an nagtao sako kan bunga, kaya nagkakan ako.”

¹³Hinapot nin Kagurangnan Dios an babae, “Tano ta ginibo mo ini?” Nagsimbag an babae, “Dinaya ako kan halas kaya nagkakan ako.”

¹⁴Dangan tinaraman nin Kagurangnan Dios an halas, “Huli ta ginibo mo ini, isinusumpa taka sa gabos na hayop. Poon ngunyan magkakamang ka asin kabokabo an saimong kakakanon sa bilog mong pagkabuhay.

¹⁵Papag-iwalon ko kamo asin an babae; an saimong banhi asin an saiyang banhi: roronoton kaini an saimong payo, asin hahampakon mo an saiyang bool.”

¹⁶Dangan tinaraman niya an babae, “Dadagdagan ko an kulog na titioson mo sa saimong pagbados asin pag-aki. Alagad, dai mawawara an saimong pagmawot para sa saimong agom asin siya an saimong pagkukuyogon.”

¹⁷Pakatapos, tinaraman niya si Adan, “Huli ta dinangog mo an saimong agom asin nagkakan ka kan bunga na dai ko saimo ipinapakakan, isinusumpa ko an daga huli saimo. Kaipuhan na maglapigot ka sa pagtrabaho sa bilog mong buhay tanganing magkaigwa ka nin pagkakan.

¹⁸Matalubo sa daga an mga doot saka mga tonok, asin mapipiritan kang magkakan nin mga tinanom sa kadlagan.

¹⁹Magpapatagdo ka nin ganot tanganing mapabunga nin anoman an daga, sagkod na ika magadan. Ginibo ka sa kabokabo nin daga kaya sa kabokabo ka mabalik.”

²⁰Eva an inginaran ni Adan sa saiyang agom, huli ta siya an ina kan gabos na tawo.

²¹An Kagurangnan Dios naggibo nin mga gubing hale sa anit nin mga hayop para ki Adan asin sa agom kaini, dangan ginubingan niya sinda.

²²Dangan nagtaram an Kagurangnan Dios, “Ngunyan, arog na satuya an tawo: aram na niya an marahay asin an maraot. Kaipuhan dai na siya makakakan kan bunga kan kahoy na nagtatao nin buhay, asin mabuhay sagkod lamang.”

²³Kaya pinaluwas siya nin Kagurangnan Dios sa tatamnan nin Eden asin pinapag-oma kan daga na ginikanan niya.

²⁴Dangan nagbugtak an Kagurangnan Dios nin mga kerubin sa sirangan na parte kan tatamnan asin nin sarong naglalaad na espada na nagbibirik sa gabos na direksyon tanganing magbantay kan dalan pasiring sa kahoy nin buhay.