Read Central Bicolano Genesis 42 Bible Online

Genesis 42 - Central Bicolano bible

Genesis 42

¹Kan maaraman ni Jacob na igwang pagkakan sa Egipto, sinabihan niya an saiyang mga aki, “Tano ta dai kamo minahiro?

²Nadangog kong igwa nin pagkakan sa Egipto; magduman kamo dangan magbakal nin pagkakan tanganing dai kita magkagaradan sa gutom.”

³Kaya nagpaduman sa Egipto an sampolong tugang ni Jose sa ama,

⁴alagad dai pinaiba ni Jacob si Benjamin na tugang ni Jose, huli ta natakot si Jacob na tibaad may maraot na mangyari saiya.

⁵Nag-abot sa Egipto an mga aki ni Jacob asin an iba pang mabarakal nin pagkakan, huli kan gutom sa daga nin Canaan.

⁶Bilang gobernador, nagpabakal si Jose nin pagkakan sa mga tawong hale sa manlaen-laen na lugar kan kinaban. Pag-abot sa Egipto kan mga tugang ni Jose, nagdapa sinda sa atubang niya.

⁷Kan mahiling sinda ni Jose, namidbid niya sinda, alagad dai siya nagpamalisya. Hinapot niya sinda sa maisog na tingog, “Mga taga saen kamo?” “Mga taga Canaan kami asin napadigdi tanganing magbakal nin makakakan,” an simbag ninda.

⁸Kaya namidbid nanggad sinda ni Jose, alagad dai siya ninda namidbidan.

⁹Nagiromdoman ni Jose an saiyang mga pangatorogan. Nagsabi siya sainda, “Mga espiya kamo; nagdigdi kamo tanganing aramon an kaluyahan kan dagang ini.”

¹⁰Nagsimbag sinda, “Bako kaming mga espiya. Nagdigdi kami bilang saimong mga oripon sa pagbakal nin kakanon.

¹¹Magturugang kami. Bako kaming mga espiya kundi mga onesto kaming tawo.”

¹²Nagsabi si Jose sainda, “Dai ako naniniwala! Nagdigdi kamo tanganing aramon an kaluyahan kan dagang ini.”

¹³Nagsimbag sinda, “Dose kaming magturugang; mga aki nin saro sanang ama sa daga nin Canaan. Gadan na an saro ming tugang, asin an samong ngohod idtoon ngunyan sa kaibahan kan samong ama.”

¹⁴Nagsimbag si Jose, “Siring sa nasabi ko na, mga espiya kamo.

¹⁵Mababalo kamo sa paaging ini: minasumpa ako sa ngaran kan hade na dai kamo makakahale digdi sagkod na dai magdigdi an ngohod nindong tugang.

¹⁶Magpuli an saro saindo asin kuahon siya; an iba saindo ibibilanggo sagkod na mapatunayan na totoo an saindong sinabi. Alagad kun bako, minasumpa ako sa ngaran kan hade, na mga espiya kamo.”

¹⁷Dangan ipinabilanggo niya sinda sa laog nin tolong aldaw.

¹⁸Sa ikatolong aldaw sinabihan niya sinda, “Ako sarong tawo na may pagkatakot sa Dios; giboha nindo ini asin mabubuhay kamo:

¹⁹kun onesto kamo, magpapawalat sa bilanggoan an saro saindo; an iba pwedeng magpuli na asin darahon sa nagugutom nindong pamilya an pagkakan na saindong binakal.

²⁰Dangan darahon nindo digdi sako an ngohod nindong tugang. Ini an magpapatunay na totoo an sinabi nindo asin dai ko kamo gagadanon.” Nag-oyon sinda,

²¹asin nag-orolay, “Nagbabayad na kita ngunyan kan ginibo ta sa satong tugang. Nahiling nyato an saiyang kasakitan kan makimaherak siya sato, alagad dai ta siya dinangog. Ngunyan kita man an pinapasakitan.”

²²Nagsabi si Ruben, “Sinabihan ko na kamong dai nindo pagkulogon an aki, alagad habo kamong magdangog. Kaya nagbabayad kita ngunyan kan pagkagadan niya.”

²³Nasabotan ni Jose an gabos nindang sinabi alagad, dai ninda ini aram huli ta nakiolay sinda saiya sa paagi nin interprete.

²⁴Binayaan ngona sinda ni Jose asin naghibi. Dangan nagbalik siya sainda saka pinili si Simeon na saiyang ipinagapos sa atubang ninda.

²⁵Nagboot si Jose na panoon nin mais an mga sako kan saiyang mga tugang, asin ibugtak giraray sa sako an kwarta nin lambang saro, patin tawan sinda nin makakakan sa dalan. Sinunod ini gabos.

²⁶Dangan ikinarga kan magturugang sa saindang mga asno an mais na binakal ninda, asin naghale.

²⁷Sa lugar na pinagpahingaloan ninda, binukasan kan saro sa sainda an saiyang sako tanganing pakakanon an saiyang asno, asin nahiling niya an saiyang kwarta sa ibabaw kan mais.

²⁸“Inuli an kwarta ko; uya sa ibabaw kan mais!” an sabi niya sa saiyang mga tugang. Tinakigan sinda asin tarakot na nag-orolay, “Ano ining ginibo nin Dios sa sato?”

²⁹Pag-abot ninda sa ama nindang si Jacob sa daga nin Canaan, inosip ninda an gabos na nangyari sa sainda. Olay ninda,

³⁰“Tinuyaw kami kan gobernador kan Egipto asin pinagdudahan kaming mga espiya sa saiyang daga.

³¹Sinimbag mi siya na, ‘Bako kaming mga espiya kundi onestong mga tawo.

³²Dose kaming magturugang sa ama; an saro ming tugang gadan na asin an ngohod idtoon duman sa Canaan kaiba kan samong ama.’

³³Nagsimbag samo an gobernador, ‘Sa paaging ini maaaraman ko kun mga onesto kamo: mawawalat an saro saindo sa kaibahan ko; an iba magpuli na asin darahon an pagkakan sa gutom nindong pamilya.

³⁴Ipag-iba nindo digdi sako an saindong ngohod na tugang. Saka ko maaaraman na bako kamong mga espiya kundi onestong mga tawo; dangan ibabalik ko saindo an saindong tugang asin pwede na kamong mag-erok asin magnegosyo digdi.’”

³⁵Kan iula ninda an laog kan saindang sako, nakua ninda an sadiri nindang kwarta; kaya nagkatarakot sinda asin si Jacob na saindang ama.

³⁶Sinabihan sinda ni Jacob, “Gusto nindong mawara an gabos kong aki. Mayo na si Jose; mayo na man si Simeon; asin ngunyan gusto nindong ipag-iba si Benjamin. Ako an nakukulogan!”

³⁷Sinabihan ni Ruben an saiyang ama, “Kun dai ko ikabalik saimo si Benjamin, pwede mong gadanon an duwa kong aki. Ipaniwala mo siya sako asin ibabalik ko siya saimo.”

³⁸Alagad nagsimbag si Jacob, “Dai nindo pwedeng ipag-iba an aki ko; huli ta gadan na an tugang niya asin siya na sana an natatada. Tibaad may mangyari saiya sa dalan. Gurang na ako asin an kamondoan na dadarahon nindo sako iyo an magadan sako.”