Read Central Bicolano Genesis 32 Bible Online

Genesis 32 - Central Bicolano bible

Genesis 32

¹Mantang naglalakaw si Jacob, sinabat siya kan mga anghel nin Dios.

²Kan mahiling niya sinda, nagsaboot siya, “Kampo ini nin Dios!” Kaya an lugar inapod niyang Mahanaim.

³Nagsugo nin mga tawo si Jacob pasiring sa saiyang tugang na si Esau sa daga nin Edom.

⁴Pinasunod niya sinda na magsabi ki Esau: “Kagurangnan, ako si Jacob, na saimong sorogoon, nagpapahayag saimo na nakierok ako ki Laban asin ngunyan pa sana mapuli.

⁵Dakul na an sadiri kong baka, asno, karnero, kanding asin oripon. Nagpasugo ako saimo sa paglaom na magigin marahay an pag-ako mo sako.”

⁶Kan magbalik ki Jacob an mga sinugo, nagsabi sinda, “Nakaolay mi an tugang mong si Esau. Pasiring na siya digdi sa pagsabat saimo kaiba an kwatro syentos kan saiyang mga tawohan.”

⁷Natakot asin nahandal si Jacob, kaya binanga niya sa duwang grupo an mga tawo asin mga hayop na kaiba niya.

⁸Nagsaboot siya, “Kun salakayon asin gadanon ni Esau an enot na grupo, pwedeng makadulag an ikaduwa.”

⁹Dangan namibi si Jacob, “O Dios ni Abraham saka ni Isaac na sakuyang ama, dangoga ako! Ika, Kagurangnan, an nagtaram sako na magpuli sa sakong daga saka sa sakong mga kadugo, asin papakarahayon mo an gabos para sa sako.

¹⁰Bako akong maninigo kan danay mong pagkamoot asin kan pagkamaimbod na ipinahiling mo sako, na saimong oripon. Binalyo ko an Jordan na sugkod sana an dara alagad ngunyan nagbalik ako na may kaiba nang duwang grupo.

¹¹Nakikimaherak ako na iligtas mo ako sa tugang kong si Esau, huli ta natatakot ako saiya; tibaad salakayon asin gadanon niya kami gabos sagkod an kababaehan saka kaakian.

¹²Giromdoma an saimong panuga na papakarahayon mo an gabos para sako asin na tatawan mo ako nin dakul na mga kapagarakian na dai mabilang arog kan baybay sa dagat.”

¹³Duman sa lugar na idto naagahan si Jacob. Dangan, sa mga hayop niya, nagpili siya nin panregalo sa tugang niyang si Esau: dos syentos na babaeng kanding saka beynteng lalaking kanding, dos syentos na babaeng karnero dangan beynteng lalaking karnero, treyntang mag-inang kamelyo, kwarentang babaeng baka asin sampolong lalaking baka, beynteng babaeng asno saka sampolong lalaking asno.

¹⁶Sinuhay niya ini gabos, pinaggrupo-grupo dangan ipinadara sa saiyang mga oripon; sarong oripon sa lambang grupo. Sinabihan niya sinda, “Mag-enot na kamo sako asin bugtakan nindo nin distansya an lambang grupo nin hayop.”

¹⁷Tinogon niya an enot na oripon, “Sa oras na masabatan ka kan tugang kong si Esau asin hapoton ka, ‘Siisay an saimong kagurangnan? Masaen ka? Siisay an kagsadiri kan mga hayop sa enotan mo?’

¹⁸simbagon mo siya nin, ‘Sadiri ini kan saimong oripon na si Jacob. Ipinapadara niya an mga ini bilang regalo sa kagurangnan niyang si Esau. Kasunod mi na si Jacob.’”

¹⁹Siring man an itinogon niya sa ikaduwa, sa ikatolo asin sa iba pang namamahala kan mga hayop: “Ini an sabihon nindo ki Esau sa oras na masabat nindo siya.

²⁰Sabihon nindong, ‘Kasunod mi na si Jacob na saimong oripon.’” Nagsaboot si Jacob, “Sa kadaklan kan regalo ko, mawawara na an saiyang kaanggotan sako. Kaya sa oras na masabat ko siya, papatawadon na niya ako.”

²¹Pinaenot niya an mga regalo alagad duman na siya nagpaaga sa kampo.

²²Kan bangging idto, nagbangon si Jacob asin dinara sa ibong kan Salog nin Jabbok an saiyang duwang agom, an duwa niyang kasaroan asin an onse niyang aki.

²³Pakabalyohan niya sainda, sunod niyang pinaibong an gabos niyang pagsadiri,

²⁴alagad nagpawalat siya. Dangan nagtunga an sarong lalaki asin nakigumolan ki Jacob sagkod na madali nang magliwanag an aldaw.

²⁵Kan mahiling kan lalaki na dai siya nanggagana, sinuntok niya sa piad si Jacob na ikinataplis kan tolang sa piad kaini.

²⁶Dangan nagsabi an lalaki, “Butasi ako, huli ta nagliliwanag na.” Nagsimbag si Jacob, “Dai taka bubutasan sagkod na dai mo ako bendisyonan.”

²⁷Naghapot an lalaki, “Ano an ngaran mo?” “Jacob,” an simbag kaini.

²⁸Nagsabi an lalaki, “Poon ngunyan bako nang Jacob an ngaran mo kundi Israel, huli ta nakigumolan ka sa Dios saka sa mga tawo, asin nanggana ka.”

²⁹Nagsabi si Jacob, “Sabihan man sako an ngaran mo.” Nagsimbag an lalaki, “Tano ta gusto mong maaraman an sakong ngaran?” Dangan benendisyonan niya si Jacob.

³⁰Nagsabi si Jacob, “Nahiling ko an lalawogon nin Dios alagad buhay pa ako”; kaya an lugar nginaranan niyang Peniel.

³¹Nagsirang na an aldaw kan maghale si Jacob sa Peniel; pilay siyang naglakaw huli sa saiyang piad.

³²Kaya sagkod ngunyan, dai kinakakan kan mga Israelita an laman na yaon sa piad kan hayop huli ta iyo iyan an parte na tinamaan kan suntokon si Jacob.