Read Central Bicolano Genesis 50 Bible Online

Genesis 50 - Central Bicolano bible

Genesis 50

¹Dangan kinugos ni Jose an bangkay kan saiyang ama asin pinaghahadokan an lalawogon mantang naghihibi.

²Pakatapos, nagboot siyang embalsamaron an bangkay kan saiyang ama.

³An pag-embalsamar ginibo sa laog nin kwarentang aldaw, an tamang bilang nin mga aldaw sa paggibo kaiyan. Ipinagmondo kan mga Egipcio an pagkagadan ni Jacob sa laog nin setentang aldaw.

⁴Kan matapos na an panahon nin pagmondo, sinabihan ni Jose an mga opisyal kan hade, “Pakidaraha man nindo an mensaheng ini sa hade.

⁵‘Kan magagadan na an sakong ama, pinasumpa niya ako na duman ko siya ilubong sa inandam niyang lulubngan sa Canaan. Kaya tugote akong ilubong an sakong ama, asin pakatapos, mabalik ako.’”

⁶Nagsimbag an hade, “Lakaw asin lubongan an saimong ama siring sa saimong panuga.”

⁷Kaya naglakaw si Jose tanganing ilubong an saiyang ama. Nag-iriba ki Jose an gabos na opisyal kan hade, an mga may halangkaw na katongdan sa palasyo kaini asin an iginagalang na mga Egipcio.

⁸Nag-iriba man saiya an saiyang pamilya, an saiyang mga tugang sagkod an iba pang myembro kan pamilya nin saiyang ama. An mga saradit na aki saka an mga hayop sana an nawalat sa rehiyon nin Goshen.

⁹Nag-iriba man ki Jose an mga nakakarwahe asin nakakabayo; sarong dakulang grupo an nagpaduman sa Canaan.

¹⁰Kan makaabot sinda sa ginikan nin Atad sa sirangan kan Jordan, haloy sindang nagtarangis nin makosog, asin sa laog nin pitong aldaw, ginibo ni Jose an mga seremonya nin pagmondo para sa saiyang ama.

¹¹Kan mahiling kan mga Cananeo an nagmomondong mga tawo sa Atad, nagsabi sinda, “Solemning marahay an seremonya nin pagmondo na ginigibo kan mga Egipcio!” Kaya an lugar na idto nginaranan Abel-Mizraim.

¹²Ginibo kan mga aki ni Jacob an ipinagboot niya sainda;

¹³dinara ninda an saiyang bangkay sa Canaan asin ilinubong sa lungib nin Makpela, sa sirangan nin Mamre, sa oma na binakal ni Abraham ki Efron na Heteo tanganing paglubongan.

¹⁴Pakalubong kan saiyang ama, nagbalik si Jose sa Egipto kaiba an saiyang mga tugang sagkod an gabos na nakilubong.

¹⁵Pagkagadan kan saindang ama, nag-orolay an mga tugang ni Jose, “Ano an satong gigibohon kun anggot pa sato si Jose asin nag-iisip na magbalos huli kan ginibo ta saiya?”

¹⁶Kaya pinasabihan ninda si Jose: “Bago nagadan an satong ama, nagboot siya,

¹⁷‘Nakikimaherak ako na patawadon mo na an saimong mga tugang kan sala na naginibo ninda saimo.’ Kaya, nakikimaherak kaming patawadon mo na an kasalan kan mga oripon kan Dios nin saimong ama.” Kan makaabot ki Jose an mensahe, naghibi siya.

¹⁸Nagduman man ki Jose an saiyang mga tugang asin nagduko sa saiyang atubang. Nagsabi sinda, “Uya kami sa atubang mo bilang mga oripon.”

¹⁹Alagad sinabihan sinda ni Jose, “Dai kamo matakot; huli ta dai ko pwedeng ibugtak an sadiri ko sa lugar nin Dios.

²⁰Nagplano kamo nin maraot laban sako, alagad pinakarahay ini nin Dios tanganing ikaligtas an buhay nin dakul na tawo, na buhay sagkod ngunyan.

²¹Kaya dai kamo matakot, aatamanon ko kamo sagkod an saindong mga aki.” Siring an pagranga ni Jose sa saiyang mga tugang.

²²Nagpadagos sa pag-erok si Jose sa Egipto sa kaibahan kan pamilya nin saiyang ama; nabuhay siya sa laog nin syento dyes na taon.

²³Nahiling pa niya an mga aki asin makoapo ni Efraim; siya man an nag-ako sa pamilya kan mga aki ni Makir na aki ni Manases.

²⁴Sinabihan ni Jose an saiyang mga tugang, “Madali na akong magadan, alagad aatamanon kamo nin Dios asin papangenotan niya kamo paluwas sa dagang ini pasiring sa dagang ipinanuga niya ki Abraham, ki Isaac asin ki Jacob.”

²⁵Dangan pinasumpa ni Jose an mga kapagarakian ni Israel, “Magsumpa kamo sako na kun darahon na kamo nin Dios sa dagang panuga, na dadarahon nindo an sakong bangkay.”

²⁶Nagadan si Jose sa Egipto sa edad na syento dyes na taon. Pinag-embalsamar ninda an saiyang bangkay asin ilinaog sa sarong kabaong.