Read Central Bicolano 2 Samuel 1 Bible Online

2 Samuel 1 - Central Bicolano bible

2 Samuel 1

¹Pagkagadan ni Saul, nagbalik si David hale sa mapangganang pakilaban sa mga Amalekita asin nag-ontok sa Ziklag sa laog nin duwang aldaw.

²Sunod na aldaw, uminabot an sarong hoben na lalaki hale sa kampo ni Saul. Sa pagpahiling kan saiyang kamondoan, ginisi niya an saiyang gubing asin binugtakan nin daga an saiyang payo. Nagdolok siya ki David asin nagdapa sa pagtaong galang.

³Hinapot siya ni David, “Saen ka hale?” “Nakadulag ako sa kampo kan mga Israelita,” an simbag niya.

⁴“Sabihan sako an nangyari,” an sabi ni David. Nagsimbag an lalaki, “Duminulag an samong hukbo hale sa ralaban asin dakul kan samong kalalakihan an nagkagaradan. Si Saul asin an aki niyang si Jonatan kaiba kan nagkagaradan.”

⁵“Paano mo naaraman na gadan na si Saul asin si Jonatan?” an hapot ni David.

⁶Nagsimbag an lalaki, “Nangyari na yaon ako duman kaidto sa itaas kan Bukid nin Gilboa; nahiling ko si Saul na nakasandig sa saiyang garod asin napapalibotan na siya kan mga karwahe saka mga nakakabayong kaiwal.

⁷Kan magsalingoy siya, nahiling niya ako kaya inapod ako. Nagsimbag ako, ‘Uya po ako.’

⁸Naghapot siya kun siisay ako, asin sinabihan ko siya na saro akong Amalekita.

⁹Dangan nagsabi siya, ‘Madya asin gadana ako! Nalugadan ako, asin madali nang magadan.’

¹⁰Kaya nagdolok ako saiya asin ginadan ko siya, huli ta aram ko man sanang magagadan siya sa oras na matumba siya. Dangan kinua ko an saiyang korona saka pangbrasong pulseras asin dinara ko digdi saimo, kagurangnan.”

¹¹Sa kamondoan, ginisi ni David an saiyang gubing; siring man an ginibo kan saiyang mga tawohan.

¹²Maghapon sindang nagmondo, nagtangis asin nag-ayuno para ki Saul, para ki Jonatan saka para sa Israel, an banwaan nin Kagurangnan, huli ta nagadan sinda sa ralaban.

¹³Hinapot ni David an hoben na lalaking nagdara saiya kan bareta, “Taga saen ka?” Nagsimbag an hoben, “Saro akong Amalekita, alagad nag-eerok ako sa saindong daga.”

¹⁴Hinapot siya ni David, “Tano ta dai ka natakot na gumadan kan linahidan nin Kagurangnan?”

¹⁵Dangan inapod ni David an saro kan saiyang mga tawohan asin sinabihan, “Gadana an tawong ini!” Ginadan kan tawohan ni David an Amalekita,

¹⁶asin sinabihan ni David an Amalekita, “Hinukoman mo an saimong sadiri kan sabihon mong ginadan mo an linahidan nin Kagurangnan.”

¹⁷Dangan inawit ni David an panambitan na ini para ki Saul asin sa aki niyang si Jonatan.

¹⁸Ipinagboot niyang itukdo ini sa mga taga Juda. (Nasusurat ini sa Libro ni Jasar.)

¹⁹“Gadan na an satong mga lider sa kabubuldan nin Israel! Nagadan an pinakamaisog tang mga soldados!

²⁰Dai nindo ini ipagbuyagyag sa Gat o sa mga dalan nin Askelon; tibaad mag-orogma an mga aking babae kan mga Filisteo, tibaad mag-orogma an mga aking babae kan mga pagano.

²¹“Mayo logod nin uran o ambon na maghugpa sa kabubuldan nin Gilboa; danay logod na mayong magtalubo sa saiyang kaomahan! Huli ta nadigtaan duman an kalasag kan maiisog; an kalasag ni Saul dai na nagkikinang sa lana.

²²Nakakagadan an pana ni Jonatan, mayong herak an espada ni Saul, na minatumba kan makosog, na minagadan kan kaiwal.

²³“Saul asin Jonatan, namomotan asin magayon! Sa buhay saka sa kagadanan, sinda magkaibahan; mas maliksi ki sa mga agila, mas makosog ki sa mga leon.

²⁴“Tangisan nindo si Saul, kababaehan nin Israel, na guminubing saindo nin magayon na pulang mga gubing, na nagsamno saindo nin mga alahas saka bulawan.

²⁵“Gadan na an pinakamaisog na mga soldados, nagadan sinda sa gera. Gadan na si Jonatan sa kabubuldan.

²⁶“Nagtatangis ako para saimo, tugang kong Jonatan; namotan taka nin marahay! Makangangalas an saimong pagkamoot sako, orog pa ki sa pagkamoot nin mga babae.

²⁷“Gadan na an pinakamaisog na mga soldados, an saindang mga armas nabayaan asin mayo nang halaga.”