Read Central Bicolano Genesis 7 Bible Online

Genesis 7 - Central Bicolano bible

Genesis 7

¹Tinaraman nin Kagurangnan si Noe, “Lumaog ka sa arka kaiba an bilog mong pamilya huli ta ika sana an nahiling kong naggigibo nin matanos sa henerasyon na ini.

²Magdara ka nin pitong pades, sarong lalaki asin sarong babae, kan lambang klase nin malinig na hayop alagad saro sanang pades kan maating hayop.

³Magdara ka man nin pitong pades kan lambang klase nin gamgam. Giboha ini tanganing mabuhay asin magdakul giraray sa daga an gabos na klase nin hayop asin gamgam.

⁴Huli ta pitong aldaw poon ngunyan, papauranon ko sa laog nin kwarentang aldaw asin banggi tanganing mawara an gabos na nabubuhay na ginibo ko.”

⁵Sinunod ni Noe an gabos na ipinagboot saiya nin Kagurangnan.

⁶Kan magbaha sa kinaban, seis syentos na taon na an edad ni Noe.

⁷Luminaog siya sa arka, kaiba an saiyang agom, an saiyang mga aki asin mga manugang, sa pagdulag sa baha.

⁸Kaiba man ni Noe sa arka an sarong lalaki asin sarong babae kan lambang klase nin hayop asin gamgam, malinig man o maati, siring sa pagboot nin Kagurangnan.

¹⁰Dangan pakalihis nin pitong aldaw, uminabot an baha.

¹¹Kan ikadyes y syeteng aldaw kan ikaduwang bulan, kan an edad ni Noe seis syentos na taon na, nagpurutok an gabos na burabod nin tubig sa irarom kan daga, asin nagkaburuksan an mga bintana kan kalangitan,

¹²kaya nag-uran sa kinaban sa laog nin kwarentang aldaw asin banggi.

¹³Kan aldaw na iyan luminaog sa arka si Noe asin an saiyang agom kaiba an saindang mga aki na si Sem, si Ham asin si Jafet sagkod an saindang mga agom.

¹⁴Kaiba man ninda an gabos na klase nin hayop, manso asin lalaw, dakula asin sadit, saka an gabos na klase nin gamgam.

¹⁵Sarong lalaki asin sarong babae kan lambang klase nin linalang na may buhay an naglaog sa arka kaiba ni Noe

¹⁶siring sa ipinagboot nin Dios. Dangan sinerahan nin Kagurangnan an pinto kan arka.

¹⁷Nagpadagos an pagbaha sa laog nin kwarentang aldaw dangan naghararom an tubig sagkod na luminataw an arka.

¹⁸Padagos an pagrarom kan tubig alagad naglataw-lataw sana an arka sa ibabaw kan katubigan.

¹⁹Naghararom pa an tubig sagkod na matahoban an pinakahalangkaw na bukid;

²⁰nagpadagos pa sa pagrarom an tubig sagkod na malabawan kaini nin pitong metros an alitoktok kan mga bukid.

²¹Daing natadang may buhay sa kinaban—nagkagaradan an lambang gamgam, hayop asin tawo.

²²An gabos sa kinaban na naghahangos nagkagaradan.

²³Tinunaw nin Kagurangnan an gabos na nabubuhay sa kinaban—mga tawo, hayop asin gamgam. Si Noe sana asin an mga kaibahan niya sa arka an nagkatarada.

²⁴An tubig nagdanay sa ibabaw nin daga sa laog nin syento singkwentang aldaw.