Read Central Bicolano 2 Samuel 10 Bible Online

2 Samuel 10 - Central Bicolano bible

2 Samuel 10

¹Dai nahaloy, nagadan si Nahas na hade nin Ammon. Si Hanun na aki niyang lalaki iyo an nagsalihid saiya bilang hade.

²Nagsabi si David, “Makikipagkatood ako ki Hanun, siring kan ginibo sako kan saiyang ama.” Kaya nagpadara si David nin mga sugo sa pagpahiling nin pakidumamay. Pag-abot ninda sa Ammon,

³nagsabi ki Hanun an mga lider na Ammonita, “Sa paghona mo, sinugo ni David an mga lalaking iyan sa pakidumamay saimo huli sa pag-omaw sa saimong ama? Bako daw na sinugo niya sinda sa pagsiyasat asin pagmanman kan daga tanganing saiyang sakopon?”

⁴Kaya dinakop ni Hanun an mga sinugo ni David, inahit an kabanga kan saindang mga barabas, pinutol sa may piad an saindang mga gubing, dangan pinahale sinda.

⁵Soropog nang magpuli an mga sugo ni David. Kan naaraman ni David an nangyari, pinasabihan niya sinda na mag-erok ngona sa Jerico asin dai magpuli sagkod na dai pa nagtalubo an saindang mga barabas.

⁶Kan nahiling kan mga Ammonita na nagin kaiwal ninda si David, tinandanan ninda an beynte mil na soldados nin Siria hale sa Bet-rehob asin sa Zoba, an dose mil na kalalakihan hale sa Tob, asin an hade nin Maaca, kaiba an sangribong tawohan niya.

⁷Naaraman ini ni David, kaya ipinadara niya si Joab kaiba an bilog na hukbo.

⁸Nagruluwas an mga Ammonita asin nagtirindog sa pakilaban duman sa palaog sa Rabba, an saindang pangenot na syudad, mantang yaon sa kahiwasan an mga taga Siria asin an kalalakihan na hale sa Tob saka Maaca.

⁹Nahiling ni Joab na sasalakayon siya kan mga kaiwal sa atubangan asin sa likodan, kaya pinili niya an pinakamarahay na mga soldados nin Israel dangan iyo an pinaatubang niya sa mga taga Siria.

¹⁰An natada sa saiyang hukbo ibinugtak niya sa pamamahala kan tugang niyang si Abisai, asin iyo an pinaatubang niya sa mga Ammonita.

¹¹Sinabihan ni Joab si Abisai, “Kun nahihiling mong nadadaog ako kan mga taga Siria, tabangan mo ako, asin kun nadadaog ka kan mga Ammonita, tatabangan taka.

¹²Magmaisog ka! Maigot kitang makilaban para sa satong banwaan asin para sa mga syudad nin satong Dios. Gibohon logod nin Kagurangnan an pinaghohona niyang marahay!”

¹³Nagrani si Joab asin an saiyang mga tawohan tanganing makilaban sa mga taga Siria; nagdurulag an mga Siro.

¹⁴Kan nahiling kan mga Ammonita na nagdurulag an mga Siro, nagdurulag man sinda ki Abisai asin naglaog sa saindang syudad. Kaya nag-ontok si Joab sa pakikilaban sa mga Ammonita asin nagbalik sa Jerusalem.

¹⁵Alagad kan nahiling kan mga Siro na nadaog sinda kan mga Israelita, tinipon ninda an bilog nindang hukbo.

¹⁶Ipinaapod ni Hadeng Hadadezer an mga taga Siria na yaon sa sirangan na parte kan Salog nin Eufrates, asin nag-abot sinda sa Helam, sa pamamahala ni Sobac, na pamayo kan hukbo ni Hadeng Hadadezer nin Zoba.

¹⁷Kan maaraman ini ni David, tinipon niya an bilog na hukbo nin Israel, binalyo niya an Jordan, asin nagpasiring sa Helam, saen nakaatubang niya an mga taga Siria. Nagpoon an ralaban

¹⁸asin napasibog kan mga Israelita an mga Siro. Si David asin an saiyang mga tawohan nakagadan nin syete syentos na mga taga Siria na nakakarwahe asin kwarenta mil na mga nakakabayo. Nalugadan ninda si Sobac, an pamayo kan mga kaiwal, asin nagadan siya duman.

¹⁹Kan nahiling kan mga hadeng sakop ni Hadadezer na nadaog sinda kan mga Israelita, nakipagtoninong sinda sa Israel; nasakop sinda kan mga Israelita. Poon kaidto natakot na an mga Siro na tabangan an mga Ammonita.