Read Central Bicolano Genesis 45 Bible Online

Genesis 45 - Central Bicolano bible

Genesis 45

¹Dai na napugolan ni Jose an saiyang sadiri sa atubang kan saiyang mga oripon, kaya pinaluwas niya an mga ini sa kwarto. Mayong nawalat duman kan magpamidbid siya sa saiyang mga tugang.

²Nagtangis siya nin makosog, kaya nadangog ini kan mga Egipcio saka ibinareta sa hade.

³Sinabihan ni Jose an saiyang mga tugang, “Ako si Jose. Buhay pa an sakong ama?” Alagad kan madangog ini kan saiyang mga tugang, nagkatarakot sinda kaya dai nakasimbag.

⁴Dangan nagsabi si Jose, “Magrani kamo sako.” Nagdolok sinda ki Jose asin sinabihan, “Ako an tugang nindong si Jose na ipinabakal nindo sa Egipto.

⁵Alagad dai kamo magmondo o magbasol kan saindong sadiri na ipinabakal nindo ako digdi. Enot akong ipinadara nin Dios ki sa saindo tanganing ikaligtas an dakul na buhay.

⁶Ikaduwang taon pa sana ini kan grabeng gutom sa daga; limang taon pa nin pagtios an maabot na mayo nin pag-aarado o pag-aani.

⁷Enot akong ipinadara nin Dios ki sa saindo tanganing iligtas kamo sa makangalas na paaging ini, asin buhayon kamo sagkod an saindong kapagarakian.

⁸Kaya bakong kamo an nagpadara sako digdi, kundi an Dios. Ginibo niya akong ikaduwa sa kapangyarihan sa hade asin parapamahala kan bilog na daga niya; ako an nagpapalakaw kan Egipto.

⁹“Kaya maghidali kamo sa pagpuli sa sakong ama asin sabihan nindo siyang ini an sinabi kan saiyang aking si Jose: ‘Ginibo ako nin Dios na magin parapamahala kan bilog na Egipto; maghidali ka sa pagdigdi sako.

¹⁰Mag-erok ka sa rehiyon kan Goshen, harani sako, ika, an saimong kaakian saka mga makoapo, an saimong mga karnero, kanding asin baka, patin an gabos mong pagsadiri.

¹¹Kun nasa Goshen ka na, maaataman taka. Lima pang taon an grabeng gutom; habo kong magutom kamo—ika, an saimong pamilya saka an saimong mga hayop.’”

¹²Nagsabi pa si Jose, “Ngunyan nahihiling nindo, asin nahihiling mo man, Benjamin, na ako mananggad si Jose.

¹³Ibareta nindo sa sakong ama kun siisay ako sa Egipto. Isabi nindo saiya an saindong nahiling dangan maghidali kamo asin ipag-iba nindo siya digdi.”

¹⁴Kinugos niya an saiyang tugang na si Benjamin asin naghibi; naghibi man si Benjamin mantang kugos ni Jose.

¹⁵Mantang naghihibi, kinugos man niya asin hinadokan an saiyang mga tugang. Pakatapos kaini, saka pa sana nakiolay ki Jose an saiyang mga tugang.

¹⁶Kan makaabot sa palasyo an bareta na nag-abot an mga tugang ni Jose, naogma an hade dangan an saiyang mga opisyal.

¹⁷Nagboot an hade ki Jose, “Sabihi an saimong mga tugang na kargahan nin pagkakan an saindang mga hayop dangan magbalik sa Canaan.

¹⁸Ipakua mo sainda an saindong ama asin an saindang mga pamilya dangan magbalik digdi. Itatao ko sainda an pinakamarahay na daga sa Egipto, na matao sainda nin labi pa kan saindang pangangaipo.

¹⁹Sabihi man sinda na magdara nin mga lunadan hale digdi sa Egipto para sa saindang mga agom saka saradit na mga aki, asin ipag-iba ninda digdi an saindong ama.

²⁰Dai sinda dapat mahadit na bayaan duman an saindang mga pagsadiri huli ta mapapasainda an pinakamarahay na daga sa bilog na Egipto.”

²¹Sinunod kan mga aki ni Jacob an sinabi sainda. Tinawan sinda ni Jose nin mga lunadan sagkod pagkakan para sa saindang paglakaw, siring sa ipinagboot kan hade.

²²Tinawan man sinda ni Jose nin sanglean na gubing, alagad tinawan niya si Benjamin nin tres syentos na pedasong plata saka limang sanglean na gubing.

²³Pinadarahan man ni Jose an saiyang ama nin sampolong asno na kargado nin mga pinakamarahay na mababakal sa Egipto asin sampolong asno na kargado nin mais, tinapay saka iba pang pagkakan para sa saindang paglakaw.

²⁴Dinespedir ni Jose an saiyang mga tugang asin kan mahale na an mga ini, sinabihan niya sinda, “Dai kamo mag-iriwal sa dalan.”

²⁵Naghale sinda sa Egipto asin nagpuli sa saindang ama na si Jacob sa Canaan.

²⁶“Buhay pa si Jose!” an sabi ninda sa saindang ama. “Siya an nagpapalakaw kan bilog na Egipto!” Nabigla si Jacob asin dai siya nagtubod sainda.

²⁷Alagad kan osipan ninda siya kan sinabi ni Jose, asin kan mahiling an mga lunadan na madara saiya sa Egipto, nagtubod siya.

²⁸Nagsabi si Jacob, “Buhay pa an aki kong si Jose! Dai na akong mahahagad pa! Kaipuhan magduman ako asin hilingon siya bago ako magadan.”