Read Central Bicolano Genesis 40 Bible Online

Genesis 40 - Central Bicolano bible

Genesis 40

¹Dai nahaloy, nagkasala sa hade kan Egipto an saiyang kopero saka an saiyang panadero.

²Naanggot an hade sainda

³asin ipinabilanggo sa harong kan kapitan kan mga bantay, sa bilanggoan na namumugtakan ni Jose.

⁴Haloy na nabilanggo an duwa asin nagin sorogoon ninda si Jose sa pagboot kan kapitan.

⁵Sarong banggi, duman sa bilanggoan, nangatorogan an kopero asin an panadero alagad an saindang pangatorogan magkaiba an kahulogan.

⁶Pagkaaga, naabotan sinda ni Jose na parehong mamondo.

⁷Hinapot niya sinda, “Tano ta mamondo kamo ngunyan?”

⁸Nagsimbag sinda, “Pareho kaming nangatorogan asin mayo digdi nin siisay man na makakapaliwanag kun ano an kahulogan.” Nagsimbag si Jose, “An Dios an nagtatao kan kakayahan sa pagpaliwanag nin mga pangatorogan. Istoryahan daw nindo sako.”

⁹An kopero kan hade nagsabi, “Sa pangatorogan ko, igwa nin sarong poon nin ubas sa atubang ko

¹⁰na igwa nin tolong sanga. Kan magdahon an mga sanga, namurak tolos ini dangan naghirinog an mga ubas.

¹¹Kapot ko an kalis kan hade; ginuno ko an mga ubas asin pinuga ko an mga ini sa kalis dangan itinao ko sa hade.”

¹²Nagsabi si Jose, “Ini an kahulogan kan pangatorogan mo: an tolong sanga, tolong aldaw.

¹³Pakalihis nin tolong aldaw, papaluwason ka digdi kan hade, papatawadon asin papabalikon sa dati mong trabaho. Ika giraray an matao sa hade kan saiyang kalis siring kan enot na mga aldaw kan ika an saiyang kopero.

¹⁴Alagad giromdoma man ako kun nasa marahay ka nang kamugtakan, na maonabihan mo ako sa hade asin matabangan na makaluwas digdi sa bilanggoan.

¹⁵Bako kong kagustohan an pagdigdi sa Egipto; kinidnap ako sa daga kan mga Hebreyo, asin minsan digdi sa Egipto, mayo akong ginibong ano man tanganing ilaog sa bilanggoan.”

¹⁶Pagkahiling kan panadero na marahay an paliwanag sa pangatorogan kan kopero kan hade, nagsabi siya ki Jose, “Nagkaigwa man ako nin pangatorogan: suknong ko an tolong basket nin tinapay.

¹⁷An basket na nasa ibabaw nalalaogan kan manlaen-laen na kakanon para sa hade, asin kinarakan idto kan mga gamgam.”

¹⁸Nagsimbag si Jose, “Iyo ini an kahulogan: an tolong basket, tolong aldaw.

¹⁹Pakalihis nin tolong aldaw, papaluwason ka digdi kan hade asin papupugotan ka! Dangan ipapabitay niya an saimong bangkay sa sarong kahoy asin kakakanon kan mga gamgam an saimong laman.”

²⁰Pakalihis nin tolong aldaw, sa kumpleanyo kan hade, nagtao siya nin bangkete sa gabos niyang opisyal; pinaluwas niya sa bilanggoan an saiyang kopero asin an saiyang panadero dangan pinaatubang sinda sa saiyang mga opisyal.

²¹Ibinalik niya sa dating katongdan an saiyang kopero

²²alagad ipinagadan niya an panadero. Nangyari an gabos siring sa sinabi ni Jose.

²³Alagad dai nagiromdoman si Jose kan kopero kan hade; nalingawan na siya kaini.