Read Central Bicolano Genesis 46 Bible Online

Genesis 46 - Central Bicolano bible

Genesis 46

¹Kaya dara an gabos niyang pagsadiri, nagduman sa Beer-sheba si Jacob asin nagdolot nin mga atang sa Dios nin saiyang ama na si Isaac.

²Pagkabanggi, inapod siya nin Dios sa sarong bisyon, “Jacob, Jacob!” “Uya ako,” an simbag niya.

³Nagtaram an Dios saiya, “Ako an Dios, an Dios kan saimong ama. Dai ka matakot na magduman sa Egipto; gigibohon takang sarong dakulang nasyon duman.

⁴Iibahan taka pasiring sa Egipto, asin ibabalik ko sa dagang ini an saimong kapagarakian. Masasakaibahan mo si Jose sa oras kan saimong pagkagadan.”

⁵Dangan naghale si Jacob sa Beer-sheba. Siya, an saiyang mga makoapo saka an mga agom kan mga aki niya pinalunad kan saiyang mga aki sa mga lunadan na padara kan hade.

⁶Dinara ninda sa Egipto an mga hayop sagkod an mga rogaring na napasainda duman sa Canaan. Ipinag-iba ni Jacob an gabos niyang kapagarakian:

⁷an saiyang mga aking lalaki saka mga makoapong lalaki, an saiyang mga aking babae saka mga makoapong babae.

⁸An pamilya ni Jacob na kaiba niyang nagpasiring sa Egipto iyo an matua niyang aking si Ruben

⁹sagkod an mga aki kaining lalaki na si Hanok, Pallu, Hezron, asin Carmi.

¹⁰Si Simeon sagkod an mga aki kaining lalaki na si Jemuel, Jamin, Ohad, Jakin, Zohar, asin Shaul na aki nin sarong Cananea.

¹¹Si Levi sagkod an mga aki kaining lalaki na si Gerson, Kohat, asin Merari.

¹²Si Juda sagkod an mga aki kaining lalaki na si Shela, Perez, asin Zera. (Si Er saka si Onan nagkagaradan sa Canaan.) An mga aki ni Perez na si Hezron asin si Hamul.

¹³Si Issakar sagkod an mga aki kaining lalaki na si Tola, Pua, Jasub, asin Simron.

¹⁴Si Zabulon sagkod an mga aki kaining lalaki na si Sered, Elon, asin Jaleel.

¹⁵Ini an mga nagin aki ni Jacob ki Lea duman sa Mesopotamia; dai digdi kabilang an aki niyang babae na si Dina. Treynta y tres an bilang kan kapagarakian ni Jacob ki Lea.

¹⁶Si Gad sagkod an mga aki kaining lalaki na si Zefon, Haggi, Suni, Ezbon, Eri, Arod, asin Areli.

¹⁷Si Aser sagkod an mga aki kaining lalaki na si Imna, Isva, Isvi, Beria, asin an tugang nindang babae na si Sera. An mga aki ni Beria na si Heber asin Malkiel.

¹⁸Dyes y seis an bilang kan kapagarakian ni Jacob ki Zilpa, an oripon na babaeng itinao ni Laban sa aki niyang si Lea.

¹⁹An mga aki ni Rachel na agom ni Jacob: si Jose asin si Benjamin.

²⁰An mga aki ni Jose sa Egipto: si Manases asin si Efraim. An mga ini iyo an mga aki ni Jose ki Asenat, an aking babae ni Potifera na sarong padi sa On.

²¹An mga aki ni Benjamin na si Bela, Beker, Asbel, Gera, Naaman, Ehi, Ros, Muppim, Huppim, asin Ard.

²²Katorse an bilang kan kapagarakian ni Jacob ki Rachel.

²³Si Dan asin an aki kaining lalaki na si Husim.

²⁴Si Neftali asin an mga aki kaining lalaki na si Jazeel, Guni, Jezer, asin Sillem.

²⁵Pito an bilang kan kapagarakian ni Jacob ki Bilha, an oripon na babaeng itinao ni Laban sa aki niyang si Rachel.

²⁶Sesenta y seis an bilang kan mga aki asin makoapo ni Jacob na nagpasiring sa Egipto; dai digdi kabilang an mga agom kan saiyang mga aking lalaki.

²⁷Duwa an nagin aki ni Jose sa Egipto, kaya setenta an nagin bilang kan gabos na kapagarakian ni Jacob sa Egipto.

²⁸Pinaenot ni Jacob si Juda tanganing sabihan si Jose na sabaton siya sa Goshen; dangan nakaabot sinda sa Goshen.

²⁹Nagsakay si Jose sa saiyang karwahe asin sinabat an saiyang ama sa Goshen. Kan magkahilingan sinda, kinugos ni Jose an saiyang ama asin nagparahibi.

³⁰Nagsabi si Jacob ki Jose, “Ngunyan na nahiling taka asin naaraman na buhay pa, andam na akong magadan.”

³¹Sinabihan ni Jose an saiyang mga tugang saka an iba pang pag-iriba, “Maduman ako sa hade tanganing sabihan siya na nag-abot na an sakong mga tugang asin an gabos na pamilya kan sakong ama na dating nag-erok sa Canaan.

³²Sasabihan ko siya na mga pastor kamo asin mga paraataman nin mga hayop; na dinara nindo an saindong mga hayop sagkod an gabos nindong mga pagsadiri.

³³Kun apodon kamo kan hade asin hapoton kun ano an saindong trabaho,

³⁴dai nanggad kamo malingaw na magsabi saiya na mga pastor kamo nin mga hayop sa bilog nindong pagkabuhay, siring kan trabaho kan saindong mga ginikanan. Huli kaini, tutugotan niya kamong mag-erok sa rehiyon nin Goshen.” Sinabi ini ni Jose huli ta dai nakikilabot an mga Egipcio sa mga pastor nin hayop.